第1章——作田人田園記事
7. 秧Chioh──栽培秧仔

秧Chioh──栽培秧仔

Ng-chioh──Chai-pôe Ng-á

1. 播田前ê穡頭

Pò͘-chhân Chêng ê Sit-thâu

播田to̍h是播稻仔、插秧仔，插秧仔進前tio̍h先掖秧仔（iā ng-á），掖秧仔tio̍h秧chioh，秧chioh to̍h是中國話『秧田』。Pháng田進前有人提供1 khu田稅人做秧chioh，a̍h是ka-tī留1 liau地做秧chioh，秧chioh田tio̍h ài等待秧仔lóng thio了，chiah ē-sái-tit犁田插秧仔。

Ùi選粟種、浸粟種、掖秧仔到播田、so草，koh來等飽kūi、抽穗、芒花、入漿、飽穗到鉤頭、熟黃、割稻，ē-sái-tit講連sòa ê關心kap無閒。透早tio̍h出門，受苦無人問，iām天是赤日頭，寒--人是田水冷霜霜，m̄ koh做kah ná牛ê作田兄，m̄ káⁿ hoah艱苦，「做雞tio̍h chhéng，做人tio̍h péng。」天生認命。

選粟種、用水桶浸粟仔浸1暝to̍h ka ko͘起來khǹg tiàm米籮，早冬天氣khah寒需要hiù燒水，khàm布袋，保持溫度，mā tio̍h用手chhiau振動，chiah ē puh芽，2、3暝後看nā tú pok芽to̍h ài掖秧仔，chiah bē斷粟芽。粟芽掖tiàm秧chioh土面，需要用水soān-á soān水，驚粟芽寒to̍h掖麻á-kho͘粕（phoh）保溫兼做肥料。

第二期慢冬粟種hiù冷水to̍h好，因為熱天天氣燒熱，秧仔成長khah緊，秧仔nā siuⁿ過長，to̍h需要cháⁿ秧仔尾，秧仔尾bē-sái-tit割tio̍h íⁿ。

2. 管理秧Chioh

Koán-lí Ng-chioh

播田to̍h是插秧仔，秧仔to̍h是稻仔栽，秧仔需要1 khu秧chioh來掖種，ùi秧chioh到掖秧仔到taⁿ秧仔去田--ni̍h chhah秧仔，需要用足chē家私，下面咱to̍h來紹介chia ê家私（ke-si）名稱kap路用。

2-1. 選粟種

Soán Chhek-chéng

選飽tīⁿ kāng品種ê蓬萊粟、在來粟a̍h是chu̍t-á，kā phē-á（稗á）種子揀hìⁿ-sak。

2-2. 浸粟仔

Chìm Chhek-á

粟種khǹg-tiàm大kha水桶浸，水hē淹淹á（差不多20%）to̍h好，kā浮出水面ê phàⁿ粟ko͘掉，熱天大約浸1工1暝，寒天tio̍h 3、4工以上，chiah kā粟種ko͘起來khǹg tiàm米籮，早冬天氣khah寒，需要hiù燒水、khàm布袋保持溫度，mā tio̍h用手chhiau振動chiah ē puh芽，iáu未出芽進前，用la-lun-á燒ê水ka sip ho͘澹濕澹濕，nā發現已經pok芽，to̍h ē-sái-tit擔去秧chioh掖，chiah bē斷粟芽。

2-3. 秧Chioh

Ng-chioh

有人先犁1 khu田做秧chioh，分做1 liau 1 liau，pa̍k人掖秧仔，秧chioh是稻仔ê搖籃。掖秧仔ê秧chioh需要pêⁿ-tháⁿ（平坦），thio秧仔ê土肉chiah ē平厚，需要人工用大支抹刀kā土面抹平。

補充： 秧chioh mā有人講ng-chhio̍h（秧蓆），見《臺日大辭典》：秧苗圃。

2-4. 掖秧仔

Iā Ng-á

Kā tú puh芽ê粟仔平均分散掖tiàm進前整理好ê秧chioh內，叫做掖秧仔，需要技術，siuⁿ lang siuⁿ cha̍t lóng m̄好。

2-5. Thio秧仔

Thio Ng-á

秧仔大kah超過1 lia̍h長kha-tau，to̍h ē-sái-tit用秧thio，連土thio 1塊1塊，thang播田插秧仔。秧thio連柄1支直直，thio秧仔需要khû leh lia̍h-pêⁿ thio，角度lia̍h無準，ē thio tio̍h根a̍h是土肉thio siuⁿ chē，lóng無適合，kap用鋤頭掘草phí無kāng。

