〈082〉

Sēng豬giâ灶，sēng kiáⁿ不孝，sēng cha-bó͘-kiáⁿ，bē落人家教

Sēng ti giâ chàu, sēng kiáⁿ put-hàu, sēng cha-bó͘-kiáⁿ, bē lo̍h lâng ka-kàu

阿母--ò！人m̄知影--lah！無論如何，一定boeh叫A-bo̍k--à伊搬出來外口tòa，阮無ài koh參hit兩ê老歲á tòa做夥--lah！阿母！你tio̍h kap阿爸講，叫阿爸kap伊參詳--lah！

Ah是koh án-chóaⁿ--hio͘h！親家親姆ná ē chiah m̄-bat tāi-chì，又koh嫌你睏òaⁿ-òaⁿ是--無？街路人ná-ū親像in庄腳人，hiah早--起-來是boeh創siáⁿ？有夠庄腳sông。免kā恁阿爸講，叫恁A-bo̍k--à來，阿母kā講to̍h ē-sái--chit。

隔壁阿火嫂--à to̍h是chiah-nī sēng kiáⁿ，ka-tī是非不分，不明事理，koh嫌人m̄-bat tāi-chì，che是siáⁿ-mih家教？Cha-bó͘-kiáⁿ嫁--人，to̍h是別人ê，kap ta-ke-koaⁿ bē-ha̍h，soah免先問因端，是人欺負--伊，a̍h是ka-tī cha-bó͘-kiáⁿ pān-tōaⁿ，bē得人疼，嫁人做新婦，總--是to̍h食人水米，tòe人風俗，符合夫家ê生活方式m̄-chiah tio̍h，cháiⁿ-thang替cha-bó͘-kiáⁿ teh抱不平neh，是m̄是，先檢討ka-tī，chiah是道理。

古早人講，「sēng豬giâ灶，sēng kiáⁿ不孝」，chit-mái ài koh添一句「sēng cha-bó͘-kiáⁿ，bē落人家教」，chiah khah合時機，sēng豬giâ灶，已經過時，sēng狗á睏膨椅，tòa厝內ko-ko纏mā是確實，sēng kiáⁿ不孝，現世報是滿滿是，細漢m̄教，大漢to̍h真pháiⁿ醫。教kiáⁿ tio̍h趁細漢，後生tio̍h教，cha-bó͘-kiáⁿ mā tio̍h教，教伊生活藝術，教伊做人道理，尤其是cha-bó͘-kiáⁿ，雖然m̄免教伊遵守三從四德，siāng起碼mā to̍h教伊知影，在家ē-hiáu敬愛爸母，嫁出tio̍h ài有孝ta-ke-koaⁿ，ta-ke-koaⁿ是ang婿ê sī大人，chit-mái為tio̍h ài chiah來嫁hō͘--伊，kám免為伊來敬愛伊ê老爸老母，我ê ta-koaⁿ ta-ke。

做人爸母，tī厝--裡是疼命命ê cha-bó͘-kiáⁿ，嫁出去to̍h是人ê好新婦，to̍h ài教伊奉待ta-ke ta-koaⁿ親像ka-tī厝內ê老爸老母，nā有sió-khóa無順序，mā tio̍h小忍耐，m̄-thang tín動tio̍h to̍h sāi-thái，吵吵鬧鬧，án-ne婚姻路上to̍h ē變款，「sēng豬giâ灶，sēng kiáⁿ不孝，sēng cha-bó͘-kiáⁿ，bē落人家教。」為tio̍h子弟ê幸福，m̄管cha-po͘ a̍h cha-bó͘，lóng bē sēng--得。

【註解】