第6章——作田人在地記事
1. 崁頂庄集興軒子弟（團）

崁頂庄集興軒子弟（團）

Khàm-téng Chi̍p-hin-ian Chú-tē(thoân)

〔發表tī臺江臺語文學季刊5015秋15期〕 參考資料：林美容著_彰化縣曲館與武管【南彰化臨山篇】 20141018蕭平治與蕭木泉對話開講kap樂器翕相。

集興軒子弟（團）樂器分做武場kap文場，武場有kó͘-kài（鼓界）、lô-chhau（鑼鈔）；文場有吹kap絃。以合奏為主，排場、對曲，子弟陣、八音、三筆鑼á是鬧熱陣頭。年節pûn春，做生日排場，ngiâ-chih神明，娶新娘，送亡者上山頭lóng需要集興軒子弟（團）tàu腳手。

1. 歷史kap人物

1-1. 集興軒歷史

Chi̍p-hin-ian Le̍k-sú

崁頂庄集興軒成立tī日本時代，根據集興軒鼓架題字「明治30年成立」是西元1897年，已經有117年歷史。

老師傅蕭順良補充講：「Chit個鼓架tī民國七十五年五月開公金重修時，為tio̍h加深集興軒ê歷史，蕭添露建議增加成立年閣，所以應該無夠117年chiah tio̍h。不過根據我所知，集興軒tī黃起in老爸黃清河時代to̍h已經存在，黃起kap黃清河lóng是鼓吹手，黃起koh ka-tī整布袋戲團」。Ē-tàng確定--ê是大約tī 1950年，太平里ê陳金龍先生來崁頂開館。陳金龍先生ê師傅是社頭鄉石頭公「北管先生」洪朮先生。（蕭木泉學吹ê時陣是20歲，今年85歲，已經有65年歷史。）

1-2. 練習演出地點

Liān-si̍p Ián-chhut Tē-tiám

役會kap公埕（土地公廟á將爺廟á廟埕，to̍h是現此時晉天宮廟埕）。金龍師來崁頂大約教有四、五館ê時間，hit-chūn「先生」並m̄是ta̍k工來教，因為其他庄頭mā有chhiàⁿ伊教，nā有來教，集興軒會計ē算日數，算先生禮hō͘--伊，斯當時先生禮用粟á代替現金，教一館大約千外斤稻穀ê價siàu。「金龍先」tāi起先教扮仙戲《三仙會》，mā教過【鬥鵪鶉】、【一江風】、【下小樓】等曲牌。另外「金龍先」mā有tī田中鎮平和里、復興里kap溪州鄉圳寮、下壩、大庄等所在教--過。

1-3. 團員名單kap專長

Thoân-oân Miâ-toaⁿ kap Choan-tióng

1-4. 老師傅蕭順良

Lāu Sai-hū Siau Sūn-liâng

蕭順良戶口名蕭木泉，是集興軒鼓吹手，伊ê吹學了有起，少年時代，kap隔壁阿鑑學pûn吹，為tio̍h練習pûn鼓吹，驚kā人吵--tio̍h，時常利用落雨天a̍h是去田--裡，khah無人ê所在練習，20歲to̍h時常hō͘人chhiàⁿ去娶新娘攤，pûn ta̍t-á（笛á）、ài-á。M̄-nā gâu pûn吹，殼á絃、jī-hiân（二絃）、tōa-kóng-hiân（大管絃）ta̍k項ē，斯當時鼓吹ín-á（引á）lóng是伊ka-tī製造。

1-5. 老師傅ê怨嘆

Lāu Sai-hū ê Oàn-thàn

老師傅蕭順良今年85歲，ùi少年時代加入集興軒子弟（團）kap金龍師學吹，已經65年歲月，伊講：「過去咱集興軒是真chhiaⁿ-iāⁿ，無論絃、吹、鼓界、鑼鈔ta̍k項有人學，對曲角色kúi-nā個，大花、小生、小旦lóng ē-hiáu，tn̄g-tio̍h年節，神明生，a̍h是娶新娘，需要siáⁿ-mih kioh-siàu，chhìn-chhái招招--leh，to̍h ē-tàng出場，子弟陣、八音、三筆鑼á，a̍h是過年pûn春、排場、唱曲，kioh-siàu夠額，lóng mā鬧熱滾滾無冷場。想kah chit-má，aih！⋯⋯」順良師想--tio̍h to̍h怨嘆，怨嘆無人繼承集興軒ê傳統。

