〈042〉

半桶屎，ē chhoat；半桶水，ē chhoat；半桶師

Pòaⁿ tháng sái, ē chhoat; Pòaⁿ tháng chúi, ē chhoat; Pòaⁿ-tháng-sai

教師節前一工，台北兩ê ian-tâu-á-sàng lóng leh taⁿ擔，taⁿ輸贏，看siâng khah有擔當，boeh taⁿ後屆台北市政府ê責任。

一支pùn-taⁿ，兩kha草láng…ah！M̄是！是一支pùn-taⁿ，一擔米lôa，boeh taⁿ客家人ê關懷，看伊嘴á笑kah li̍h-sai-sai，看戲ê人mā笑hai-hai，笑講hit擔輕báng-báng，內底無半項，kám有影án-ne客家人to̍h ē來ka tàu-saⁿ-kāng。

另外hit支pùn-taⁿ taⁿ兩桶水，40公斤對chi̍t-ê庄腳gín-á是無礙tio̍h，大概是離開庄腳siuⁿ過久，taⁿ擔ê屈勢有khah輸。Chit ê人真gâu比論，taⁿ水boeh taⁿ tio̍h ài taⁿ kui擔，nā無，「半桶水，ē chhoat」出來，「半桶水，ē chhoat」，俗語ê原意是「半桶屎，ē chhoat」，有khah pháiⁿ聽，不過taⁿ水、taⁿ屎lóng kāng款，ài有好步數，nā無是無功效。

「半桶屎，ē chhoat」，其實是leh笑半láng師gâu pûn雞kui，gâu ê師傅tiām-tiām作穡，實實在在做生理，nā是學藝無精ê半láng師，定定kâng展伊ê工夫siāng好，m̄知頭ê人客，nā the̍h穡頭hō͘伊做，龜腳sô出來tio̍h喝i-o，gō͘-má-hoe，最後衰尾--ê是人客，chhōe師傅tio̍h斟酌，m̄-thang chhōe半láng師，chiah bē食虧。

講tio̍h半láng師，chín ê社會滿四界，chit-mái ê少年人，靠勢伊有讀過冊，bat真chē，sió-khóa kap師傅學三、四kò月，to̍h boeh出來ka-tī做頭家，讀冊是理論，經驗真要緊，半桶水á ê工夫to̍h四界kap人phún，ē成功bē成功kan-nā想mā知。「半桶屎，ē chhoat」，是笑人無真實力，ah nā kui擔tīⁿ-tīⁿ，真工夫ê正師傅kám tio̍h有法度bē-chhoat，mā是使人懷疑，無實力--ê tio̍h koh phah-piàⁿ，有夠力ê實力派，mā tio̍h顧謙m̄-thang ka-tī褒獎，taⁿ重擔nā無khoaⁿ-khoaⁿ-á行，小心phah-piàⁿ，nā siuⁿ過自滿，一擔滿滿是ē溢 kah hō͘你喝m̄敢。

【註解】