〈132〉

Phah斷人ê鼓柄

Phah tn̄g lâng ê kó͘-pèⁿ

小朋友，老師做chi̍t-ê謎猜hō͘恁ioh。

（聽tio̍h ioh謎猜，ta̍k-ê pho̍k-á聲phah無停…）

「Siuh-siuh叫，無規則，警察大人jiok bē tio̍h。」Hō͘恁ioh街路發生ê tāi-chì？

飆車。

（吳嘉禾隨時講出謎底，其他giâ手期待boeh hō͘老師指名ê學生，soah無意無意kā手放--落-來。）

吳嘉禾ioh了無m̄ tio̍h，是「飆車」。

（Soah無pho̍k-á聲）

老師koh講chi̍t-ê！

（Pho̍k-á聲隨koh pho̍k-pho̍k叫。）

「Chi̍t-kâi鉤鉤，釘tī壁頭，一工無伊，厝內亂chhau-chhau。」Ioh咱厝內面一項設備？

水道頭。

（Kāng款是吳嘉禾隨時講出謎底，其他ê gín-á ta̍k-ê嘴開開，面hng-hng。）

吳嘉禾lóng hiah gâu--ōe，老師阮無ài ioh謎猜--a lah，lóng無好sńg！

吳嘉禾！老師tong-tong kā你講，上課中，老師講話是boeh hō͘ ta̍k-ê聽，boeh應話定tio̍h ài 先giâ手，m̄-thang老師講一句，你to̍h隨應一句，án-ne ē「phah斷人ê鼓柄。」你kám知影？

Siáⁿ-mih是「phah斷人ê鼓柄」？

小朋友！Phah鼓tio̍h鼓柄，鼓柄to̍h是鼓箸，che恁知影--lah-hoⁿh？鼓柄nā phah斷--去 ē án-chóaⁿ？吳嘉禾！你講。

Ah to̍h bē-sái-chit koh phah鼓--à！

Tio̍h！親像tú-chiah老師講謎猜，謎題chiah tú講了，m̄-tio̍h hō͘人想khòaⁿ-māi，ē-hiáu ê人chiah giâ手，hō͘老師指名chiah來ioh，án-ne ta̍k-ê ioh了m̄-chiah有趣味。親像你án-ne，老師也無允准--你，你to̍h隨應話，講出答案，soah hō͘ ta̍k-ê免koh ioh，害ta̍k-ê lóng感覺bē趣味，che to̍h是「phah斷人ê鼓柄」！「Phah斷人ê鼓柄」，是ē顧人怨--ō͘，後pái boeh ioh to̍h giâ手，nā是ē-hiáu，mā ài niū寡hō͘別人ioh，知影--bò͘！

來！Chit-mái老師têng-koh出幾條謎猜，hō͘ ta̍k-ê ioh，ài認真ioh，m̄-thang koh有人「phah斷人ê鼓柄」--à-ō͘！

一支矸á té烏棗，日--時開，暗時鎖。＜Ioh人ê器官＞ （目chiu）

Chi̍t-ê gín-á出門chhiak-chhiak tiô，入門to̍h軟siô-siô。＜Ioh一項物á＞ （布袋戲ang-á）

出門一蕊花，入門變一條菜瓜。＜Ioh用品一項＞（雨傘）

半天一塊碗，雨來té bē滿。＜Ioh樹á頂ê物件＞ （鳥á siū）

因為無人koh「Phah斷人ê鼓柄」，所以lóng ioh kah歡喜ka̍h。

【註解】