「頂年á khai kúi-nā萬kho͘ chhiàⁿ師傅來tàu教，結果--leh，siuⁿ老--ê siuⁿ老，無閒--ê無閒，少年--ê koh無想boeh學；尾á總是招有夠額ē-tàng開班，siáng知ham-bān--ê ham-bān，chhàu-chheⁿ--ê chhàu-chheⁿ，像A-êng to̍h kan-nā ē-hiáu鑼鈔，教伊絃、吹to̍h是學bē來。Ah Chhong-bêng--ê，kan-nā講伊--幾句à，tiuⁿ--leh to̍h講無ài學，最後iáu m̄是散了了。集興軒註定ài消失--去！無奈mā無辦法。」

2. 歷史文物

Le̍k-sú Bûn-bu̍t

2-1. 崁頂集興軒舊鼓架

Khàm-téng Chi̍p-hin-ian Kū Kó͘-kè

崁頂集興軒。

正面，刻字「明治三十年」「仲秋月吉置」

坦邊刻字「民國四十八年十二月公金修」

坦邊刻字「民國七十五年五月公金重修」「發起人蕭添露」

2-2. 蕭順良設計輕省利便鼓架

Siau Sūn-liâng Siat-kè Khin-séⁿ Piān-lī Kó͘-kè

頂潭里集興軒這個鼓架是30外年前，子弟（團）當ka-ia̍h時，除了應付庄內喜喪事，koh有外埠頭來邀請，為tio̍h方便起落，蕭順良chiah設計chit座輕省便利鼓架，chit-má tī倉庫歇睏，tak鼓、小鼓（通鼓），已經破碎hâm-sau，hi-nó͘-khih鼓架猶原保持原在。

集興軒鼓架頂ê tak鼓、小鼓、kho̍k板。

2-3. 工尺譜

Kang-chhe-phó͘

上ㄨ工凡合士ㄧ六五乙。

老師傅蕭順良提供金龍師tī集興軒開館所寫八音工尺譜手抄本影像（部份）。

2-4. 老師傅蕭順良（蕭木泉）先生

Lāu Sai-hū Siau Sūn-liâng(Siau Bo̍k-choân) Sian-siⁿ

20141101蕭平治翕相

3. 武場樂器──鼓界

Bú-tiûⁿ Ga̍k-khì——Kó͘-kài

集興軒子弟（團）樂器分做武場kap文場，武場有鼓界、鑼鈔；文場有吹kap絃。以合奏為主，排場、對曲，子弟陣、八音、三筆鑼á是鬧熱陣頭。年節pûn春，做生日排場，ngiâ-chih神明，娶新娘，送亡者chiūⁿ-soaⁿ-thâu（上山頭）lóng需要集興軒子弟（團）tàu腳手。

3-1. 鼓界ê意思

Kó͘-kài ê Ì-sù

Khǹg tī鼓架頂，有tak鼓、小鼓、khiauh板、kho̍k板，是打擊樂器，子弟（團）ê鬧熱需要鼓界起動、帶動、指揮、chhōa頭。

3-2. Tak鼓

Tak-kó͘

Tak鼓mā叫做phiak鼓、阮khah慣勢講lak-tak-á，「lak-tak chhi̍h taiⁿ chhi̍h taiⁿ khoaⁿh」，to̍h是tak鼓+chhê-á+tháiⁿ鑼á+小鑼ê演奏。

Tak鼓材料採用tēng柴挖khang，外面peⁿ牛皮，tak鼓箸tio̍h用竹箸，phah--起來chiah ē響koh kiat，聲kiat to̍h-ē充滿力度精神，是子弟（團）演奏對曲ê總指揮，ē-hiáu phah tak鼓是鼓界頭手師傅。

