第3章——作田人生活記事
5. 農業社會上要緊ê運搬家私──牛車

農業社會上要緊ê運搬家私──牛車

Lông-gia̍p Siā-hōe Siāng Iàu-kín ê Ūn-poaⁿ Ke-si——Gû-chhia

記得一段唸謠是：「大頭--ê大頭--ê坐牛車，牛車iⁿ-oaiⁿ叫，大頭--ê khih-khih笑。」坐牛車ê心適趣味，老一輩應該lóng有真深記智。

牽牛車是一項專業，賺chit途--ê m̄-nā ài有錢買牛hak牛車，mā ài有粗勇漢草，拖車--ê是牛，giâ貨送貨起落--ê是人，lóng需要力頭飽，耐操耐做有擋頭ê粗khang-khòe，一車貨物tín-tāng-tio̍h to̍h是5-6000斤，koh-khah重載--ê是7-8000斤，連同牛車m̄-boeh chiâⁿ萬斤，tn̄g-tio̍h chit款重載，牽牛車ê牛車兄to̍h ài tiàm頭前陪牛哥行，kā牛哥加油tàu出力，a̍h是lêng牛鼻叫助手後面tàu-sak。貨物少ê時陣，a̍h是等貨落了後，牛車兄to̍h-ē坐tiàm頭前牛車道牽牛索giâ牛sut-á指揮牛哥，nā是穡頭作了已經黃昏，koh ē趕牛sió-khóa lia̍p-lōng走，輕鬆唱山歌，看牛輕鬆á走，一時感覺牛kap人互相依倚，saⁿ-kap作穡感心畫面，che是khah早台灣人m̄食牛肉ê感恩心靈。

Tng牛車空載時陣，to̍h是gín-á坐牛車好機會，庄--裡牛車有5台，耀輝--e ê牛車，gín-á siāng愛坐，m̄-nā bē kā人趕，koh-ē停落來hō͘ gín-á坐好勢，耀輝--e生做武tún武tún，腳手mé-lia̍h，phah-piàⁿ好鬥陣，tòa-tī隔壁內底，伊lóng ē叫「Lah-jih--è！來頭前坐kap我做夥！」

Àu-ta̍t-á伯惡khia̍k-khia̍k，m̄ hō͘人坐to̍h是m̄ hō͘人坐，每pái nā有人坐伊ê牛車to̍h氣phut-phut，狡怪好膽ê gín-á無大無細愛kā伊chhòng-tī，kì-chāi伊趕，boeh坐to̍h是boeh坐，趕kah chiâⁿ煩時，kui-khì牛sut-á giâ--leh，落車，gín-á自然走kah phùn-keng--去，thèng-hāu伊koh轉去頭前坐，gín-á又koh khi̍p-tiàm後壁牛車道hàiⁿ--leh hàiⁿ--leh笑hai-hai。

Sêng-á兄hoâiⁿ koh ok，一ê面á hm̍h-hm̍h m̄講話，ta̍k-ê lóng m̄敢坐伊ê牛車，雖bóng Lah-jih好頭嘴tiāⁿ-tiāⁿ相借問「Sêng-á兄，你boeh去tah！」Mā m̄-bat坐伊ê牛車。

牛車Jī--ē人tiām-tiām罕得kap人開講，gín-á坐伊ê牛車，to̍h ài用偷坐--ê，罕罕--à chiah-ē kā人趕。

Siāng趣味to̍h是坐牛車Hok--à ê牛車，路頭路尾tn̄g--tio̍h，lóng-ē停落來hō͘ Lah-jih坐，載到阮門腳口chiah落車，別ê gín-á boeh坐伊ê牛車，除了in內底ê人，其他免講，gín-á伴lóng chiâⁿ欣羡Lah-jih，m̄免用偷坐--ê，原因是牛車Hok--à kap阿爸振á叔公真bā，真有話講。

阿爸時常交帶「m̄-thang偷坐人ê牛車，牛車leh行振動，án-ne peh-chiūⁿ peh-lo̍h ē危險。」阿爸雖bóng無夠kut-la̍t作穡，教kiáⁿ確實有伊1套道理。莫怪牽牛車--ê lóng bô-ài hō͘人偷坐伊ê牛車，這m̄是ko͘-láu，是安全問題。

1. 牛車部位名稱紹介（一）

Gû-chhia Pō͘-ūi Miâ-chheng Siāu-kài （1）

請對應相片做夥讀ē Khah清楚。

1-1. 牛鼻Khian

Gû-phīⁿ-khian

Mā有講做牛鼻khoân，銅質，kǹg過牛鼻，pa̍k索á牽牛、指揮牛ê行動。

1-2. 牛吊龍

Gû-tiàu-lêng

牛鼻khian kǹg-tī牛鼻，tīn-tōng-hàiⁿ是一項負擔，所以kā牛鼻khian用細條索á吊tiàm牛耳後牛niah所在，減輕牛鼻ê負擔，chit條索á叫做牛吊龍（Mā有人講鼻龍Phīⁿ-lêng）。

1-3. 牛牽胸

Gû-khan-heng

牛擔khòe-tī牛ām-kún，無張持ē溜--去，為tio̍h固定牛擔位置，用一條細條黃麻索á ùi ām下kho͘起來pa̍k tiàm牛擔兩pêng，chit條索á叫做牛牽胸。

