第6章——作田人在地記事
2. 崁頂庄敆作師傅阿隆師

崁頂庄敆作師傅阿隆師

Khàm-téng-chng Kap-choh Sai-hū A-Liông-sai

Kap-choh，漢字寫做「敆作」，mā講ba̍k工，木匠。學kap-choh需要拜師學藝3年4個月chiah ē-tit出師，做kap-choh chit途--ê，hō͘人稱呼伊kap-choh師傅、木匠師、做木--ê。

崁頂庄是大庄頭，厝chē人chē可惜田園少，e̍h-choh（狹作）ê關係，需要有人出外趁食，a̍h是學一項工夫（技藝）thang趁錢相添，m̄-chiah庄--裡學做木--ê bē少，興永、順廷--ē、土（thô͘）養--è、阿郎á、阿友、部--ē kap國隆--ē‥‥‥。

庄--裡做木--ê大部份是學做柴頭ba̍k-koe̍h，椅桌、thàng-suh、眠床kap裝潢，kan-nā蕭國隆阿隆師學做修建廟寺ê「大木工」，阿隆師siāng-kài得意ê作品是Pang-kiô（板橋）林--家花園ê修復kap北港媽祖廟後殿ê重建，咱ùi伊ê人客間á掛--ê一塊相kheng題字，to̍h ē-tàng了解伊ê功夫kap hō͘人ê器重，「阿隆師」ê名聲heng外埠頭。

蕭國隆阿隆師：今年（2014）80歲。

『72年元月11日上午11點，師傅正為「開軒一笑亭」角科做最後修整樑架斧鑿功夫，頗得閩南傳統手法。』

1. 阿隆師ê家私頭á

A-liông-sai ê Ke-si-thâu-á

Sòa--落去to̍h來紹介蕭國隆阿隆師用--過ê家私頭á。

有人講紹介siuⁿ簡單，有人講寫了siuⁿ lo-so，講了lóng總「tio̍h」，siuⁿ簡單是因為個人bat--ê無chē，重點tī「古物á」影像收集紹介；siuⁿ lo-so是為tio̍h boeh表達「生活語言」ê話句，講話語法，盡量chhiau-chhōe端的ê台語，所以盡量口語化。

多謝ta̍k-ke回應，Lah-jih寫古物á紹介，用「相片」為主題，紹介內容以我所bat書寫，bat chē寫chē，bat少寫少，總--是Lah-jih研究無深，錯誤難免，像án-ne有人提出探討，實在有夠chán。感謝！

2. 畫線界Sûn ê家私

Ōe Sòaⁿ Kài-sûn ê Ke-si

2-1. 墨斗

Ba̍k-táu

木工畫直sûn ê家私。

墨斗ê形體是án-ne，1-pêng是ē tńg ê輪á，纏1條細條棉紗索á，索á頭固定tī輪心，另外hit頭穿過貯棉花浸烏墨ê槽hit pêng，thàng出墨斗外，pa̍k tī一支尖鑽。

使用時，師傅提墨斗，師á工提hit支尖鑽拖到師傅指定ê所在，雙方按tiàm木材柴枋ê二ê定點，師傅ùi線中央所在用大pû-ong kap kí-cháiⁿ輕輕liàm-khí，然後「phia̍k」--一下，kō烏墨汁ê棉紗線to̍h ē tiàm木材頂留一條烏sûn。

2-2.角尺／屈尺

Kak-chhioh/Khut-chhioh

角尺，服裝界ê角尺是柴--ê，做木ê角尺是金屬白鐵á『不銹鋼』，是量屈角（直角）kap畫直角sûn做記號ê家私。木工師傅mā kā角尺叫做khut-chhioh（屈尺）。

2-3. 範á

Pān-á

寫水筆字看字帖『範本』學寫名家字體，裁剪衫褲先用白紙鉸「紙樣」，做石膏像需要有「模á」，nā是木工boeh鋸一個直角a̍h是boeh lia̍h一個直角，ē-sái-tit使用角尺，nā是無tú好是直角，親像相kheng sio-kap所在是45度，án-ne木工師傅to̍h ē事先用一塊枋á量好角度做一個pān-á，需要to̍h提來畫sûn，然後施工，省去lia̍h角度真chē時間，koh ē-tàng真精密準確，chit種「pān-á」是師傅ka-tī做--ê。

3. 鋸柴ê家私

Kì-chhâ ê Ke-si

3-1. 鋸kap鋸á

Kì kap Kì-á

「鋸」是動詞是動作，「鋸á」是名詞是家私，大kho͘木材需要破pêng鋸做1-chat 1-chat，需要鋸á鋸、機器liâu，做木--ê是kā鋸斷裁好ê角材、柴枋，使用鋸á鋸khah合用ê寸尺了後，ē-tàng進行鑿、khau、釘ê組合。鋸á齒有鋸橫絲、直絲ê差別，鋸齒nā tun（鈍），tio̍h-ài用kì-lē khioh，khioh鋸á齒需要師傅，有ê kap-choh師傅ka-tī mā ē-hiáu。

