〈149〉

Kâⁿ kiáⁿ，半眠；飼kiáⁿ，半飽

Kâⁿ kiáⁿ, pòaⁿ bîn; chhī-kiáⁿ, pòaⁿ-pá

邱老師，taⁿ gín-á我替你抱，趕緊菜湯攪攪--leh，pe一碗飯chiah bē iau，人ta̍k-ê leh等咱兩ê，車tih-boeh駛起pōng--ā！

Chhōa kiáⁿ有夠麻煩！食m̄ chiâⁿ食，睏m̄ chiâⁿ睏，請ta̍k-ê m̄-thang見怪。

Bē--lah，做你ûn-ûn-á來，小等--一-下無要緊！講tio̍h chhōa細漢gín-á，阮是巷á內--ê，「kâⁿ kiáⁿ，半眠；飼kiáⁿ，半飽」。Chit句俗語有夠合軀，尤其半暝á，ài睏kah boeh死，liâm-mi boeh食奶，liâm-mi屎kap尿，mài chhap--伊mà-mà háu，boeh chhap一暝tio̍h起來兩三pái，tn̄g tio̍h ang婿ē-hiáu tàu-saⁿ-kāng，m̄ khah輕鬆，nā是tn̄g tio̍h大丈夫，大男子，koh嫌你最近ná ē m̄ chhap--伊，時常boeh kô-kô纏，你講ài睏kah boeh死，伊講你變心無愛--伊，hit時boeh án-chóaⁿ辯理？

Nā是ta-ke官tòa做夥，koh khah liân-hôe，三頓無chiàu-khí-kang，人講你不孝，nā boeh照起工，koh boeh上班，ŏa！食頭路ê女性，tn̄g tio̍h「kâⁿ kiáⁿ，半眠；飼kiáⁿ，半飽」ê時期，看破tio̍h-ài休假khah實在，nā無tio̍h-ài請ang婿諒解，為tio̍h khîⁿ家boeh ài有khah好ê經濟，ta̍k-ê會齊，saⁿ-kap疼痛，忍耐chit段過渡ê日子，期待未來ê歡喜過日。

「Kâⁿ kiáⁿ，半眠；飼kiáⁿ，半飽」。是事實，做ang婿ê cha-po͘人tio̍h了解，體貼太太chiah應該，日--時khang-khòe，暝--時khang-khòe，tio̍h幫忙to̍h幫忙，mài lo-so，m̄-thang chha̍p-chha̍p唸。

【註解】