〈118〉

Gín-á怨無，無怨少

Gín-á oàn bô, bô oàn chió

Chit-mái ê gín-á實在真古錐，hèng sńg hèng thit-thô，ài 食koh ài講話，開放ê教育，富裕ê享受，hō͘ in歡喜kah有tang-sî-á soah無大無細：

老師！你lóng m̄-bat請阮食chia̍h-mi̍h--ō͘？

Ài老師請恁食chia̍h-mi̍h？Chiâⁿ簡單，hō͘老師做kiáⁿ，老師to̍h ē-sái chhōa你去買嘴chia̍h-mi̍h！

Chiâ boeh？

M̄ hō͘老師做kiáⁿ，老師to̍h m̄是爸爸，ná thang kā老師討boeh食chia̍h-mi̍h？Boeh食轉去kā恁阿爸討。

老師lóng án-ne--o͘！Ài請！Ài請！Ài請！Ài請！…

好--lah！活boeh chak--死！請--恁ē-sái--chit，m̄過ài kā老師講，為siáⁿ-mih老師ài請--恁？老師kám有欠--恁！

老師thàn錢thàn chiok chē，所以一定ài請阮食糖á！

……

O͘h！有影花bē了！這to̍h是我hit班四年á生天真好sńg ê所在，m̄是我sēng gín-á，實在是平常時in ê表現真ē可取--得，hèng sńg bóng hèng sńg，gâu亂bóng gâu亂，m̄-kú該聽話ê時lóng真聽話，bē超過學生gín-á該有ê禮數，m̄-chiah ē kap in sió滾笑，giú近老師學生ê距離。

四十ê，開兩百外kho͘，買一大包kâm-á糖，利用班會時間，一人分五粒，沿路kâm，沿路開會，ta̍k-ê lóng mā笑hai-hai，講阮老師siāng好，siāng gâu kā阮疼命命，老師『萬歲』！

「Gín-á怨無，無怨少」，有夠好騙好款待，其實chit-mái ê gín-á也m̄是無thang食，boeh食khah好ê sì-siù-á，in tau是滿四界，講gín-á ài食是有影，sió-khóa ka騙--一-下，sió-khóa hō͘ in歡喜，in ê心內to̍h ē感覺tio̍h大人ê疼心，以後khah ē聽你ê話，不過m̄-thang tong-tong請，mā m̄-thang無公平，tong-tong請ē好款，kioh-sī老師請--in是當然，án-ne to̍h教pháiⁿ子弟--lò͘。Nā是無公平，to̍h ē計較起冤家，大人ê疼心tio̍h公平，chiah bē惹起禍端。

Hō͘ gín-á ê等路、伴手，ài ē記--得，免siuⁿ chē，免浪費，有to̍h好，因為「Gín-á怨無，無怨少」。

【註解】