3-2. 傳統鋸á

Thoân-thóng Kì-á

Chit種傳統鋸á，鋸枋『鋸片』chhoa̍h-chhoa̍h，需要lia̍h一個角度鋸，kap-choh師傅chiâⁿ捷使用。厝內有一支chit種鋸á，鋸柴枝、鋸竹管lóng真方便。

3-3. 手鋸á

Chhiú-kì-á

Ē-tàng收合，安全方便。紅色螺絲是固定用--ê。

3-4. 鋸鑢

Kì-lē

鋸鑢to̍h是『銼刀』，木工界ê鋸鑢是用來khioh鋸á齒用，mā用來磨金屬thóng--chhut-lâi部份。

4. Si-á-geh ê家私

Si-á-geh ê Ke-si

4-1. Khau kap Khau刀

Khau kap Khau-to

Khau是動詞是動作，khau-á是名詞是家私，瓜khau-á khau瓜á，「瓜khau-á」是『刨刀』；khau刀khau柴，「khau刀」是『鉋刀』，khau是『鉋』。

Khau刀種類非常多樣，大細支無kāng，粗khau幼khau無kāng，khau平khau深khau phòng khau lap無kāng，boeh有好作品，需要好工夫，koh-khah需要好家私，『工欲善其事，必先利其器』，kap-choh師傅「khau」ê功夫m̄是kan-nā 3年4個月to̍h ē-tàng hō͘人尊稱「sai--ê」。

調整khau刀刀肉ê方法：Boeh chhiâu刀肉食深食淺，a̍h是boeh koân-kē-pêng，khau刀雙頭6個點ē-tàng khà出隨人ê需要。一頭入（深），一頭退（淺）；中點，平均；雙邊，調chhoa̍h（斜）角。

4-2. 長Khau Khau刀

Tn̂g-khau Khau-to

這支是常用長khau khau刀，主要是kā長ê角材khau ho͘平，是粗khau，需要tàu khau刀柄用雙手hē力直sak，tio̍h-ài出力，khau掉ê khau刀lian-á khah粗phòe，khau刀柄是活動--ê。應用「斜面原理」ê省力工具。Che是khau刀ê下面，柴面金滑，刀肉thóng出，ē-tàng調整長短，ē-sái-tit深khau，ē-sái-tit薄khau。

Che是khau刀頂面，au槽所在有二塊鐵á，thóng出半圓形ê是刀肉，另外hit塊是khau刀chiⁿ-á，刀肉ē-tàng調整thóng出長短，chiⁿ-á是固定刀肉kap khà出刀肉，khau刀boeh lāi需要刀石磨。

看khah清楚--leh，khau刀肉kap khau刀chiⁿ-á。Chiⁿ，chiⁿ ho͘ ân-ân，hō͘刀肉bē振bē動。Chiⁿ nā khà lēng，刀肉to̍h ē-tàng chhiâu振動a̍h是pak起來磨利。

4-3. 平Khau Khau刀

Pêⁿ-khau Khau-to

平khau ê khau刀大細支有精差，作用有相kāng mā有無相kāng，大支tàu柄雙手用力khau，ē-tàng粗khau mā ē-tàng薄khau。大支khau大面，細支khau細面，細支khau刀、短tauh khau刀ē-tàng幼khau、si-á-geh用孤枝手方便處理。

5. 特殊Khau刀

Te̍k-sû Khau-to

木材造作，長方形平面用平面khau刀，ē-tàng khau kah有mê有角。Nā是tn̄g-tio̍h窗á門道thoah橋，a̍h是半圓形lap-chô（凹槽），phok龜形ê橫樑、椅koaiⁿ⋯hiah-ê為tio̍h美觀需要，phòng--一-下naih--一下展現曲線美感，to̍h需要特別形體ê khau刀，chiah有法度完成。

5-1. Khau-á

這支叫做khau-á，ē-tàng輕輕á khau，薄薄á修，是si-á-geh專用。

5-2. 斜嘴Khau刀

Chhoa̍h-chhùi Khau-to

這支刀嘴chhoa̍h-chhoa̍h，koh有一支柴liau ē-tàng定位無kāng所在，大概是tn̄g-tio̍h有lap--落-去ê溝槽使用--ê？

5-3. 半圓剾刀

Pòaⁿ-îⁿ Khau-to

這支是khau半圓形lap槽用--ê。

5-4. 其他特別用途khau刀

特殊khau刀形體真chē，功能無kāng，需要師傅人chiah有才調紹介用法，tī chia ê相片lóng是蕭國隆阿隆師用--過ê家私。

6. 刀石

To-chio̍h

磨刀用，chit款刀石是經過製造ê商品，有分粗幼。古早人ē去khioh he khah軟khah粗ê砂岩『沈積岩』轉來做刀石á，ē-tàng ka-tī磨菜刀、柴刀kap細支削東削西ê刀á。磨刀是一項功夫，重要高級ê家私需要hō͘磨刀師傅磨。

