45. Ong Kho『鶲科』

45-2. Ní-pò͘-chiáu（染布鳥）

Ní-pò͘-chiáu ê chiáu-kak，kui身軀ê鳥毛ná浸tio̍h藍色ê染料kāng-khoán，特別頭殼部份是chheⁿ-phiàng-phiàng ê khóng-sek，所以chiah hō͘人號做ní-pò͘-chiáu。

Ní-pò͘-chiáu ê chiáu-kak，頭殼khóng-sek，頭殼心一chhok烏色、ām-kún一sûn烏sûn，鼻á一chhok小小鼻khang毛，ba̍k-chiu-jîn烏金烏金，實在有夠古錐。不過鳥母to̍h無hiah影目。

Ní-pò͘-chiáu是台灣特有亞種，普遍分布tī低海拔ê山區kap山崙地帶，歇tī雜木林、果子á林a̍h是竹模內，生性活動，飛行快速，歇tī樹枝頂等待發現飛蟲，隨時起飛lia̍h食，時常kap其他鳥類做夥活動，雖然公母成對保護ka-tī ê勢力範圍，m̄-koh對無kāng類ê細隻鳥á並無排斥。

Ní-pò͘-chiáu sui-bóng是普遍ê在地鳥，m̄-koh數量無chē，咬草枝、樹葉、纖維、蜘蛛絲做深底甌á形ê siū，chiâⁿ súi chiâⁿ sù-sī。「Kiăp kiăp kiăp kiăp」帶chi̍t-sut-á鉸刀（scissors）聲。

【Tâi-oân Chiáu-á Liām Koa-si】

Ní-pò͘-chiáu Hó-sim Ū Hó-pò

Chheⁿ-phiàng-phiàng ê sin-khu

Thiaⁿ kóng sī in-ūi hó-sim kā lâng tàu-kha-chhiú

Khì ní-tio̍h chhíⁿ-sek ê ní-liāu

Chiah pìⁿ-chiâⁿ chit-khoán bô͘-iūⁿ

Hó-sim ū hó-pò, chit-chióng táⁿ-pān ū-iáⁿ súi

It-tēng bô-lâng ē-tàng kap lí pí-phēng

染布鳥ê故事

過去藍色ê染料是用藍草ê汁製造，是真原始ê染布法。 古早古早，染布鳥ê祖先，kui大陣lóng tòa-tī一ê山坪ê藍草園，ta̍k日為chit phiàn ê藍草園leh lia̍h蟲，thang hō͘ ē-tàng製造染料ê藍草有好收成，日子過tio̍h不止á安樂、幸福，ta̍k日都歡歡喜喜。染布間ê頭家，也to̍h是藍草園ê主人，伊ê生理做kah非常大，非常成功，所以對chia ê鳥á mā照顧kah chiâⁿ用心。

M̄-koh「天boeh變，一時間」，有一工，染布間ê師傅，一下無張持soah來受重傷，無法度做khang-khòe，不得已，染布間soah tio̍h歇睏停工。Chai-iáⁿ chit-ê pháiⁿ消息ê鳥á群，為tio̍h boeh報答藍草園主人ê恩情，to̍h動員in ê鳥á族群ê鳥kak，來kā主人tàu腳手，隨ê認真phah-piàⁿ學染布ê功夫，因為學了siuⁿ過pōng，學了siuⁿ認真，soah kā in ê身軀bak kah chheⁿ-phiàng-phiàng，kui身軀lóng是藍色ê染料。

Thèng-hāu染布間回復正常khang-khòe了後，chia ê勇敢報恩ê染布鳥，chiah想boeh kā身軀頂ê色料洗掉，siáⁿ知sian洗都洗bē-lut，自án-ne染布鳥ê後代，一直到taⁿ lóng是kap in ê祖先染布師傅kāng-khoán，尤其是鳥kak ê羽毛，lóng是清一色chheⁿ-phiàng-phiàng ê藍色。

【註解】