〈145〉

苦瓜連根苦，甜瓜透蒂甜

Khó͘-koe liân kin khó͘, tiⁿ-koe thàu tì tiⁿ

改寫chi̍t-ê佛教因果ê故事：

種子kap果實──Siau Lah-jih改寫

種siáⁿ-mih因，得siáⁿ-mih果。栽siáⁿ款ê種子，得siáⁿ款ê果子。有siáⁿ-mih款ê行為，to̍h ē得tio̍h siáⁿ-mih款ê結果。

有chi̍t-ê作田人tī kāng一khu田--裡tiām兩粒種子：一粒是甜瓜ê種子，另外一粒是苦瓜ê種子。兩粒種子種tī kāng款ê田土內，接受kāng款ê水分、kāng款ê日頭光、kāng款ê空氣；大自然hō͘伊kāng款ê營養分。兩粒種子ùi土腳tau puh-íⁿ，而且開始成長，結果án-chóaⁿ？苦瓜欉生ê苦瓜是苦--ê，連伊ê根lóng是苦teh-teh。Ah甜瓜欉生ê甜瓜，m̄-nā甜瓜粒是甜--ê，連伊ê蒂頭lóng是甜--ê。為siáⁿ-mih大自然（a̍h是siáⁿ-mih神）ē對chit-ê chiah-nī仁慈，卻是對另外hit-ê hiah-nī殘酷neh？

無！無！無！大自然並無 無仁慈mā無 殘酷，一切lóng是按照固定ê法則來運行，大自然只是幫助種子呈現伊ê特色而已。所有ê營養分kan-nā幫贊種子顯示伊ka-tī ê本性。甜瓜有甜ê特性，所以甜瓜是甜--ê；苦瓜ê種子有苦ê特性，所以苦瓜是苦--ê。種siáⁿ-mih款種子，得siáⁿ-mih款ê果實。

Nā是chit-ê作田人行到苦瓜欉ê邊--a，對苦瓜欉行三ê禮，而且se̍h 108 liàn來表示敬意，koh用鮮花、束柴、臘燭、水果、點心來奉敬。了後，伊開始祈禱乞求：「啊！苦瓜神--à、請你生甜瓜好--無！我boeh甜瓜--lah！」可憐ê苦瓜神、伊無法度生甜瓜hō͘--你，伊無chit款能力。

Nā是有人想boeh得tio̍h甜瓜、伊必須ài種甜瓜ê種子，án-ne伊to̍h m̄免去哀求任何人來幫贊，伊所得tio̍h--ê一定是甜瓜。種siáⁿ-mih種子，to̍h得tio̍h siáⁿ-mih款ê果子。「苦瓜連根苦，甜瓜透蒂甜」，這是必然ê果報。Pháiⁿ命人講好命人真好命，kám有影？好命人看pháiⁿ命人真苦憐，kám有一定？好命、pháiⁿ命？Kah在人ê心án-chóaⁿ去體會，人nā有法度用平等ê心去對待苦kap樂，無執著ê心，koán-thāi伊「苦瓜連根苦，甜瓜透蒂甜」已經是無重要--à。

咱ê障礙、咱ê無知是：咱對種siáⁿ-mih款ê種子無要無緊，所以時常去種tio̍h苦瓜ê種子，但是到收成ê時陣，咱chiah突然警覺，咱ài--ê是甜瓜，m̄是苦瓜。結尾，咱開始哀求，希望ē得tio̍h甜瓜，ài知影，he是無khah-choa̍h--ê。

「苦瓜連根苦，甜瓜透蒂甜」，免怨嘆，這是因果，這是法，大自然ê法則，siáⁿ人都bē gâu--tit，歡喜做，歡喜受，心內無憂愁，hit-ê時陣你已經悟道--ā。

【註解】