〈127〉

M̄知市鎮，koh想boeh ngiâ媽祖

M̄-chai chhī-tìn, koh siūⁿ boeh ngiâ má-chó͘

舊厝邊廖大兄昨昏來厝--ni̍h坐，phò-tāu開講，hiông-hiông問講田中鎮街路án-chóaⁿ se̍h，khah好勢se̍h chi̍t-liàn。

你問che boeh創siáⁿ-hòe？

Ah to̍h舊年媽祖宮我poa̍h-tio̍h爐主--leh，今年三月廿三媽祖生，講tio̍h ài ngiâ媽祖se̍h街路--lah，taⁿ，開天地mā m̄-bat tú-tio̍h chit款大tāi-chì，聽講做爐主ê人tio̍h ài chhōa路，giâ頭旗neh！

Tio̍h--à，giâ頭旗to̍h是領隊，che當然是爐主ê權利，mā是義務，為媽祖婆做慈悲保庇ê功德，真好真有福報--ō͘，你今年一定大thàn錢。

Taⁿ，閒話mài thi̍h，boeh án-chóaⁿ giâ頭旗，以前bat看人giâ，好親像有踏腳步，hit支竹掃koh tio̍h雙手換來換去，正pêng倒pêng掃來掃去，可惜m̄-bat kā看真，蕭老師，你 khah bat tāi-chì，kâ教--一-下好--無？

Taⁿ to̍h m̄-bat字--ē去問tio̍h青盲牛--ê，a̍h有法度，chit方面欠研究，無才調kā你指點，m̄-kú ē-sái-tit報你一條路，去請教有諒á叔，伊是專家，廟ê khang-khòe ta̍k年lóng有leh chhap，問伊to̍h無m̄ tio̍h，sūn-sòa ē記tit ka問se̍h街ê齣頭，看今年boeh se̍h lōa遠，kám tio̍h ngiâ到庄腳--去。

Ah he街路我也罕得leh行，khah行mā咱附近chit二三條，kui街路se̍h透透，he a̍h有法度？

無法度，koh也敢kap人poa̍h爐主，這句俗語kám bat聽--過：「M̄知市鎮，koh想boeh ngiâ媽祖」，to̍h是leh講你--lah！（廖兄是古意人koh兼ham-bān，tiau-kang kap伊滾笑--ê。）

我a̍h知？人講poa̍h tio̍h爐主真讚，m̄-chiah kap人poa̍h，koh有影天公疼戇人，soah去hō͘我poa̍h--tio̍h，koán-thāi伊，時到時擔當，bē-hiáu chiah koh來問--你。

「M̄知市鎮，koh想boeh ngiâ媽祖」，好ka-chài che是神明tāi，有虔誠to̍h好，nā無，boeh做人ê領導者，無內行是boeh án-chóaⁿ進行neh？

【註解】