3-3. 拍板

Phek-pán

唱曲phah節奏ê拍板，有khiauh板、kho̍k板二種，khiauh板是用二塊a̍h是三塊柴枋kǹg做夥，用一手提leh hàiⁿ振動to̍h-ē發出「khiáu khiáu khiáu khiáu」ê聲音；kho̍k板是用長方體ê tēng柴，內面挖khang，掛tī鼓架tak鼓邊--a，tio̍h用tak鼓箸phah出「kho̍k kho̍k kho̍k kho̍k」ê pán-liâu（板嘹）節奏。Ē-hiáu使用khiauh板ê tak鼓師，伊ē用khiauh板伸出ê動作來提示歌者落歌唱曲ê鑼鼓點。

3-4. 小鼓

Sió-kó͘

小鼓mā叫做通鼓，柴刻（用kho͘--ê）空殼鼓身，頂下面peⁿ皮á，音質輕快響亮「long tong long tong」真有活力，活跳ê節奏增加鬧熱氣氛，是吸引觀眾siāng重要ê樂器，ē-hiáu tak鼓師傅定tio̍h ē-hiáu phah鼓，ē-hiáu phah鼓ê師傅，無一定ē-hiáu phah tak鼓。鼓箸是圓棍型ê細支柴棍á。

3-5. 拍板

Phek-pán

拍板mā講khiauh板，khiauh-khiauh-á。

3-6. 鼓架

Kó͘-kè

鼓架tò-pêng tak鼓（lak-tak-á），正pêng小鼓（通鼓）。陣頭進行中，ē-sái-tit二人用棍á扛，tak鼓手、通鼓手沿路行沿路phah。輕力方便。（蕭順良設計）

3-7. 大鼓kap鼓箸

Tōa-kó͘ kap Kó͘-tī

子弟（團）無用tio̍h大鼓。大鼓是大鼓陣leh用--ē。大鼓聲音低koh沈，「thòng thòng thòng thòng」真大聲ē-tàng傳真遠。

4. 武場樂器——鑼鈔

Bú-tiûⁿ Ga̍k-khì——Lô-chhau

鑼鈔是武場ê打擊樂器，鑼分大鑼、小鑼kap 響盞，大鑼mā叫做tâng-cheng（銅鐘），小鑼叫做銅鑼，響盞to̍h是tháiⁿ鑼；鈔，分大鈔kap小鈔，鈔tòe鑼phah，大鈔阮講chhîm-á，小鈔講做chhê-á。鑼ê聲音雖bóng大聲，因為用柴鑼槌phah，khah-bē hiah吵，nā是chhîm-á、chhê-á是二phiáⁿ金屬sio-tùi pōng，發出聲音m̄-nā大聲koh特別吵，是製造鬧熱氣氛ê大功臣。

4-1. 大鑼kap鑼槌

Tōa-lô kap Lô-thûi

Nā用鐵phah，to̍h叫鐵鑼，音質khah無hiah súi，nā是銅質khah純，kòng--起來聲音沈koh響，to̍h叫做銅鐘，暝時排場kòng銅鐘，銅鐘聲「khōng………、khōng……」ē-tàng傳1公里外遠。大鑼鑼槌木材製造，槌頭一粒ná柿á，外面包1-têng紅布，kòng--起來khah-bē hiah ngē，tio̍h-ài kòng大鑼中心phòng--出來hit lu號做lô-châi（鑼臍）。大鑼因為大面koh重，需要鑼架，a̍h是二ê人扛。

4-2. 響盞

Hiáng-chóaⁿ

響盞mā叫做tháiⁿ鑼、tháiⁿ鑼á，用竹pêng thâi ê鑼箠，lia̍h坦橫輕輕á kòng，發出「thaiⁿ thaiⁿ thaiⁿ thaiⁿ」活潑好聽ê金屬脆聲，是北管音樂真特別樂器。

Tháiⁿ鑼倒pêng面：Tháiⁿ鑼唇頂kǹg二khang chhng紅色棉索，棉索穿一節竹管á，thang好kōaⁿ leh phah。

4-3. 小鑼

Sió-lô

形體kap銅鐘真相像，所以mā講做鐘，中心有phok 1-lu ê鑼臍，用細支柴造鑼槌kòng，發出「khong khong khong khong」音質真純好聽ê鐘聲，行進中代替銅鐘（大鑼）聲，八音「nai taiⁿ chhit taiⁿ chhit taiⁿ khōng」尾聲to̍h是小鑼聲。Kap tháiⁿ鑼kāng款需要kǹg索á用手kōaⁿ。

