〈008〉
水濁，草to̍h無
Chúi lô, chháu to̍h bô
阿吉--à，趁chit-chūn-á日頭khah軟，趕緊去so草，hit-khu稻á無so草已經giōng-boeh變草埔，你ta̍k日ùi hia出出入入，kám無看--tio̍h？少年人，khah kut-la̍t--leh，「無跪，bē出穗」，kám m̄-bat聽人講過，tio̍h so khah工夫--leh！
阿爸！草so好--à！Boeh來去chhōe朋友--lò͘！
你是so有工夫--無？一分地ê稻á，ná有人chiah-nī緊to̍h so好--à，你m̄ chhìn-chhái pê-pê jio̍k-jio̍k--leh準tú好，等--leh！Kap恁爸同齊來去khòaⁿ-māi！
好--lah！
你看！Án-ne叫做so--過？恁niâ khah好--leh！你kioh是「水濁，草to̍h無」，to̍h ē-tàng jia人目，騙恁爸m̄-bat so過草--hio͘h，a̍h bē-hiáu看，tú-chiah chiah so--過，nā so有工夫，田水ná ē chiah緊to̍h chhē清，看你chit-ê m̄-chiâⁿ gín-á，好--ê m̄學，kan-nā ē-hiáu pān-tōaⁿ，kan-nā ē-hiáu thit-thô。來！外褲thǹg--起-來，恁爸hām你piàⁿ，我ùi chit pêng，你ùi hit頭，看chiâ so khah緊，so khah chiâu，so khah工夫。
好--lah！……
你看！Án-ne m̄-chiah講號做so草，規khu田hō͘咱一下跪，hō͘咱一下so，田水lô-kiak-kiak，雜草mā ji̍h-ji̍h jio̍k-jio̍k tiàm土內，án-ne咱iā ê肥料mā chiah bē hō͘雜草suh了了，稻á boeh成長to̍h khah有希望，聽有--無？
有lah！……
其他工課mā kāng款，千萬m̄-thang kioh是「水濁，草to̍h無」，「lāng鬆boeh騙大人」，án-ne m̄是做tāi-chì ê正經，tio̍h-ài腳踏實地，無iáu-chiat，mài偷工減料，boeh成功tio̍h有ǹg望…。
註：Pháiⁿ gín-á厚nôa-thâu，教kiáⁿ氣、thiòng、lún，講話自然pháiⁿ聲嗽。
【註解】
| 詞 | 解說 |
| 趁 | 『趁著』。 |
| 日頭khah軟 | 『陽光較弱』。 |
| So草 | So-chháu，水田除草。 |
| Giōng-boeh | 『快要』。 |
| Kám m̄-bat | 『難道不曾』。 |
| Chiah-nī緊 | 『這麼快』。 |
| Chhìn-chhái pê-pê jio̍k-jio̍k | 『隨便爬爬 抓一抓』。 |
| 等--leh | 『等一下』。 |
| 恁爸 | 恁pē，lín-pâ，lín-pē。 |
| M̄-châiⁿ gín-á | 『不受教的孩子』。 |
| Chiâ | 誰。 |
| Chiâu | 周到，齊全。 |
| Lô-kiak-kiak | 『混濁得很』。 |
| Ji̍h-ji̍h jio̍k-jio̍k | 『揉揉壓壓』。 |
| Iā肥 | 『撒肥』。 |
| Suh | 吸收。 |
| 聽有--無 | 『聽懂嗎』。 |
| Iáu-chiat | 簡省phah折無實。過分折扣。 |
| Nôa-thâu | 表面工夫。 |