〈146〉

孤支釘，phah無鐵

Ko͘ ki teng, phah bô thih

阿才嬸，恁新婦kám無boeh koh生？Kan-nā chi̍t-ê cha-po͘--ê siuⁿ少--lah！

A̍h知？咱kā後生講，cha-po͘--ê chi̍t-ê siuⁿ少，人伊講雖然chi̍t-ê後生，m̄-kú iáu koh有saⁿ-ê cha-bó͘-kiáⁿ，已經siuⁿ chē，飼人bē贏，m̄敢koh生--a--lah！

講kah chit-mái ê少年人，飼kiáⁿ kan-nā驚艱苦，in kám知影「孤支釘，phah無鐵」ê道理？Mài講打鐵tio̍h一對手，其他事事項項，無兩個人tàu相thīn saⁿ-kāng，boeh做ē好勢to̍h khah pháiⁿ pháng，to̍h是mài講做粗重--ê，giâ筆用頭殼想ê文khang-khòe mā好，有兩個人tàu參詳，tàu鼓勵，總是比ka-tī孤chi̍t-ê無參無詳khah容易。Aih！Chit-mái ê人m̄知leh想án-chóaⁿ？Hō͘咱bē講--得，怨嘆何用！

阿才嬸！你án-ne講是無m̄ tio̍h，m̄-kú時代leh變，時機無kāng，科學chiah發達，chiâⁿ-chē少年人lóng是白手成家，孤腳手ka-tī piàⁿ--出-來-ê，koh再講，「Chē牛踏無糞」，「Chē kiáⁿ gō死爸」ê俗語，你kám m̄-bat聽過，cha-po͘孫kan-nā chi̍t-ê無要緊--lah！Cha-bó͘孫khah gâu sai-nai，mā khah ē-hiáu體貼，恁後生ê看法應該無m̄ tio̍h--lah，總是伊有讀過冊，koh是leh做老師，bē m̄ tio̍h--lah！Tú-chiah是leh kā你關心，chhìn-chhái問問--leh niâ，你koh斟酌想khòaⁿ-māi！

有影to-tio̍h，阮hit saⁿ-ê cha-bó͘孫，gŏa sai-nai--leh，chiok知阿媽ê輕重neh！知影阿媽愛食siáⁿ？知影阿媽愛看siáⁿ齣ê電視？Lóng ē-hiáu kā我chhoân kah好勢好勢！哈！哈！哈！

阿才嬸！想開--a ho͘ⁿh！

「孤支釘，phah無鐵。」khah早ê人都lóng án-ne講，大概是khah早ài作穡，腳手nā chē，to̍h做khah ē好勢，有影時代無kāng，chit-mái ê時代實在進步，siáⁿ-mih電子--ê，電腦--ê，常常都leh聽siáⁿ-mih電，電siáⁿ-mih，聽kah霧sà-sà，聽lóng無，三從四德，聽gín-á講--ê to̍h無m̄ tio̍h，哈！哈！哈！

【註解】