第2章——作田人Chia̍h-si̍t記事
3. Hiâⁿ柴顧火──灶Khang前

Hiâⁿ柴顧火──灶Khang前

Hiâⁿ Chhâ Kò͘ Hóe──Chàu-khang Chêng

Gín-á時代，goán-tau煮食kō͘大灶，灶khang前khǹg 1-chiah kē椅頭，椅頭前有火ngeh，火hu-pê-á，火ngiáu，椅頭後是khǹg草in火柴。

大鼎煮食kài無閒，a̍h boeh煮a̍h boeh hiâⁿ火，góa n̄a tī厝--lí to̍h負責hiâⁿ火，gín-á人iau-sâi，時常kā草in ke hiâⁿ 1-in，án-ne等--leh to̍h有鼎phí thang食；有時煮食soah，to̍h the̍h番薯落去pû，番薯 phang-kòng-kòng甜but-but，實在有夠好食。Nā是過年時，to̍h切甜粿pang khòe tiàm火ngeh tiàm灶khang 來烘，比煎--e khah有滋味。

想起灶khang前ê ta̍p-ta̍p滴滴，有夠趣味，寒--人 ē-tàng烘火，熱--人haⁿh kah汗流sám滴，有時失注意，灶khang火hoa--去，to̍h ē hông唸kah m̄敢應話。

1. 灶Khang前ê家私

Chàu-khang-chêng ê Ke-si

1-1. 草in kap大柴

Chháu-in Kap Tōa-chhâ

Kā ē-tàng hiâⁿ火ê稻草、蔗ha̍h、雜草，有規則tān做1-khûn 1-khûn ē-tàng long入灶khang hiâⁿ火ê草khûn to̍h號做草in。草in是大灶hiâⁿ火ê主要能源。

Nā是木材，破做hiâⁿ火火柴，阮講大柴，伊ê火力khah大，平常時m̄-kam hiâⁿ，tio̍h等年節鬧熱需要炊粿sa̍h精牲，chiah提來hiâⁿ火。

古早庄腳cha-bó͘人，三頓煮食hiâⁿ火，lóng是ka-tī khioh柴，ka-tī in草in，佔bē少時間。In草in ê in，是kā稻草、蔗ha̍h、雜草khioh-khioh tān-tān做1-khûn，chiah用稻草纏兩liàn seh ân，m̄免phah結。

1-2. 番á火

Hoan-á-hoe

『安全火柴』番á火是灶khang起火、油燈點火ê火種，是日常生活消磨品，是sàn赤人煮食cha-bó͘人ê操煩，時常chhōe無番á火thang起火。看是無chiūⁿ目m̄值錢，無伊koh bē-sái--tit，需要用錢買，講tio̍h錢to̍h儉儉á khiat，m̄-thang討債，hiau-hēng，tn̄g-tio̍h番á火bak tâm lùn--去，1支bē-to̍h，2支bē-to̍h，3支4支khiat了了‥‥‥

番á火殼hit塊烏色所在，to̍h是khiat番á火磨擦ê媒介。

Gín-á時代時常kā阿嫂討3枝番á火枝，去hām gín-á伴ī輸贏ê gín-á-sńg，無goā久to̍h贏1-lok番á火轉來hō͘阿嫂。

1-3. 火管

Hóe-kńg

兩ham兩目桂竹á管，中央hit目lak khang，尾目鑽細kâi khang，用來pûn火。

1-4. 火Ngeh kap火Hu-pê-á

Hóe-ngeh kap Hóe-hu-pê-á

火ngeh，ngeh火柴、草in入去灶內。

火ngiáu，thah火ngiáu火柴火炭。

火thio，thio火炭thio出灶khang外，hō͘烘爐用a̍h是淋水做火炭。

火hu-pê-á，pê火hu，清理灶khang。Hiâⁿ草hiâⁿ稻草，火hu特別chē，tio̍h時常用火hu-pê-á pê火hu。

1-5. 烘爐

Hang-lô͘

細型ê灶，mā講做烘爐灶，khah捷hiâⁿ火炭，慢火tīm，tūn肉類a̍h是choaⁿ中藥藥頭á，寒天烘火，落雨天烘eⁿ-a 衫褲尿chū-á。

2. Chiūⁿ山khioh柴

Chiūⁿ-soaⁿ Khioh-chhâ

Éng過無電無gá-suh，灶腳煮食lóng是hiâⁿ柴hiâⁿ草in，稻草無夠用，需要野外山坪khioh柴jiàu樹葉轉來做火柴。Cha-po͘人田--裡穡頭khah閒，cha-bó͘人趁細kiáⁿ有人tàu chhōa a̍h是撥工相招，利用透早去八卦山脈普興庄山khioh柴，有時chhiam擔鉤á索、柴刀草keh-á chah--leh，khioh一寡ta àu柴kho͘，割一寡樹枝雜草，taⁿ一擔轉來曝ta in草in，he在欉樹椏m̄敢chhò，驚巡山ē lia̍h，為tio̍h年節炊粿需要大柴火khah猛，姑不而將偷chhò幾椏藏tiàm內面中央，心內是驚kah phi̍h-phi̍h-chhoah，聽講ī--ā khioh柴to̍h是án-ne生。

隔壁A-Chóaⁿ--è是細漢io ê sim-pū-á，kā我講：Gín-á時tòe阿婆去khioh柴，lóng是阿婆khioh hō͘我擔，阿婆教我「Nā有人來，你做信號hō͘我知to̍h好，我ē khioh柴hō͘你擔，阿婆真kā我照顧。」

有時taⁿ葉á-láng kap pê-jiáu-á去jiàu樹葉，he竹篾á pīⁿ ê草láng超過半人koân，棍á long過草láng khang，內面sūn-sòa iá-mih幾節柴kho͘，路邊nā有ē食得ê野生葡萄、刺波、菝á，sūn-sòa挽轉來hō͘ gín-á食，án-ne gín-á to̍h-ē乖乖hō͘阿母出門khioh柴，gín-á mā乖乖thèng-hāu大人khioh柴轉--來。

Tn̄g-tio̍h食奶gín-á boeh án-chóaⁿ？交帶大漢--è āiⁿ去隔壁阿姆、阿嬸hia食，suh阿姆、阿嬸ê奶水。

Khiap勢命ê庄腳sàn赤人，cha-po͘人 tio̍h ài piàⁿ，cha-bó͘人kāng款認命，gín-á戇戇m̄知影siáⁿ-mih是pháiⁿ命。

3. Chhiam擔kap鉤á索

Chhiam-taⁿ kap Kau-á-soh

Chhiam擔是一支竹管雙頭鋸sêng chhoa̍h-chhoa̍h尖尖灌管嘴，ē-tàng chhiam入去柴擔、草khûn縫。鉤á索是柴鉤á pa̍k黃麻索，捆草khûn pa̍k柴擔，纏纏捆捆--leh to̍h用柴鉤鉤ân to̍h好勢，好pa̍k好tháu真利便。

千金譜：尿hia、肥桶kah soān桶，米籮、淺篾kah草láng，畚擔、chhiam擔、鉤á索，牛車、牛擔、kah kha車。嘴om、藤條、牽牛索。牛tio̍h飼飽顧ho͘好。

4. 註解

Chù-kái