〈115〉

一身死了了，kan-nā chhun一支嘴

Chi̍t sin sí-liáu-liáu, kan-nā chhun chi̍t ki chhùi

孔子公遊列國ê時，有一工來到chi̍t-ê地頭，看tio̍h一支khăng-páng，頂頭寫三字白話字「Khiā-chèⁿ-ông」，一時心適，to̍h叫子路去問是leh做siáⁿ-mih生理？

子路問了oat轉來kā Sian--ê回話：

Ah to講boeh kap人sio-chèⁿ--lah！Chèⁿ輸ê人ài hông罰錢！

Sio-chèⁿ？Poa̍h-kiáu！Ah he我m̄，咱來行！

無--nò͘！Sian--ê！伊lōa誇口--leh neh，講恁魯國ê孔--先-生來mā無夠看，好膽，請伊來試khòaⁿ-māi。

孔子kap子路自án-ne行入去「Khiā-chèⁿ-ông」店內，一目nih-á兩ê師傅師á，鼻á摸leh頭lê-lê oa̍t--出-來，chèⁿ輸--人-lah！

孔子公是chi̍t-ê講道理ê學者，boeh辯論總是照理氣，siáⁿ知chit ê「Khiā-chèⁿ-ông」是一位「一身死了了、kan-nā chhun一支嘴」ê su̍t-á，死鴨á硬嘴pe，死chèⁿ活chèⁿ m̄認輸ê騙取，有理無理伊lóng應ē出嘴，莫怪孔子公ài甘敗下風。

Chit-ê sià面子ê tāi-chì去hō͘孔子公ê厝邊聽--tio̍h，實在chiâⁿ m̄甘願，講boeh chhōe「Khiā-chèⁿ-ông」算siàu，替孔子公討回公道，人勸伊mài，伊氣chhoah-chhoah，包袱á phāiⁿ--leh chi̍t-khùn來到「Khiā-chèⁿ-ông」ê國度，chhōe tio̍h「Khiā-chèⁿ-ông」，講明因端來意，專工boeh kap伊「Khiā-chèⁿ-ông」比chi̍t-ē koân低。

「Khiā-chèⁿ-ông」講：來--者是客，boeh chèⁿ題目，輸贏錢額由人客喝聲。

Án-ne好，輸贏一百兩銀，我boeh poa̍h你hit粒頭殼有幾斤重！

請講，幾斤？

Siāng無mā有50斤！

哈哈哈！你輸--a，我人總--à共--ā mā chiah 100斤kha-tau，無leh笑死人--講，kan-nā頭殼to̍h佔一半重？Taⁿ一百兩銀我收--起-來-hoⁿh！你輸--a。

慢且是--leh，各位看sio-chèⁿ比賽ê人客官，sio-chèⁿ憑理氣，理長m̄驚講，情理屬眾人，nā有議論tio̍h-ài提出證據，人證物証lóng ē-sái--chit，tio̍h--bô！

Tio̍h！講了有理！

有理to̍h照理行。

人伊，孔子公ê厝邊，包袱á phah開，提出chi̍t-kâi pōng-á，sa出一支thâi豬刀：

Taⁿ ka tok起來pōng khòaⁿ-māi--leh，to̍h知輸贏，nā無準to̍h是我輸，nā有準to̍h是我贏。

人命關天，ná ē-sá-tit án-ne piàⁿ？

人命關天，nā有tāi-chì，kāng款我ē賠命，既然boeh sio-chèⁿ，無piàⁿ boeh ná ē贏！

結果如何？當然是「Khiā-chèⁿ-ông」輸，thâi豬á兄贏。

【註解】