〈035〉

人過四十，天過晝；Chiūⁿ-siap to̍h bē-liap

Lâng kòe sì-cha̍p, thiⁿ kòe-tàu; Chiūⁿ-siap to̍h bē-liap

人生ná peh山，開始充滿希望，唱歌lā曲，peh tio̍h chiâⁿ輕鬆，peh-kah半山腰，有人開始jiok bē tio̍h，有人猶原hiông-kông一直chông ，雖然peh-kah「ē呼雞bē pûn火」phīⁿ-phēⁿ喘，mā是為tio̍h boeh peh到山尾溜siāng koân ê所在，得tio̍h心滿，得tio̍h意足，ē得tio̍h hiâ-pai，ē koh再期待。

人ê一生kāng chi̍t-ê樣，gín-á時代歡喜天真，ta̍k日笑hai-hai，期待khah緊大漢ê將來，少年時代有夠力，一直piàⁿ bē-siān，望boeh成家立業，目chiu所看lóng是未來，娶bó͘生kiáⁿ，無閒chhih-chhih，siáⁿ知一目nih歲頭已經chiūⁿ-siap，四十歲ê年紀，細kiáⁿ mā chiah十外（歲），tng tio̍h piàⁿ，雖然目chiu有sió-khóa起花，開始tio̍h ài掛老歲á目鏡，chit時陣hiông-hiông想tio̍h到底『人生七十才開始』，a̍h是「人過四十，天過晝」、「chiūⁿ-siap to̍h bē-liap」？

『人生七十才開始』ài ka看做鼓勵人m̄-thang認老，nā是ka-tī看做七十 iáu ē liap，tio̍h khah mài siàu想，食老tio̍h ài修；「人過四十，天過晝」，是leh提醒你人生已經過一半，m̄免驚m̄免越頭看，勻勻á行，慢慢á落kiā，心肝nā無táⁿ-hiáⁿ，to̍h ē順利『回到家』；天過晝to̍h是下晡時，早起出門phah-piàⁿ，liâm-mi to̍h boeh轉來團圓，糖甘蜜甜，kám m̄是？「人過四十，天過晝」，是天理mā是事實，ē bat人生道理，to̍h kap peh山kāng款，peh kiā落嶺lóng是歡喜，lóng是趣味。

「Chiūⁿ-siap to̍h bē-liap」，siāng kài hō͘人驚，bē-liap是講cha-po͘人ê攝護腺有問題，放尿ē滴tio̍h鞋，做khang-khòe khah bē mé-chhè，nā是koh想tio̍h性能力，to̍h hō͘人bē食bē睏，boeh chóaⁿ-iūⁿ？人講--ê，平常心，身體健康khah要緊，hit種能力m̄-thang時時khǹg在心，koh講chit-mái ê營養、醫藥chiah厲害，bē-liap ê年齡ē慢kúi-nā年chiah來，bē-liap ê苦悲，除了先天性ê無奈以外，lóng是少年bē-hiáu想，作孽得來--ê，朋友！「Chiūⁿ-siap to̍h bē-liap」，mài掛在心，nā是boeh過有意義ê人生，生涯規畫siāng要緊，量早來計劃，kan-nā驚過晝，驚chiūⁿ-siap是無必要，退休後ê生活，chiah是咱tio̍h斟酌小心ê所在，「天驚過午，公教人員驚過六五。」m̄知影你有同意--無？

【註解】