〈032〉

做一ê老母，白賊三年

Chò chi̍t ê lāu-bú, pe̍h-chha̍t saⁿ nî

妻大舅今年六十外，頭pái做阿公，雖然是火灰公，m̄是內公，猶原歡喜kah，妻大妗對chit ê第一ê外孫女，顧kah ná寶--leh！見pái來thit-thô，一定in hit-ê金孫玉孫tòe tiâu-tiâu，chit-ê時陣，hit-ê寶貝孫--ê in老母，soah變做tòe sōm--ê！

Nā ka聽in ê對話，有影真心適，一句來、一句去，你都聽tio̍h ē ài笑，m̄是笑in leh展in cha-bó͘孫有lōa súi，有lŏa-nī古錐，是leh笑in kui口灶人ná ē chiah gâu pûn-ke-kui，m̄-chiah八、九kò月ê紅嬰á niā-niā，都iáu未tō͘-chè，tio̍h講kah lōa巧tú lōa巧、gōa精tú gōa精--leh！

大妗án-ne講：實在有影巧，ē-hiáu叫阿媽neh！

Gín-á in母--à：媽！M̄是leh叫阿媽--lah！紫雲leh叫pa-pa、ma-ma--lah！阿姑！M̄信我lāng hō͘你看！紫雲！Gū！Gū！Gū！

Gín-á紫雲：U！U！U！…Pa！Pa！…Pa！Pa！…Ma！Ma！Ma！…

阿姑！Koh ē叫你--ō͘，有khoàiⁿ--無！嘴--ni̍h又koh teh o͘、o͘、o͘，leh kap你phah招呼lah！可惜bē-hiáu叫姑婆…

實在有影，「做一ê老母，白賊三年」。台語ê基本母音，本來to̍h是a、e、i、o͘、u、o，人講七坐、八爬、九發牙，八、九kò月ê gín-á，ná有he bē-hiáu pa-pa、ma-ma開始學話，你nā kah伊講愈chē，伊to̍h ē-hiáu khah緊kap你i-i a-a，做爸母--ê，你nā ài恁kiáⁿ khah緊叫恁阿爸、阿娘，建議你，khah捷叫「阿爸、阿娘」hō͘恁kiáⁿ聽，雖是笑話，mā是有影，你nā無ka教，伊boeh ná ē ē-hiáu，用想--ê mā知影。

為siáⁿ-mih「做一ê老母，白賊三年」？母愛ê偉大tī chia，自咱紅紅幼幼來出世，lóng是依倚tī老母ê身邊，食奶、搖睏、la̍k屎、la̍k尿，tó chi̍t-ê做a娘--ê m̄知影kiáⁿ ê輕重，笑siáⁿ-mih調，háu siáⁿ款聲，老母一聽to̍h知咱boeh ài siáⁿ，莫怪嬰á nā ŏaⁿ--一聲，老母隨時kā你解說做boeh洗身軀，boeh換尿chū-á，pa、pa、pa，歡喜tang-tang，阿母mā歡喜講你ē叫阿爸，做過老母ê人，你講有影a̍h無影！

「做一ê老母，白賊三年」，這m̄是leh笑天腳下ê老母m̄是，實在是leh o-ló母親 ê愛心，奉勸當今ê少年老母，io-kiáⁿ siāng好ka-tī來，母kiáⁿ連心m̄是chhìn-chhái to̍h ē-sái，你nā無親手io，定tio̍h無法度ioh嬰á tī時boeh放尿，nā m̄是ka-tī親手chhiâⁿ，kiáⁿ boeh ài siáⁿ可能你mā m̄知影？

【註解】