4-4. 大鈔

Tōa-chhau

大鈔to̍h是nâ-poa̍h（鐃鈸），大kâi--ē叫做chhîm-á，chhîm-á聲大聲、破chhè koh吵，有加強鬧熱效果。Phòng 1-lu ê所在有khang，chhng紅布條方便la̍k leh phah。

免pa̍k布條ê chhîm-á。

4-5. 小鈔

Sió-chhau

細型ê鐃鈸是sió-chhau（小鈔），慣勢講做chhê-á，金屬相kho̍k聲響亮輕快，好聽bē吵，增加鬧熱bē鑿耳。Phòng 1-lu ê所在有khang，chhng紅布條方便la̍k leh phah。

5. 文場樂器──絃

Bûn-tiûⁿ Ga̍k-khì——Hiân

Hiân是弦樂器，有殼á絃、二絃、三絃、tiàu-kúi-á（吊鬼á）kap大管絃，是八音、對曲主要樂器，用工尺譜記譜。俗語講「年吹、月phín（品）、萬世絃。」因為絃音是活--ê，是看指頭á chhi̍h線位置發聲，位置m̄-tio̍h to̍h-ē走音，音感無好ê人，to̍h lia̍h bē-tio̍h準確位置，學--起來當然真食力。其實，各種樂器學--起來lóng有伊ê特色伊ê困難所在，因為鼓吹kap phín-á（品á）有固定音ê位置，khang nā chhi̍h tio̍h，音to̍h-bē走精，hō͘人kioh是khah好學ê樂器。

5-1. 殼á絃

Khak-á-hiân

絃管師傅講thê-hiân（提絃），一般慣勢講殼á絃，是絃譜演奏ê主要樂器，負責演奏者叫做「頭手絃」。

椰子殼破pêng做音箱（共鳴箱），梧桐柴做通面，選tēng柴做絃á柄，叫做絃khiā-á，絃線用幼條鋼線（mā有用塑膠線），頂koân lak 2-khang tàu二支雞腿形ê ká-chí-á（絞止á）做調節聲音koân低，絃khiā-á ê中央用細條索á pa̍k 1-ê軟馬á chiâⁿ做基音點，軟馬á ē-sái-tit sió-khóa調節koân低位產生koân低音。內線khah粗條號做母線，聲低，外線khah幼條號做公線，聲khah koân。Chiâⁿ做弓形ê絃弓是用tēng柴枝做--ê，頭尾pa̍k馬尾（多數用塑膠絲a̍h是樹絲代替），樹絲位置chhng-tī公母線中間。

殼á絃聲音ná西洋樂器小提琴，不過諧音（Harmonics）khah無小提琴hiah-nī súi hiah-nī飽tīⁿ。

聽師傅講，絃管總共有七管半，一般khah捷用--ê有合ㄨ（sō͘ le） 、士工（lā mi）、上六（tō͘ so͘）三管。挨絃á ê方法是：Tò手chhi̍h絃á線，正手giú絃弓，內線需要用tiong-cháiⁿ（中指）kā樹絲向內chhi̍h，chiah ē挨tio̍h內線，nā是挨外線，絃弓to̍h-ài giú向外面，chiah ē挨tio̍h外線。

5-2. 殼á絃構造紹介

Khak-á-hiân Kò͘-chō Siāu-kài

Hiân-á-pèⁿ（絃á柄）：Mā有講琴柄；絃koaiⁿ；絃khiā-á。

Ká-chí（絞子）：調節公線母線聲音koân低。

Hiân-á-sòaⁿ（絃á線）：分kang-bó（公母）線，公線khah細、聲koân，母線khah粗、聲低。一般用鋼線，mā有用năi-lóng線。

Kiong（弓）：Hiân-kiong（絃弓），kiong-koaiⁿ（弓koaiⁿ）可能選he細枝長ham ê Gio̍k-san chìⁿ-tek（玉山箭竹）製造。

