〈073〉

Súi bái無比止，kah意khah慘死

Súi bái bô-pí-chí, kah-ì khah chhám sí

提起阮hit-ê學生kó͘-chui--e ê婚姻，hō͘人心內感慨，chiah-nī khiáu-khì ê cha-bó͘ gín-á，讀kah大學畢業，偏偏來選擇chi̍t-ê中等學校程度ê勞工朋友，生做koh m̄是gōa ian-tâu，婚姻ê結合hō͘人想bē到。「Súi bái無比止，kah意khah慘死」，實在無m̄ tio̍h，Siau Lah-jih ē為伊怨嘆一蕊好花插tī牛屎頂，是個人ê私心，無值得存有chit款ê觀念chiah tio̍h。

愛情ê力量，實在驚死人，隔壁庄hit-ê鄧--先-生in cha-bó͘-kiáⁿ，最近chiah起反形，愛tio̍h chi̍t-ê liù-sui-á，無管in兄弟姊妹苦勸，爸母反對，phiâⁿ-phiâⁿ kap hit-ê無頭路，四界流浪lōng-liú-lian ê cha-po͘朋友去公證結婚，無嫁妝無要緊，hō͘人kí-kí指指bē pháiⁿ勢，甚至老爸boeh kap伊切斷爸kiáⁿ關係，伊mā無後悔，頭oat--leh一去無回。

實在有夠戇，明明chi̍t-ê無業游民，koh有chiâⁿ chē pháiⁿ té-tì，kám講真正有影「súi bái無比止，kah意khah慘死」，愛to̍h愛kah án-ne生？Chit層糊塗事，根據Siau Lah-jih所瞭解，原因有兩點：

第一點，人講pháiⁿ gín-á厚nôa-thâu，嘴水siāng厲害，gâu o-ló、ē sai-nai，雖然臭腹內，m̄-kú好詼諧，話山話水從án-ne hō͘伊話話--去，chit款情形社會上真chē，阿哥--ā，烏道--ê，in ê chhit-á lóng mā súi-tang-tang。第二點，in老爸鄧--先-生ê教育方式，mā ài檢討，a̍h m̄-bat kap gín-á溝通，gín-á ê好表現bē ka o-ló，nā有chi̍t-sut-á無kah意，to̍h lak kap soān，koh是cha-bó͘-kiáⁿ，cháiⁿ-thang án-ne嚷，gín-á ê自尊khǹg tiàm toh，lóng無ka考慮，莫怪liù-sui-á牽leh溜溜去，taⁿ koh罵koh chhoh mā bô-chhái工，指望in少年--ê ē-hiáu想，有一日ē轉來身邊。

「Súi bái無比止，kah意khah慘死」，chit款chiah-nī熱烈ê愛情戲，自古至今m̄知發生lōa chē齣，有戇tuh-tuh ê演出，尾á無人知影伊ê鬱卒，mā有向傳統挑戰ê愛情革命，感動kah趁人bē少目屎，有ê悲劇結束，有ê hō͘人phah pho̍k-á完成in ê願望。

願天下間，有愛情ê青少年，lóng有正確ê愛情觀，mā lóng得tio̍h美夢。

【註解】