Phah開人生另外一扇窗
歡喜你進入台文世界
《台灣俗語鹹酸甜》chit本冊kan-nā贈送無leh賣，所以讀者無一定限tī愛讀台語冊ê朋友，你nā是頭一擺看tio̍h án-ne寫ê台語文，m̄管你看有a̍h是看無，先kā你說謝會一下á多謝，感謝！Ló͘-la̍t！感謝你咱ê結緣，mā歡喜你開始boeh認bat台語文。掀開chit本《台灣俗語鹹酸甜》，boeh看進前，想boeh kap你開講幾句話，thang好引chhōa你進入台文世界，phah開人生另外一扇窗，做夥來欣賞文雅優美súi-tang-tang ê台灣話，了解台語文是leh án-chóaⁿ來表達純正ê台灣話，sūn-sòa來欣賞台灣人講話ê智慧，咱祖先留hō͘咱生活ê文化資產，了解俗語是leh講siáⁿ貨。
《台灣俗語鹹酸甜》第一集出冊了後，得tio̍h chiâⁿ chē朋友ê回應，有大學教授討去做台語課ê教材，有語言教授寫批來o-ló chit本冊ê價值性，有關心母語ê學者提出伊ê看法kap建議，koh有人用心看了後，將內容ê gō͘-tāⁿ整理出來hō͘我做參考，上hō͘人感心--ê to̍h是董育儒老師，伊將冊ùi頭看到尾，直接tī冊內一字一字校正，一詞一句稽考，sūn-sòa提出伊ka-tī ê意見看法，chiah koh將冊寄轉來hō͘我參考，mā有人khà電話來直接開講，o-ló kap討論。
鎮內ê鄉親提著chit本冊，大部分人lóng感覺chiâⁿ怪奇，好玄兼懷疑，這是siáⁿ-mih碗糕冊，分量koh不止á重，有漢字，mā有a b c，he是siáⁿ-mih字，leh寫siáⁿ-mih道理？有ê提冊來討論，想boeh了解內底ê意義，有ê隨時提出想boeh來學羅馬字，mā有人提出懷疑ê態度，用khau洗ê口氣來談論漢文、白話，中國話、台灣話，漢字、羅馬字ê關聯性…。 實在講，對o-ló ê朋友khah好應話，用謙虛客氣ê態度來分析boeh用漢羅lām寫ê原因kap伊ê實用性，大概to̍h ē-tàng說服in ê疑問，改變in ê觀念，khah pháiⁿ紡--ê to̍h是hiah ê khah致重漢字、漢文底khah深ê先覺，boeh kap伊討論漢字ê字腹，漢文ê才調，是無hit-lō能力，boeh kap伊討論中國話、漢文、台灣話、羅馬字ê關聯性…，講--起-來話頭長，mā無hit款專家ê腹底來講hō͘伊有一支柄thang giâ，只好「雞嘴變鴨嘴」，『住口』，mài koh對立，chiah bē傷感情。
真失禮，感覺chiâⁿ pháiⁿ勢，che to̍h是問題，chiâⁿ pháiⁿ liú-la̍k ê問題，m̄知困擾lōa chē boeh看台文冊，boeh學台文寫作ê鄉親：「eng-tio̍h」風飛沙ê「eng-tio̍h」boeh án-chóaⁿ寫？用「英tio̍h」a̍h是「英到」；「你boeh去toeh」a̍h是「你欲去tó位」；「阮阿祖無去」a̍h是「阮阿祖--無-去」；「boeh看bē使看」到底是寫「欲看未使看」khah好，a̍h是寫「卜看𣍐使看」、「要看袂使看」…其中ê欲（io̍k）要（iàu）是借意，未（bī，bē，bōe）是『尚未』，𣍐、袂是台語新造字，用手寫無問題，phah電腦可能有麻煩，bē-tàng直接phah，卜（pok）siāng奇怪，借音借意lóng m̄是，卻是ta̍k-ê lóng ē了解伊ê意思，ná ē chiah-nī怪奇？無siáⁿ-mih？因為台灣人頭殼siāng kài讚，siāng gâu翻譯，siāng gâu ioh（猜）字，事實siāng台灣人leh讀台語，根本to̍h是leh使用一台翻譯機器──頭腦，m̄-chiah全用漢字寫ê台語文多數人看了khah慣勢。