〈059〉

M̄是phòa甘蔗，to̍h是poe̍h虎鬚

M̄ sī phòa kam-chià, to̍h sī poe̍h-hó͘-chhiu

Phòa甘蔗ê phòa，寫漢字「破、剖」lóng無siáⁿ通，用「劈」意思可能khah通，劈唸phek，音韻bē通。Phòa甘蔗kap削甘蔗無kāng，削甘蔗是削甘蔗皮，phòa甘蔗是ùi甘蔗ê中心，一刀phòa做nn̄g pêng，有才調一刀ùi甘蔗尾phòa kah甘蔗頭，to̍h ài技術，ē用得講是特技表演。Phòa甘蔗ê趣味tī chia。

Poe̍h虎鬚m̄是boeh捻虎ê嘴鬚，是一種拈khau-á hōng食ê sńg笑方式，閒閒無tāi-chì做，ta̍k-ê poe̍h虎鬚thit-thô，『抓到大頭』出錢khah chē，『抓到小頭』出錢khah少，抽tio̍h空khau-á做人客，免出錢koh ē-tàng kap人食pêⁿ chē，出錢chē少無關係，有thang食有thang sńg koh免做khang-khòe，得tio̍h ê快樂真chē。這比舊社gín-á公食公開ê方式無siáⁿ kāng，比較khah好sńg。

Phòa甘蔗ê sńg法是án-ne，蔗頭蔗尾切齊齊，甘蔗chhāi ho͘挺，蔗刀giâ--leh，相chiong-chiong一刀phòa--落-去，phòa做兩pêng--ê to̍h算你ê，phòa無過--ê換人phòa，chit支你先phòa，後支to̍h ài換我，無相phiⁿ，實在chiâⁿ好sńg，可惜phòa做pêng ê甘蔗khah無好gè。

過去農村社會，庄腳人平常時khah無娛樂，mā無tè去，tiàm店á頭phòa甘蔗kap poe̍h虎鬚lóng是chiâⁿ好ê消遣，m̄-kú ta̍k日一工到暗lóng leh「m̄是phòa甘蔗，to̍h是poe̍h虎鬚」，to̍h m̄是好kioh-siàu--lò͘，尤其是少年家á，boeh食m̄願做，一日閒仙仙做店á撐，「M̄是phòa甘蔗，to̍h是poe̍h虎鬚」kap人sńg笑消遣，he是hō͘人喝àu少年。

時代已經無kāng，boeh看phòa甘蔗kap poe̍h虎鬚，實在無tàng看，chit-mái ê gín-á兄，「m̄是KTV to̍h是phah電動」，好sńg--ê真正chē，Siau Lah-jih奉勸ta̍k-ê，千萬m̄-thang sńg kah siuⁿ過份。

【註解】