48. Bûn-chiáu Kho『文鳥科』

48-1. Chhek-chiáu-á（粟鳥á）

Chhek-chiáu-á，tī台灣除了高山、森林以外，平洋所在有人tòa、有火燻，to̍h有伊ê蹤跡。通常做siū tī城市、田庄所在人家厝ê竹管縫、瓦縫內，kap人tòa做夥，是典型kap人共居ê鳥類，所以hō͘人號做厝鳥á。

田庄稻á收成前後，ē siâⁿ來kui百kui千hèng食粟ê chhek-chiáu-á來討食，m̄-nā tī田裡食粟á，mā tī門口埕、曝粟埕偷食五穀，對作田人來講，損斷siong-tiōng，hō͘人頭痛，趕鳥á soah chiâⁿ做gín-á人ê khang-khòe，m̄-chiah hō͘作田人號做粟鳥á。

生活tī都市ê野生動物，tùi環保貢獻siāng大--ê to̍h是chhek-chiáu-á，in一年thàng天kap人tòa做夥，lia̍h食咱生活環境ê各種害蟲，ka-cho̍ah、蜘蛛、胡蠅…，a̍h是屍體ê蟲，真正替咱解決真chē問題。

Chhek-chiáu-á鳥毛色水是深淺咖啡色為主，chhap一寡烏色kap白色，無夠豔麗，m̄-koh翼股毛hām尾溜，深淺咖啡色khong白色邊緣，ná看ná有氣質。

Chhek-chiáu-á雜錯食，為tio̍h boeh tok開種籽ê tēng殼，嘴pe演化成短koh大ê尖鑽á形，tok粟á chiâⁿ方便liú-lia̍h。

Chhek-chiáu-á行路kō͘跳--ê chhia̍k-chhia̍k-tiô，háu聲「chiuh chiuh chhiak chhiak chhiak」，感覺chiâⁿ親切。

【Tâi-oân Chiáu-á Liām Koa-si】

Chhek-chiáu-á Ài Chia̍h-chhek

Chiú chiú chiú, che sī goán chhek-chiáu-á ê kiò-siaⁿ

Kui-tīn kúi-nā-pah chiah, poe-lâi lín chhân-hn̂g

Khòaⁿ-kìⁿ chhek-á í-keng sek koh n̂g

Boeh kā lín pun chi̍t-sut-á tō͘ saⁿ-tǹg

Pài-thok m̄-thang kā goán lia̍h

Chiú chiú chiú, gún boeh chia̍h chhek m̄ chia̍h chiú

【註解】