M̄-chiah自細漢到taⁿ，常常聽人提出chia-ê有問題ê漢字leh展覽伊ê才調，一人講一款，罕得有人péng字典來證明，ká-ná為tio̍h tah chit字漢字khah有意思，tō議論紛紛，sio-chèⁿ不止，各人lóng有一說，siāng kài有學問ê學者chhōe出古早字，卻是chiâⁿ pháiⁿ認，chiâⁿ pháiⁿ記智，chit pái認bat，後pái又koh bē記--tit，相信ta̍k-ê lóng有chit款經驗。 台語文ê推sak，boeh救轉來走精失落去ê台語，借字借意，chhōe古字，造新字，lóng m̄是好辦法，根據專家ê研究，台灣話大約有20%使用漢字有問題，其中15%是古早字，5%是根本to̍h m̄是漢語，當然to̍h無漢字，boeh án-chóaⁿ處理？Boeh如何排解？目前siāng簡單siāng好用ê辦法to̍h是兼用拼音字，有問題、有議論ê漢字，chhân-chhân放sak mài koh用，lóng來用羅馬字，只要你nā ē-hiáu羅馬字，ē-hiáu講台語，相信一切lóng thang處理，學ē-hiáu羅馬字，「chi̍t-pái OK」，che to̍h是寫chit本俗語鹹酸甜ē用漢羅lām寫ê原因。
M̄管贊同無贊同，nā是朋友boeh聽我「讀」幾篇á俗語鹹酸甜hō͘恁聽，尾á ê反應lóng ē tìm頭講「有通」、「gâu寫」，特別是大tīn人ê聚會時，頭起先ta̍k-ê tiām-tiām聽我唸，thèng-hāu一篇讀soah了後，大多數ê人to̍h ē微微á笑，然後koh再讀第二篇，in to̍h ē注神tòe-leh看冊內ê句讀，有ê ē細聲tòe唸，到kah第三篇唸完，to̍h ē聽著pho̍k-á聲響起來，第四篇開始叫ta̍k-ê試唸，to̍h ē注神兼微笑，ná讀ná tìm頭，hit種爽入骨髓ê滿意，ùi in ê面chhiuⁿ to̍h hō͘人看ē出來，為siáⁿ-mih？為siáⁿ-mih ē án-ne反應？Che應該是「母語」ê母性leh發酵（hoat-kàⁿ），是khǹg tiàm心內母親聲影ê呼喊（ho͘-hiàm），因為ta̍k-ê從來to̍h m̄-bat用讀--ê讀出ka-tī母語ê正音，每一pái tn̄g tio̍h chit款回應，lóng ē-tàng發覺：Tī漢字chiâⁿ pháiⁿ解決ê句讀中，用羅馬字to̍h ka處理好勢，發出純正ê母語之聲，ta̍k-ê lóng不時tìm頭認同。
人生親像tòa-tī一間房間內，房間ê窗á門nā愈chē扇，看出去ê世界就愈曠闊，特別是認bat ka-tī ê母語，看用純正母語表達ê台語文，來了解咱ka-tī ê台灣事，免翻譯，免解說，bē lo-thi，chiâⁿ直接，敢m̄是一項好tāi-chì，爽入心肝ìⁿ-á ê趣味，phah開台語文ê窗á，請你入來參觀ē sái--chit，請入來tàu腳手mā可以，m̄-kú boeh入來ê時，先拜託你sió思考下面台語文讀寫訓練基本觀念：
台灣情、台灣話、台語文：台語思考讀台文，寫台文。
讀台語文章，寫台灣話文，有人叫是kan-nā為tio̍h趣味，其實做chit項工課是為tio̍h愛台灣，siāng實際ê投入，有人讀to̍h有市場，有人寫chiah有恢復台語ê可能，為tio̍h愛台灣，為tio̍h愛chit塊土地，請你講母語，請你讀台文，進一步請你來寫台文。
台語聲韻ê認識：聲符、韻符、聲調，八聲、入聲、變調、固定輕聲、隨前變調、á變調。
Gín-á學生為tio̍h boeh讀北京語，to̍h ài費10禮拜ê上課來學ㄅㄆㄇ，咱boeh學讀、寫台語，kám免費淡薄á時間、精神？
台語ê文白音：有漢字to̍h有漢文音，台灣話無一定ta̍k音lóng有漢字thang寫。