2-6. Khau秧仔

Khau Ng-á

因為播田（pò͘-chhân）lóng是厝邊隔壁放伴播，秧仔nā siuⁿ過大欉，to̍h需要用khau--ê，koh用鐮le̍k-á kā秧尾cháⁿ 1寡掉，千萬m̄ thang傷tio̍h秧仔心，sòa--lo̍h用稻草pa̍k做1束1束。Siuⁿ tn̂g ê秧仔ē tòm-sôe，khiā bē thêng。

2-7. Taⁿ秧仔

Taⁿ Ng-á

Taⁿ秧仔tio̍h用秧lop-á貯秧仔，秧lop-á 1 lop 1 lop ē-tàng相tha̍h，taⁿ去田頭khǹg-tiàm秧船á（秧桶船á）內。

3. 浸粟仔家私

Chìm Chhek-á Ke-si

3-1. 水桶kap水桶藤

Chúi-tháng kap Chúi-tháng-tîn

Kho͘桶師傅kho͘ ê柴桶，雙pêng有耳，chiah用籐ut ê水桶籐鉤--leh做kōaⁿ耳，水桶籐比pa̍k索á khah方便，ē-sái-tit khiā直，ē-sái-tit khòe平。

水桶平常時用來tī鼓井、水窟á擔水，mā用來浸粟種、貯番薯、醃瓜á去鼓井腳洗。

Chit種柴桶nā ka khǹg-tiàm房間放尿，to̍h是尿桶。

3-2. 布袋

Pò͘-tē

Iûⁿ-môa布、瓊麻布，織ho͘ pûi-pûi （ba̍t-cha̍t）做ê布袋，用來貯粟貯米，方便運搬。浸粟種ê時，ē-tàng用來khàm粟種，保溫催芽。

4.秧Chioh家私

Ng-chioh Ke-si

4-1. 柴抹刀

Chhâ Boah-to

秧chioh一股一股ná菜股，為tio̍h方便thio秧仔，掛土ê土胚khah pêⁿ-pāng（平棒），秧chioh紡好，需要用柴抹刀ka抹ho͘平平。

5. Thio秧仔ê家私

Thio Ng-á ê Ke-si

5-1. 秧Thio

Ng-thio

秧thio一支ná大支煎匙，刀肉平平koh sió-khóa lāi-lāi，kap thio柄成直線型，thio秧仔ê時，需要貼土面摻土thio，秧仔根tio̍h tiâu土。

6. Khau秧仔ê家私

Khau Ng-á ê Ke-si

6-1. 鐮Le̍k-á

Liâm-le̍k-á

鐮le̍k-á主要用來割稻仔，mā ē-sái-tit用來割秧仔尾。土腳插1支桂竹á，半人koân所在pa̍k 1支鐮le̍k-á，刀肉tī下pêng翹翹，割秧仔尾真方便。秧仔nā大到siuⁿ tn̂g，to̍h ài用khau--ê，chiah koh cháⁿ秧仔尾。

7. Taⁿ秧仔家私

Taⁿ Ng-á Ke-si

7-1.秧Lop-á

Ng-Lop-á

秧lop-á有人講秧籃仔，貯秧仔用，1 lop 1 lop相thia̍p，chiah用pùn-taⁿ（畚擔）掛鉛線鉤仔擔，taⁿ去播田所在。掛鉛線耳、索á耳ē-tàng用畚擔taⁿ--ê是秧籃仔，無耳--ê是秧lop-á。

7-2秧Lop-á架

Ng-Lop-á Kè

簡單柴kho͘釘ê秧lop-á架，實用方便，1 tàⁿ taⁿ 4 lop秧仔。

7-3. 秧籃仔

Ng-nâ-á

有pa̍k索á耳ê秧lop-á號做秧籃仔，秧籃仔面頂ē-tàng lop 1 kha 2 kha秧lop-á，án-ne 1 pái to̍h ē-tàng taⁿ 4到6 lop秧仔。

8. 註解

Chù-kái