台灣俗語台灣寶

台灣俗語原來是台灣民間一般世俗人講ê話句。Chia ê話句因為意思好，語詞súi，人人傳teh講。經過時間ê考驗、磨練、結晶，成做咱所講ê「俗語」，代代流傳落來。一般講--來，「俗語」是用精鍊ê語詞，講出1 ê複雜但是真有意義ê觀察或者結論。每1句俗語內面攏有2項寶貴ê物件：第一是人生世事ê智慧，第二是台灣語言ê藝術。比喻講「人比人，氣死人。」簡單6字，講出1 ê複雜--ê普遍--ê台灣社會心態。Chit 6字意思簡捷明瞭，聲韻優美，講--出-來嘴順閣心適，真有說服力量。按chit句話，咱不但會當知影台灣人社會ê某種心態，而且嘛體驗著台灣話優美ê藝術性。台灣俗語是台灣人社會族群自古早累積落來ê生活智慧kap語言藝術，伊kap民間口傳ê詩歌、故事、戲劇仝款、是台灣民間文學1 ê重要ê部分。

為著beh hō͘讀者會當真容易瞭解每1句俗語內底深在ê意思，蕭老師tī每1句俗語下面，用咱日常生活所遇著ê狀況做例，用淺白、口語化ê台文來說明，hō͘讀者讀--起-來，親像是teh讀一ê社會學ê故事；不但真容易了解chit句俗語內在ê意思，伊所適用ê場合，而且閣會當學實用、明白漢羅合寫ê台語文。

《台灣俗語鹹酸甜》本來收集tī「台灣文學研究工作室」ê電子網站。經過蕭老師辛苦編寫、整理，tī 1999年第一冊出版，馬上得著大家ê肯定。真濟台文教室用chit本冊做台文教學ê教材。Chit-má chit-ê收集、整理、編寫ê工作iah繼續teh進行，會使講是近來整理台灣俗語方面上蓋大、上蓋成功ê工程。《台灣俗語鹹酸甜》到taⁿ已經收集幾若百chhiám ê台灣俗語、遮ê大數量ê俗語beh如何來kā伊做index（索引），hō͘讀者、使用者會當真容易來chhōe出所需要ê某1句俗語，che應該是1 ê ài考慮ê工作。

經過半世紀錯誤ê「華語獨尊」語言政策，咱ê母語tī台灣變做非常弱勢n̂g-sng ê語言，面對語言滅亡ê危機。最近幾年來，「搶救母語」ê工作漸漸受著大家ê注重，但是咱ê母語ê危機iah真大，搶救ê工作tú-chiah開始。鄭良偉教授tī「演變中ê台灣社會語文」chit本冊內面，關於弱勢語言ê回復有1 ê真有意義ê分析。根據鄭教授ê觀察，世界各弱勢語言ê回復，一般ài經過5 ê漸進ê階段：第一階段是民間口述文學ê紀錄，第二階段是詩歌ê創造，第三階段是散文試寫，第四是文學普及，第五是語言ê正規教育。蕭老師ê《台灣俗語鹹酸甜》就是整理、記錄民間口述文學1 ê最好ê實例。

蕭老師奉獻母語運動kap母語教育，10年無停。按初教台語文到設立台文電子網站，按「試寫」散文〈阿爸ê鹿角煙吹〉到編寫《台灣俗語鹹酸甜》，攏總徛tī母語教育頭前第一線，流汗貢獻。感謝蕭老師，恭喜蕭老師。

陳雷 2001年tī 加拿大