有人講咱ê台語siāng古老，是老khok-khok ê中原古早話，用台語來吟詩，讀古早ê唐詩，好聽koh押韻。無m̄ tio̍h，有漢字to̍h有漢文音，a̍h nā he漢字表達bē出來ê台灣話--leh ？所以che kan-nā講tio̍h一半，中原古音是漢文，m̄是台語ê全部，台語iáu有白話、南島語、平埔話kap外來語…
方音差：漳音、泉音、海口腔、永靖腔、宜蘭腔、關廟腔。
過去政府ê國語政策，kā咱ê台語講做是北京語ê方言，che是錯誤--ê，漳音、泉音、海口腔、永靖腔、宜蘭腔、關廟腔…chiah是台語Hô-ló話ê方音，腔口無kāng，m̄-kú聽有。台語nā是北京語ê方言，ná ē翻來翻去，轉來轉去lóng bē好勢？台語是台語，北京語是北京語，有通透（相通)，無相kāng。
台語文ê用字：漢字lām羅馬字（白話字）。
用漢字描寫台灣話：80%無問題，15%有議論，5%無可能。
教會羅馬字ē-tàng解決15%有議論，5%無可能ê台灣話，ē-sái-chit標音，mā ē-sái-chit當做文字。
漢羅lām寫ê台語文是目前siāng kài好用ê方式。
失落去ê台語詞彙，北京語化ê台語，外來語。
Chit-mái ê台灣人，m̄是bē-hiáu講台語，to̍h是台語講bē輾轉（lián-tńg），無to̍h講北京語化ê台語，有才調ê人規氣講外來語，khah bē hō͘人lia̍h包。Boeh tah chhōe（尋）純正ê台灣話，愈ki-chân ê作穡做工鄉親，愈無讀冊ê兄弟，a̍h是kap社會khah無交陪ê姊妹，ùi in ê 嘴khang puh出來ê台語，chiah是純正無比ê祖公祖媽ê母語。朋友！鄉親！M̄-thang批評in ê話粗俗欠雅氣，boeh講有氣質、súi-tang-tang ê台語──咱ê話，是ài靠咱有讀冊ê讀冊人來整理，用智慧kā粧tháⁿ，經過化妝ê語言chiah ē súi-khùi，che是咱讀冊人ê責任，千萬m̄-thang像一寡做官--ê食頭路--ê，kan-nā為tio̍h boeh升官，做chi̍t-ê台灣人，偏偏m̄講台灣話，理由規大堆，道理規桌櫃，kan-nā boeh講國語，時到候到，選舉到，chiah知thang用台語來騙選票，in講he是不得已，有影--lah，不得已！M̄-kú『不得了』，咱ê台語，少年--ê已經bē-hiáu，阿母ê話，祖公祖媽ê根頭，giōng-boeh斷了了。
台語文字化（台文）ê資訊化：台語電腦化（HOTSYS® ê 紹介）
HOTSYS® to̍h是Hō-ló台文系統：（HOTSYS®台灣版7.0──T-Windows 95 T-Word 7.0） 台語輸入法：ē-hiáu講台語ê人，只要學ē-hiáu羅馬字，to̍h ē-hiáu用電腦phah台文。 台語思考，台語音韻發音，tī字盤chhi̍h羅馬字a e i o͘ u o來phah台語文。 羅馬字部分ē-tàng phah調號，當做文字，通行世界。
羅馬字ê調號ē-tàng轉化做1.2.3.5.7.8 ê文字檔案，tī e-mail送來送去，通行網路。 你講HOTSYS®是m̄是chiâⁿ好用--leh，chit本《台灣俗語鹹酸甜》to̍h是用chit-ê軟體tī電腦寫作--出-來-ê。
Chiâⁿ歡喜用chit本冊kap你結緣，nā有siáⁿ-mih見解，siáⁿ-mih疑問，siáⁿ-mih建議，lóng chiâⁿ向望你撥時間來討論開講，台語文寫作，iáu leh學習中，需要朋友ê提供意見kap鼓勵，好--ê tàu鼓勵tàu推sak，bái--ê mā tio̍h指教，有批評有指導chiah ē進步，為tio̍h台語文ê進步，ē受tio̍h ta̍k-ê接受，請你多多指導，感謝！勞力！
蕭平治＜Siau Lah-jih＞敬上
【本文bat用華語刊tī《台灣俗語鹹酸甜》第二冊】