〈070〉

甘願挨一石米、m̄願chhōa gín-á-phí

Kam-goān e chi̍t-chio̍h bí, m̄ goān chhōa gín-á-phí

Chhōa gín-á是一種藝術，是一種涵養，有責任，mā有向望。

Gín-á本性to̍h是愛tín動，無時閒是伊學習ê過程，chhōa tio̍h活潑ê gín-á hō͘人心頭chiâu溫暖，不過伊ê chok-gia̍t、狡怪、chiān東chiān西，ē hō͘你煩kah氣死人。一目nih-á boeh放尿，一目nih-á boeh放屎，m̄是háu腹肚iau，to̍h是吵boeh『抱抱』，一下無張持，poa̍h kah大khang細裂，又koh tio̍h走病院，雖然有歡喜，hō͘人感覺lo-lí-lo-thi，疲勞kah giōng-boeh死，比用土礱挨一石米khah thiám，莫怪俗語講：「甘願挨一石米、m̄願chhōa gín-á-phí」，這是講chhōa tú ē行路ê細漢gín-á。

Gín-á-phí pháiⁿchhōa，做過爸母--ê經驗siāng深，m̄是屎to̍h是尿，這iáu無hō͘ in煩惱，siāng-kài hō͘爸母操煩m̄甘--ê to̍h是身苦病疼，發燒、咳嗽，落屎、腸á炎，poa̍h落去chiâⁿ khang，暗時á haiⁿ-haiⁿ chhan，ùi嬰á開始到boeh讀冊為止，m̄知tio̍h忍受lōa-chē苦楚緊張，為kiáⁿ勞苦為kiáⁿ磨，目的kan-nā boeh hō͘ kiáⁿ快活，做人kiáⁿ-jî tio̍h有孝，了解爸母ê心肝，chhōa咱chi̍t-ê gín-á-phí，kám chiah挨一石米ê體力付出ē得比，精神上ê愛心tī tó位，爸母ê恩情咱tio̍h m̄-thang放bē記。

「甘願挨一石米、m̄願chhōa gín-á-phí」，意思雖然只是講chhōa gín-á ē hō͘ gín-á chak ê無奈niā-niā，咱mā應該ài ùi chit句俗語，來檢討ka-tī ê孝心有夠a̍h無。

【註解】