Kiong-á-sòaⁿ（弓á線）：Kiong-á-sòaⁿ是馬尾（毛）a̍h是瓊麻絲。

Nńg-bé-á：公母線曲調定音ê所在。

Bé（Bé-á）：Thong-bīn Khòe絃á線ê物，有ham-á殼、木材、竹片。傳統藝師有巧氣，pîn感覺kéng材料，欠缺科學研究。

Nńg-bé-á到Bé-á ê距離，to̍h是公線母線kē音到koân音ê範圍im-he̍k（音域）。

Khîm-kó͘（琴鼓）：琴鼓，用椰子殼做『音箱』產生kiōng-bêng（共鳴）。 Thong-bīn（通面）：To̍h是『面板』，用gô͘-tông（梧桐）柴聲音siāng-chán。

Siông-ka（松膠）：松膠，增加弓á線馬尾kap絃á線mô͘-chhat（摩擦）。Tio̍h用竹pêng giap松膠燒iûⁿ滴落琴鼓。

5-3. 吊鬼á

Tiàu-kúi-á

吊鬼á kap中國京戲『京胡』相像，kap殼á絃kāng款是「頭手絃」，聲音比殼á絃koh-khah koân，ká-chí-á（絞止á）kap絃弓kap殼á絃相kāng，絃khiā-á、音箱（共鳴箱）用竹材，通面peⁿ蛇皮，絃線是塑膠線。台語講做吊鬼/吊鬼á。

5-4. 二絃

Jī-hiân

二絃mā叫做jī-ô͘（二胡），絃khiā-á khah長、ká-chí-á（絞止á）、音箱（共鳴箱）khah大，lóng是柴料，絃á線用塑膠線，通面peⁿ蛇皮。因為絃khiā-á長、音箱（共鳴箱）大，聲音khah低、khah沈，是主奏樂器殼á絃、吊鬼á ê和音樂器，所以叫做和絃，和音一般講做反管。

吊kúi-á、殼á絃、二絃大細支比較。

5-5. 大管絃

Tōa-kóng-hiân

音箱是柴刻--ê，比二胡（和絃）koh-khah大，用梧桐做通面，聲音低、沈，挨反管kā殼á絃和聲真好聽，mā是一種和絃。

6. 文場樂器──吹

Bûn-tiûⁿ Ga̍k-khì——Chhoe

吹華語講『嗩吶』，按大細支分做大吹、小吹，大吹一般講做鼓吹，小吹有ài-á kap ta̍t-á（笛á），是北管子弟（團）陣頭用pûn--ê ê主要樂器。

吹ê構造是木造尺外長tōa-thâu-su̍t管身，頭細尾大，頭hit pêng套銅質pûn嘴，pûn嘴ē-tàng tàu ín-á（引á），尾hit pêng套銅質喇叭形，嘴hiàn-hiàn ê碗，管身頂面有7-khang，下面有1-khang。

Pûn吹時，嘴kâm引á（pi-pi-á），雙手按音khang，需要用thun-khùi（吞氣）ê技巧連續發聲，pûn出飽tīⁿ響亮大聲ê「鼓吹聲」。

6-1. 鼓吹、笛á、Ài-á

Kó͘-chhoe, ta̍t-á, Ài-á

吹有大吹、小吹。大吹to̍h是鼓吹，鼓吹按管ê大細、長短，koh有大中小ê無kāng，大型--ê聲低、沈、悲，適合司公、道士；小型--ê聲結、輕鬆、活跳，適合布袋戲尪á活kioh節奏；子弟（團）pûn--ê是中型鼓吹。

正pêng chit 4支lóng是中型鼓吹。

細支是ta̍t-á（笛á）：siāng-kài細支ê吹，音色súi，聲音koân koh結，真好聽。

大支是ài-á：比ta̍t-á（笛á）khah大，比鼓吹khah細，聲音koân、kiat koh大聲，感覺sió-khóa吵。

6-2. 引á

Ín-á

套tī銅質pûn嘴ê pi-pi-á叫做ín-á（引á），是用lô͘-tek（蘆竹）ê莖管做--è，chit-má mā有塑膠材料ê製品。

引á ka-tī做

Ín-á Ka-tī chò

溪溝á岸邊、濕地所在走chhōe蘆竹（lô͘-úi蘆葦），選he khah sek頭khah合鼓吹吹嘴大細ê莖管，chûi做1節1節約2公分ê長度，準備一支kap吹嘴平大ê竹箸，kā竹箸插入蘆竹管內，用細條銅線pa̍k-ân，chiah kā另外hit pêng ûn-ûn-á chhi̍h扁展開像掃帚形，試pûn聽聲khòaⁿ-māi，nā有kah意chiah koh tàu-tiàm鼓吹pûn khòaⁿ-māi。Chit種ka-tī做--ê ê引á，需要經驗，siuⁿ chíⁿ ê蘆竹真緊爛掉，而且每1-kâi引á ê調性lóng ē無kāng，所以需要1-ê 1-ê試，揀適合--ê留leh備用。

