《Tâi-oân chiáu-á liām koa-si》

台灣鳥á唸歌詩

Lahjih（蕭平治）

Tâi-oân chiáu-á liām koa-si, chho͘ siaⁿ iù-jī chin chhù-bī, tōa-chiah sè-chiah lóng kah-ì, hō͘-siang him-siúⁿ kài hoaⁿ-hí.

（台灣鳥á唸歌詩，粗聲iù-jī真趣味，大隻細隻lóng kah意，互相欣賞kài歡喜。）

Tâi-oân chiáu-á chū-iû poe, poe koân poe kē thâu lê-lê, lán-ê thó͘-tē sui-bóng e̍h, bu̍t-sán hong-hù ū-kàu chē.

（台灣鳥á自由飛，飛kôan飛kē頭lê-lê，咱ê土地雖bóng e̍h，物產豐富有夠chē。）

Tâi-oân chiáu-á phū-phū-poe, Tâi-oân khak-si̍t lán thó͘-tē, ū soaⁿ ū chúi ū pûi-té, Formosa chiok bí-lē.

（台灣鳥á phū-phū飛，台灣確實咱土地，有山有水有肥底，Formosa chiok美麗。）

Tâi-oân chiáu-á leh kóng-ōe, bí-lē pò-tó chū-iû tē, lán nā phah-piàⁿ kut-la̍t chòe, bîn-chú chū-iû sī lán ê.

（台灣鳥á leh講話，美麗寶島自由地，咱nā phah-piàⁿ kut-la̍t做，民主自由是咱ê。）

Tâi-oân chiáu-á poe koân-koân, him-sióng bí-lē lán Tâi-oân, kau-thong kho-ki kiàn-siat chē, tâi-chek cheng-phìⁿ tē-it chán.

（台灣鳥á飛kôan-kôan，欣賞美麗咱台灣，交通科技建設chē，台積晶片第一讚。）

Tâi-oân chiáu-á poe kē-kē, phīⁿ-tio̍h chheng-phang o͘-liông-tê, iáu-ū kóe-chí kap hoan-be̍h, hó-chia̍h mi̍h-kiāⁿ móa-sì-kè.

（台灣鳥á飛低低，鼻tio̍h清芳烏龍茶，iáu有果子kap番麥，好食物件滿四界。）

Tâi-oân chiáu-á chéng-lūi chē, ū ê lâi chia chò-lâng-kheh, ū ê it-seng tiàm chāi-tē, ū-iân hoaⁿ-hí tòa chò-hóe.

（台灣鳥á種類chē，有ê來chia做人客，有ê一生tiàm在地，有緣歡喜tòa做夥。）

Tâi-oân chiáu-á pah-pah khoán, it-sim it-ì ài Tâi-oân, ka-tī chò-chú sè thn̂g sè, bô-ài gōa-lâng kā lán koán.

（台灣鳥á百百款，一心一意愛台灣，ka-tī做主世傳世，無ài外人kā咱管。）

Tâi-oân chiáu-á chin chū-iû, lo̍k-koan hùn-tàu bô iu-chhiû, khòaⁿ-lâng ba̍k-sek bīn-iu-iu, boeh ū chun-giâm ka-tī kiû.

（台灣鳥á真自由，樂觀奮鬥無憂愁，看人目色面憂憂，boeh有尊嚴ka-tī求。）

Tâi-oân chiáu-á chin chū-chāi, tang sai lâm pak lóng poe lâi, Formosa hó-só͘-chāi, chia̍h chhēng hiáng-siū chiok phang-phài.

（台灣鳥á真自在，東西南北lóng飛來，Formosa好所在，食穿享受chiok phang-phài。）

Tâi-oân chiáu-á poe tín-tāng, hiáng-siū chū-iû kài khin-sang, khîn-khiām kut-la̍t chiàu-khí-kang, chiân-tô͘ kng-bêng ū ǹg-bāng.

（台灣鳥á飛振動，享受自由kài輕鬆，勤儉kut-la̍t照khí-kang，前途光明有ǹg望。）

Tâi-oân chiáu-á chū-iû poe, Tâi-oân chó͘-kok sī lán-ê, ka-tī koat-tēng lán it-chhè, gōa-lâng bē-sái ke-kóng-ōe.

（台灣鳥á自由飛，台灣祖國是咱ê ，ka-tī己決定咱一切，外人bē-sái ke講話。）

Tâi-oân chiáu-á ài Tâi-oân, chhiong-móa chū-sìn tiōng jîn-koân, hō͘-siang chun-tiōng lí góa lán, chun-siú hoat-lu̍t thâu chi̍t-chân.

（台灣鳥á愛台灣，充滿自信重人權，互相尊重你我咱，遵守法律頭一層。）

Tâi-oân chiáu-á siaⁿ-im súi, khin-khoài chiat-chàu ná gîm-si, Goân-bîn Hakka Hō͘-ló-ōe, to gí bûn-hòa tak-chhùi-chi̍h.

（台灣鳥á聲音súi，輕快節奏ná吟詩，原民Hakfa Hō-ló話，多語文化tak嘴舌。）