〈037〉

暗昏無叔孫，天光排字ûn

Àm-hng bô chek-sun, thiⁿ-kng pâi jī-ûn

Siau Lah-jih厝tòa Chhân-tiong-ng崁頂庄，漢姓姓蕭，蕭姓祖廟to̍h tī阮庄內，過去kui庄差不多lóng是姓蕭ê叔孫，外姓ê庄眾mā lóng有親chiâⁿ關係，m̄是hō͘阮姓蕭--ê招，to̍h是hō͘人抱來io--ê。所以自早崁頂庄ê人to̍h真和，真團結，古早有一句無kài-gōa好聽ê話，講「賊á崁頂人」，是ùi賊á khah猛人ka彎話--ê，話是無好聽，卻是o-ló khah chē，su-tong-sî外圍á人nā聽tio̍h崁頂人，to̍h m̄敢ka欺負。

另外iáu有好家教，叔孫弟兄lóng àn輩分稱呼，真有大細，che可能kap漢文化有關係，論輩無論歲，到kah chit-mái雖然人情世事khah淡過第六泡茶，khah chiáⁿ過酒尾，m̄-kú Siau Lah-jih nā是轉去崁頂庄，少年--ê招呼一聲蕭老師，有歲--ê khah照古例--ê，m̄是叫Lah-jih叔，to̍h是叔公、叔爺teh稱呼，因為論輩分，小弟有khah佔koân，ban房出叔公有影無錯，看族譜，ùi唐山過台灣到taⁿ，(註：kap平埔祖媽無關係)，本人是ban-kiáⁿ，老爸mā是排落尾，可是ban房mā出衰微，蕭姓宗親好額人，輩分boeh比Siau Lah-jih khah koân--ê可能真少，che to̍h是漢文化封建思想ê遺毒，大孫phâng斗--ê財產mā boeh加一份，án-ne大房ê財產tio̍h分兩份，大房nā是khah奸巧，細房--ê當然to̍h去了了，che是閒話，m̄是Siau Lah-jih teh kheng-hun，只是表明漢文化m̄是hiah-nī偉大。

用招--ê ê風俗tio̍h可能kap平埔祖媽有關聯。細漢時to̍h bat聽講平埔番á siāng愛kap漢人做親chiâⁿ，漢人應該m̄是真漢人，是hō-ló人chiah tio̍h，平埔番á mā m̄是番，是比唐山過台灣ê hō-ló人koh khah早tī chia khiā起ê平埔族，「有唐山公無唐山媽」，án-ne咱ê祖媽是誰？別人，Siau Lah-jih m̄敢烏白講，Siau Lah-jih ê祖媽可能有平埔族血統，細漢io、a̍h是用招--ê，阮tau lóng bat發生。

講tio̍h血統，soah bē記得本題，「暗昏無叔孫，天光排字ûn」，究竟是siáⁿ意思？論輩無論歲，mā tio̍h知影你是siáⁿ-mih人，án-chóaⁿ論，kám m̄是？天黃昏，無khòaiⁿ人面，tn̄g tio̍h你，boeh án-chóaⁿ kap你稱呼chiah是？人都看bē清，稱呼to̍h無法度正經，請諒解，nā boeh論大細，叫你名a̍h是叫你阿伯，叔公、嬸婆lóng總好，mā tio̍h趁天光chiah來論，「暗昏無叔孫，天光排字ûn」，che是一說，khah正經無議論。

另外一說to̍h真iáu-siū，無好看樣，是teh『警惕』thàn食cha-bó͘，bih tī暗bîn-bong ê所在，為tio̍h生活做tio̍h見笑tāi，ná管伊是tó位來，熟似無熟似，有錢thàn to̍h是應該。有一工，一位茶店á cha-bó͘生理做了boeh送人客，hit位cha-bó͘ gín-á姊án-ne kap人客講bái-bāi： 「老師！Chit-pái我招待，後-pái chiah koh來！」害hit-ê老師越頭ka看māi，iáu-siū，iáu-siū，án-ne boeh thài ē-sái。見笑tāi，起腳piàⁿ命走，後-pái m̄敢去hit-ê所在。

【註解】