〈133〉

過橋khah chē你行路；食鹽khah chē你食米

Kòe kiô khah chē lí kiâⁿ lō͘; Chia̍h iâm khah chē lí chia̍h bí

有仁á叔公，boeh點束柴m̄ tio̍h用lài-tah來點khah好勢，lài-tah tī chia，hō͘你點。

免！用siáⁿ-mih lài-tah？Chit-mái ê少年，kiàn-siūⁿ都想hit-lō pān-tōaⁿ步，我用án-ne點to̍h ē-sái--chit。

有仁á叔公！Án-ne是boeh點kah tang時，束柴chiah大堆，kan-nā at香腳boeh來引火，siuⁿ慢--lah！

Liâm-mi to̍h boeh開始祭祖，無趕緊--leh，ē bē赴--ō͘！

！做你tiām-tiām--lah，我「過橋khah chē你行路；食鹽khah chē你食米。」你知chē siáⁿ？你iáu leh穿開腳褲á ê時，恁叔公to̍h點kúi-nā年--ā，你也想boeh kâ指教？

有仁á叔公！M̄是án-ne--lah，我是驚bē赴hō͘人thang拜祖，m̄-chiah án-ne建議，nā免to̍h做你點，pháiⁿ勢--lah！

「過橋khah chē你行路；食鹽khah chē你食米」。中國話講--ê『倚老賣老』to̍h是chit-ê意思。頂面chit-ê少年--ê ē kap老歲á議論，to̍h是為tio̍h老一輩執訣bē開通，kan-nā靠勢年齡chē、輩分koân，to̍h boeh壓倒下輩，chit款觀念實在是tòe bē tio̍h時勢--lò͘，tn̄g tio̍h有chām-chat ê少年，iáu知影尊重sī大，nā tn̄g tio̍h m̄-bat大細ê新新人類，m̄ tio̍h冤家lo-chè soah尾，其實chit種代溝ê爭論，自古to̍h有例thang講gī-niū，咱來看蕭姓祭祖歌內面ê幾句，to̍h ē-tàng了解chit種文化ê可笑kap無奈。

先輩紳士執古禮，後輩少年boeh改例，現時古輩人siāng chē，一時的確難得改（ké）。

老幼ta̍k-ê來議論，一人一句亂紛紛，有ê想boeh khah phah-phún，有ê boeh儉來chhun存。

先輩靠勢m̄認輸，少年豪傑識時務，認真計較pháiⁿ意思，讓hō͘老輩去請龜。

Boeh了解蕭姓祭祖ê鬧熱kap趣味，請看蕭平治整理「蕭姓祭祖歌」。

【註解】