Tò-pêng 6-kâi是蘆竹做ê引á；正pêng是塑膠製引á。

6-3. 老師傅ê撇步

Lāu Sai-hū ê Phiat-pō͘

老師傅蕭順良今年85歲，伊講khah早鼓吹引á lóng是ka-tī做，chit-má雖bóng有塑膠引á thang買，1-kâi 300 kho͘，而且khah耐用，不過pûn--起來ê感覺，iáu是蘆竹引á khah好聽（音質khah súi）。

老師傅蕭順良除了紹介鼓吹引á ê製作方法以外，koh khui-phòa（開破）紹介鼓吹引á ê製作方法以外，伊koh開破二項秘訣hō͘我知：

1、Pûn鼓吹ê撇步——吞氣

Pûn Kó͘-chhoe ê Phiat-pō͘——Thun-khùi

Pûn鼓吹kap pûn lat-pah（喇叭）無kāng，pûn鼓吹，聲音bē-sái-tit斷chām，需要連sòa發聲，所以需要ná pûn ná suh-khùi『吸氣』，pûn是吐氣，suh to̍h是suh氣suh空氣，suh空氣時koh-tio̍h繼續pûn氣，鼓吹chiah ē繼續響，chit種「ná pûn ná suh氣」ê技巧to̍h是「吞氣」。

Án-chóaⁿ吞氣？師傅蕭順良án-ne教：

「嘴含鼓吹引á，pûn ê時陣m̄-thang像pûn風、pûn蠟燭火án-ne pûn，án-ne嘴內ê空氣隨消失，需要隨時suh氣chiah bē choa̍t-khùi（絕氣），án-ne to̍h bē-tàng繼續pûn。」

「Pûn吹sak氣『送氣』bē-sái-tit用pûn風，需要kā空氣儉tiàm嘴內，儉ê時陣，2-pêng嘴phé-koai-á需要激ho͘ phòng-sai-sai，嘴含鼓吹引á，利用嘴內空氣ê壓力慢慢á kā khùi pu--出-去，chiah koh利用嘴phé phòng--一-下naih--一-下輕輕á kā空氣ùi鼻khang suh--入-來。」

「Ó͘！這真困難，需要勻勻á練習，ài有耐性chiah學ē-hiáu。」

莫怪！少年時代順良--ê認真kap阿鑑學pûn吹，tăⁿ學ē-hiáu吞氣ê歡喜，kan-nā聽in ī--ā kā人講：「阮順良--ē已經kòe-khùi--à！」to̍h知影。

2、絃、吹、品Án-chóaⁿ合奏？

Hiân, Chhoe, Phín Án-chóaⁿ Ha̍p-chàu?

絃ê音是活--ê，ē-sái-tit調整音調，吹ê音khang是固定-- ê，引á ê音調koh無固定，品á ê音是固定，chit三種樂器boeh án-chóaⁿ合奏？

絃kap吹合奏khah好配，絃tòe吹調音to̍h ē-sái--tit，吹nā換引á，絃to̍h tòe-leh調音。

絃kap phín合奏，mā是絃tòe phín調音，phín nā換支，絃to̍h tòe-leh調音。

絃、吹、phín做伙合奏，絃調音無問題，吹、phín to̍h真pháiⁿ調音，che tio̍h-ài看pûn吹--ē ê功夫kap pûn phín-á ê功夫。

7. 八音組合樂器

Pat-im Cho͘-ha̍p Ga̍k-khì

Ta̍t-á（笛á）、tháiⁿ鑼á、chhîm-á（鑱á）、2支殼á絃、銅鑼、2支phín-á（品á）。

8. 三筆鑼á

Sam-pit Lô-á

小鼓（通鼓）、chhîm-á、chhê-á、銅鑼，簡單ê鑼鼓陣頭。

9. 註解

Chù-kái