〈087〉

Poa̍h-lo̍h kiáⁿ-jî坑，ám糜á相爭

Poa̍h-lo̍h kiáⁿ-jî kheⁿ, àm-moâi-á sio-cheⁿ

「Chhó、Chài、Toān、Iām、Thiam，Khah-chuh、Mah-chuh、Tiong-kài、Hiân、Ban、Hó。」

M̄是leh唸經，是leh唸gín-á時代ê一段唸謠，內容是阮厝邊福--à in chi̍t-kōaⁿ肉粽kōaⁿ後生cha-bó͘-kiáⁿ ê名，草--ê、再--ê、緞--ê、炎--ê、添--ê，khah-chuh--ê、mah-chuh--ê、中界--ê、阿賢、阿ban、好--ê。Lóng總幾ê？一打十二隻súi-súi欠chi̍t-ê，ôa--á！Ná ē生chiah chē，驚死人，福--à in ang-á-bó͘有影「poa̍h-lo̍h kiáⁿ-jî坑」，sian piàⁿ mā bô-chhái工，mài講boeh chhun錢hak財產，kan-nā為tio̍h款三頓，boeh hō͘十一ê頭嘴食kah飽，to̍h chong kah chhia-pùn-táu，十一ê gín-á為tio̍h食，無搶chô mā bē-sái--chit，免講魚魚肉肉清米飯，kan-nā「ám糜á」to̍h一定「相爭」，無kā你騙。

講--起-來to̍h iàn-khì tāi，ē hông流目屎，福--à in ang-bó͘，一世人to̍h是為tio̍h chit十一ê gín-á ê食穿，拖磨kah真無閒。古早人早嫁娶，二十歲結婚，兩年生chi̍t-ê，生十一ê tio̍h ài生到四十gōa歲，ē生，生kah bē生，生chi̍t-ê kiáⁿ落九支花，身體堪bē去，四十外boeh koh做siáⁿ-mih大khang-khòe，kám有伊法，thàn錢piàⁿ生活完全tio̍h福--à ka-tī chi̍t-ê niā-niā，也m̄是大富戶，穡頭chiah兩分外，兩肢腳gia̍p一粒lān-pha，ko͘-put-chiang piàⁿ硬á iáu是無法度hō͘十一ê gín-á食kah飽，有夠hiau-hēng。

「Poa̍h-lo̍h kiáⁿ-jî坑，ám糜á相爭」，chit款悲情苦憐tāi，三siap年前ê趁食人滿四界，時機bái，thàn錢ham-bān，koh bē-hiáu節育，生kiáⁿ順其自然，台灣天氣，台灣水質，生kiáⁿ ká-ná番薯生湠，台灣人像番薯á命，chhìn-chhái種chhìn-chhái iā，甚至chhìn-chhái phiaⁿ伊都ē活。Kan-nā活是boeh創siáⁿ？無教育，無好ê文化，ta̍k日bo̍k-bo̍k泅，到當今四百冬，iáu oân-ná無ka-tī自主ê文化，據在人chau-that，據在人誤解，to̍h連ka-tī ê子弟mā m̄-bat台灣文化。

時代leh變，觀念leh改，「兩ê tú-tú好，chi̍t-ê無算少」ê精兵養育之下，已經免koh遭遇「poa̍h-lo̍h kiáⁿ-jî坑，ám糜á相爭」ê可憐，咱tio̍h ài注重ka-tī文化，臺灣ê歷史地理tio̍h讀，台灣人ê語言to̍h講ho͘通，án-ni台灣ê前途chiah有ǹg望，nā無，kan-nā bē「poa̍h-lo̍h kiáⁿ-jî坑」，「ám糜á」bē「相爭」，無文化bē自主ê台灣，kāng款是悲哀。

【註解】