〈053〉

七分鑼鼓，三分唱

Chhit hun lô-kó͘, saⁿ hun chhiùⁿ

「Tong leh long tong chhiàng, tong leh long tong chhiàng，chhiàng chhiàng chhiàng chhiàng chhiàng tong leh long tong chhiàng…」，che是大戲boeh搬演進前ê鑼鼓聲，叫做鬧場，由後場ê鑼鼓聲通知ta̍k-ê，開始boeh做戲--lò͘，boeh看小生小旦，a̍h是boeh看大花苦旦，趕緊搬椅條出來，m̄-thang chhiân siuⁿ-òaⁿ，先來先看，慢來--ê chhun一半。「Tong leh long tong chhiàng, tong leh long tong chhiàng, chhiàng chhiàng chhiàng chhiàng chhiàng tong leh long tong chhiàng…」。

有影鬧熱滾滾，未演先轟動，小生ná ē chiah-nī súi，小旦有夠kó͘-chui，歌á唱kah hiah-nī幼jī，好聽koh ē牽絲；大花leh展雄威，小丑á真趣味，苦旦nā chiūⁿ台to̍h真害，悲哀苦情一直哀，趁人ê目屎滴落來，戲soah ta̍k-ê ná歡喜ná leh會東會西，iáu-siū！Ná ē chiah gâu搬，chiah gâu nôa，chiah gâu chòaⁿ，害人看kah嘴á開開，也boeh笑hai-hai，也boeh流目屎，頭taⁿ-taⁿ叫是真實，tòe leh歡喜，tòe leh傷悲，做戲khong看戲戇實在有影。

「七分鑼鼓，三分唱」，這是內行人chiah ē了解，一棚戲nā boeh有水準，後場鑼鼓弦館ài佔大部分功勞，舞台頂ê表演者雖然gâu sió͘，無後場ê鑼鼓聲，to̍h無法度搬kah生真有影，雖然ta̍k-ê o-ló--ê是表演者。歐美ê歌劇opera koh khah ē-tàng顯示「七分鑼鼓，三分唱」ê道理，歌劇演員數十名，後場（前場chiah tio̍h）交響樂伴奏ê音樂家有khah chē無khah少，加上舞台、燈光、導演、設計kap雜差等等，論功勞，唱--ê佔三分，後壁計劃發落ê智囊佔七分，實在公道。

「七分鑼鼓，三分唱」，用來比論政治、娛樂界kap ang-bó͘-tāi，lóng ē-tàng了解，khiā tī台前ê明星、主管、ang婿a̍h是太太，in ê hiâ-pai chhia-iāⁿ kám m̄是後壁ê設計師、智囊團、牽手a̍h是丈夫gâu安排，所以人nā有出脫ê一工，to̍h m̄-thang bē記得幕後ê人，「七分鑼鼓，三分唱」，做人to̍h ài感恩。

【註解】