1-4. 牛擔

Gû-taⁿ

Khòe tī牛ām-kún，彎曲像山形，大部份是刺竹牛擔。竹筍尺外koân，to̍h用模具引導伊定形，等到竹nā sek到ngē-chiāⁿ tēng-pak chiah取落來si-á-geh，這有專門做牛擔ê販á提來牛墟賣。

1-5. 牛腳蹄

Gû-kha-tê

牛腳蹄是牛穿ê鞋，m̄是牛ê腳蹄。拖牛車ê牛chiah ē穿牛腳蹄。

1-6. 牛車棚á

Gû-chhia-pêⁿ-á

駛牛犁田時，牛擔連接犁鉤hit kōaⁿ家私叫做kha-chhia「腳車」；nā是kah tiàm牛ām-kún hit組家私，to̍h號做gû-chhia-pêⁿ-á（牛車棚á）。Kah腳車，牛chiah ē-tàng駛田，kah牛車棚á，牛chiah ē-tàng拖車。

包含1支牛擔、2支chhia-pêⁿ-á柴篙kap連接車台ê牛車耳。Hit 2支chhia-pêⁿ-á柴篙tio̍h用chiⁿ--ê ê直絲káu-chân-á（九層á）柴，káu-chân-á tēng-pak韌koh勇，ē堪得拖chiâⁿ萬斤ê重載。牛擔pa̍k接chhia-pêⁿ-á用鐵kho͘鎖tiâu，過去是用藤bi̍h-á a̍h是瓊麻索pīⁿ成「8」字型pa̍k tiâu--leh，m̄ chiah有一種用麵粉做成「8」字ê嘴食物叫做「kha-chhia-tîn（kha車藤）」。Kha-chhia-tîn有ê所在號做索á股a̍h-sī蒜茸枝。

駛牛犁田，牛擔連接犁鉤需要腳車；駛牛拖車，牛boeh拖牛車需要牛車棚á。

1-7. 牛車磨／頂下磨盤

Gû-chhia-bō/Téng-ē-bō-pôaⁿ

牛車ē-tàng tńg彎se̍h角全靠頭前輪kap牛車台相連hit-ê「頂下磨盤」，頂下磨盤to̍h親像石磨á ê頂下lún，ē-tàng tńg-se̍h，所以mā有講做牛車磨。

1-8. 牛車道

Gû-chhia-tō

木造牛車台ê四邊柴koaiⁿ號做牛車道。

1-9. 牛車輪

Gû-chhia-lián

古早古早ê牛車輪是柴枋，後--來是柴輪外iân套鐵kho͘，koh來to̍h換自動車樹奶輪。

1-10. 牛車Khi̍t-á

Gû-chhia-khi̍t-á

牛車台ê兩pêng邊牛車道有鎖4-kâi鐵kho͘-á，ē-tàng chhāi柴khi̍t-á，號做牛車khi̍t-á，固定貨物。

2. 牛車部位名稱紹介（二）

Gû-chhia Pō͘-ūi Miâ-chheng Siāu-kài （2）

請對應相片做夥讀ē Khah清楚。

2-1 牛車輪

Gû-chhia-lián

樹奶輪。

2-2 牛車磨

Gû-chhia-bō

牛車ē-tàng轉彎se̍h角全靠頭前輪kap牛車台相連hit ê牛車磨，牛車磨mā講頂下磨盤（téng-ē-bō-pôaⁿ）。

2-3 牛車擋

Gû-chhia-tòng

牛拖牛車，行路慢鈍，載貨落崎時，chiah需要Tòng-kùn（擋棍），擋棍是橫tī後輪ê長柴kho͘，由牛車坦邊ê擋koaiⁿ控制。擋棍to̍h是『煞車』。

2-4 牛車道

Gû-chhia-tō

木造牛車台ê四邊柴koaiⁿ號做牛車道。頭前牛車道是駛牛車--ê ê座位，後壁牛車道是gín-á偷坐牛車ê所在。

2-5 牛車杙á

Gû-chhia-khi̍t-á

牛車台ê兩pêng邊牛車道有鎖4-kâi鐵kho͘-á，ē-tàng chhāi柴khi̍t-á，號做牛車khi̍t-á，固定貨物。

3. 兩輪牛車

Nn̄g-lián Gû-chhia

4. 拖牛車ê牛

Thoa Gû-chhia ê Gû

4-1. 赤牛

Chhiah-gû

Kap水牛kāng款，ē駛田ē拖車，力頭比水牛khah差。

4-2. 水牛

Chúi-gû

5. 一寡牛ê家私紹介

Chi̍t-kóa Gû ê Ke-si Siāu-kài

5-1. 牛Lin-long-á

Gû Lin-long-á

赤牛á掛tī ām下，行路lin-lin-long-long。

5-2. 淋水管

Lâm-chúi-kóng

日頭赤iāⁿ-iāⁿ，拖車ê牛，熱kah擋bē tiâu，需要lâm水，牛車需要準備鉛桶á a̍h是竹管簡單做ê水管，隨時ē-tàng路邊水溝á入水kā牛哥lâm水。

5-3. 牛灌管

Gû Koàn-kóng

牛mā ē破病需要食藥，to̍h用chit款削chhu-chhu ê竹管灌藥á。所以咱to̍h kā圓管削做chhu-chhu chhoa̍h-chhoa̍h ê款式，講做灌管嘴。

6. 牛車牌

Gû-chhia-pâi

7. 註解

Chù-kái