7. 鑿Khang ê家私

Chha̍k-khang ê Ke-si

7-1. 鑿kap鑿á

Chha̍k kap Chha̍k-á

鑿是動詞，是動作；鑿á是名詞，是家私。鑿á是應用「chhiâ-bīn（斜面）séⁿ-la̍t（省力）ê物理作用」ê鑿柴家私，有平鑿有圓鑿，種類chē用途chē，ē-tàng鑿khang mā ē-tàng修整。平鑿鑿四角khang做榫khang，圓鑿是半圓形，鑿圓形榫khang。

7-2. 平鑿á

Pêⁿ-chha̍k-á

有大細支，鑿柄有kho͘鐵kho͘-á，用kòng槌á khà，mā ē-tàng用手thuh。是木工真重要捷用ê家私。

7-3. Thuh-á

修整溝槽細khang所在，用手直接thuh，mā ē-tàng用kòng槌á輕輕á khà。

8. 釘、摃ê家私

Tèng, Kòng ê Ke-si

8-1. 摃槌á

Kòng-thûi-á

Tèng釘á，kòng榫頭入榫khang，需要大細無kāng ê kòng槌á。

8-2. 尖頭摃槌á

Chiam-thâu Kòng-thûi-á

Chit種kòng槌á，1-pêng ē-tàng tèng釘á，釘á鼻nā tèng了無夠平，koh驚伊傷tio̍h木材表面，to̍h用另外hit pêng kā釘á鼻，輕輕á khà ho͘ khah深入。

8-3. 雙頭摃槌á

Siang-thâu Kòng-thûi-á

這支kòng槌á khah重khah tìm-táu，kòng--起來khah有力，kòng大支鐵釘a̍h是kòng鋼釘入磚á壁、紅毛土壁khah輕力好用。Mā ē-tàng kā做了無理想ê部份khà掉a̍h是破害。

9. 釘á袋

Teng-á-tē

釘á袋，phāiⁿ tī尻川頭，方便取用，內面主要貯釘á類幼粒物，kap常用細支家私，lo͘-lài-bah（螺絲絞á），ngeh-á、鑽á。

9-1. 釘拔á

Teng-poe̍h-á

Teng-poe̍h-á（釘拔á），有人講bá-luh，bah-luh-á。大支釘á tèng無好勢、m̄-tio̍h位，需要poe̍h掉，用釘poe̍h-á省力快速。另外hit頭ē-tàng做kòng槌á。

9-2. 夾á

Ngeh-á

Mā chin chia̍p講phiàn-chih，chit種ngeh-á厝內chhoân--一支，真方便真實用。

Ngeh-á是應用kiāu-á原理『槓桿原理』+斜面省力原理ê家私。Ngeh-á嘴有幼齒溝槽，giap鐵釘、鉛線、柴phòe竹phòe，giap真ân，ē-tàng giap--leh絞鉛線giú kha̍h-tiâu ê物；倚支點所在是斜面鉸刀，鉸鉛線、細支鐵釘真lāi真利便；mā ē-tàng做teng-poe̍h-á（釘拔á）、做kòng槌á用。

10. La̍k空鎖螺絲ê家私

La̍k-khang Só Lô͘-si ê Ke-si

10-1. Lak-soān

Lak-soān，chit-mái講lak鑽，鑽khang ê家私，鑽頭ē-sái-tit換，一手用手蹄á tah-tiàm半圓形這頭做車心，一手la̍k-tiàm中央hit支柄轉se̍h，to̍h ē kā木材lak圓khang。

10-2. 鑽頭

Chǹg-thâu

螺絲形鑽頭，應用斜面省力原理ê家私。

11. 螺絲、螺絲絞á、十扳á

Lô͘-si, Lō͘-si Ká-á, Si̍p-pán-á

Lô͘-si（螺絲）Lô͘-si-kang（螺絲公）Lô͘-si-bó（螺絲母）Lê-kang（螺公）Lê-bó（螺母）Lô͘-si ká-á（螺絲絞á）、Si̍p-pán-á to̍h是華語『螺絲、公螺絲、母螺絲、螺絲起子、扳手』。

11-1. 螺絲

Lô͘-si

螺絲分公母，號做Lô͘-si-kang（螺絲公）、Lô͘-si-bó（螺絲母），a̍h是講Lê-kang（螺公）、Lê-bó（螺母），有大細支大細粒。細粒螺絲公有時無螺絲母，to̍h是螺絲釘，螺絲公螺絲釘伊ê螺絲頭有- +形溝槽，ē-tàng用螺絲絞á chūn-ân絞lēng，a̍h是直接釘入；nā是大粒螺絲to̍h用si̍p-pán-á絞，是螺公、螺母絞ân用ê家私。螺絲絞á khah捷聽人講「lo͘-lài-bah」。

11-2. 螺絲絞á

Lô͘-si Ká-á

11-3. 十扳á

Si̍p-pán-á

Chit支十扳á是活動--ê，ē-tàng調整闊狹，適合無kāng寸尺ê螺公螺母。絞螺絲母ê家私號做si̍p-pán-á，poa̍h-kiáu ê骰á是十八á（si̍p-pat-á），m̄-thang講m̄-tio̍h--去--ō͘。

12. 註解

Chù-kái