〈052〉

食飽屎to̍h緊；食飽駛to̍h緊

Chia̍h pá sái to̍h kín；Chia̍h pá sái to̍h kín

駛、屎kāng音，無kāng意思，所以chit句俗語變做一句雙關語，「chia̍h-pá sái to̍h kín」。到底是keng-thé人pān-tōaⁿ「食飽屎to̍h緊」，a̍h是驚牛腹肚siuⁿ iau，趕緊飼飼--leh hō͘伊「食飽駛to̍h緊」。

一陣作田兄哥，tàu陣tī田--裡駛牛耕作，作穡人lóng是勤勞phah-piàⁿ kut-la̍t做，看tio̍h pān-tōaⁿ人to̍h khah bē o-ló，其中chi̍t-ê兄哥，比別人khah慢chiūⁿ工，做tio̍h khang-khòe拖沙兼lo-so，m̄是講boeh pok hun to̍h是講boeh ha茶，bân牛kāu屎尿有夠lo-thi。半晝á boeh食點心，ta̍k-ê歇睏pok一下á hun，sūn-sòa放牛食草，等一下chiah有khùi力thang好犁，hit-ê pān-tōaⁿ骨--ê已經做頭前開始hut。

小歇chi̍t-chūn，ta̍k-ê chiah叫倚來食點心，saⁿ-kap議論做人ê本分，有人講「做雞tio̍h chhéng，做人tio̍h péng」；有人認為人kap牛kāng款，「知做知食」siāng要緊；siāng-kài m̄好是「pān-tōaⁿ做，kut-la̍t iⁿ-iⁿ」hit款人，話中含意是leh keng-thé hit ê兄哥。

Hiah tú好，hit ê兄哥食飽想boeh去便所，kap ta̍k-ê小招呼，boeh落工免相等，等一下我to̍h來。

「食飽屎to̍h緊」，做你去，阮boeh牽牛落田作穡，牛已經食飽--lò͘，「食飽駛to̍h緊」，趁chit-chūn落田phah-piàⁿ siāng要緊，你chiah khoaⁿ-khoaⁿ，阮無boeh等你！ 人，實在m̄-thang pān-tōaⁿ，pān-tōaⁿ tio̍h hō͘人看無起，pān-tōaⁿ to̍h ē吞nōa，既然做人，to̍h ài kut-la̍t。

附帶說明，駛、屎kāng音，無kāng意思，有人認為「駛車」真pháiⁿ聽，講ài叫做開車（khui-chhia），實在是無知識，開門、開鎖、開店、開電火、開電視、開收音機…chia ê物件kám ē搬徙位？駛田、駛牛、駛車、駛飛機…lóng ē tín動一直行、kap開ê動作是無kāng款，chit句話出tī有歲ê 台灣人，實在不應該，用chit款比論來醜化台語ê人，to̍h ài ka-tī三思檢討，應該不應該？

【註解】