〈003〉
偷lia̍h雞，mā tio̍h一把米
Thau lia̍h ke, mā tio̍h chi̍t pé bí
朋友ê後生已經30 gōa，為tio̍h娶bó͘一直bē快活，hm̂人紹介十幾ê，無1-ê伊boeh去對看，因為chit-mái無leh流行這；朋友、親chiâⁿ相介紹，紹介適合ê cha-bó͘ gín-á kah伊熟sāi，叫in先做朋友行看māi，ē ha̍h chiah來做親結連理；án-ne mā是經過十幾ê，無khah-choa̍h，m̄是伊看bē chiūⁿ目，to̍h是人無kah-ì。為sím-mih？伊看bē chiūⁿ目--ê，m̄是bái，to̍h是tiām-chih-chih ná é-káu hit款式；人看伊無kah-ì--ê，原因tī toh位，無人知機，看伊一表人才，ná ē chiah-nī無人氣？
經過老母一下chhiû，一直問，問伊kah人約會ê tāi-chì： 「Ah都人去看電影我請--伊，食點心換hō͘伊出錢，ò͘尾人伊to̍h án-ne講：後pái你m̄免koh邀請，阮無愛去。」 「Aih--ioh！Gōng kiáⁿ--ê！你ná tio̍h hiah hân-san，儉錢ài看款，boeh交cha-bó͘朋友，bē-sái-tit chiah tàng-sng；「偷lia̍h 雞，mā tio̍h一把米。」Kám講你m̄知這lō道理，後pái tio̍h ē記--得，kah cha-bó͘ gín-á出門，m̄-thang hông破費。」
「偷lia̍h雞，mā tio̍h一把米。」做任何tāi-chì lóng kāng款，lóng ài hē本錢，空手是做bē成事業；另外，『羊毛出在羊身上』，人nā leh hoah sio̍k貨，買一送二，a̍h是贈品加減送，he是seng-lí人bat「偷lia̍h雞，mā tio̍h一把米」ê道理，你tio̍h目chiu peh ho͘金，m̄-thang sio̍k貨食破家，to̍h冤枉--lò͘。
【註解】
| 詞 | 解說 |
| Lia̍h | 『抓』。 |
| Mā tio̍h | 『也得』。 |
| 一把米 | Chi̍t-pé-bí。 |
| Hm̂人 | 『媒人』。 |
| 親chiâⁿ | Chhin-chiâⁿ，親情，『親戚』。 |
| Cha-bó͘ | 女性，女人。 |
| Gín-á | 『孩子』。 |
| Cha-bó͘ gín-á | 『女孩子』。 |
| 熟sāi | Se̍k-sāi，『認識』。 |
| In | 『他們』。 |
| 行看māi | 男女朋友交陪叫「行」，『先做朋友看看』。 |
| Chiah來 | 『才來』。 |
| 結連理 | 結為夫妻。 |
| 無khah-choa̍h | 無lō͘用。 |
| 看bē chiūⁿ目 | 『看不上眼』。 |
| Kah-ì | 『喜歡』。 |
| Bái | 無súi，『醜』。 |
| Tiām | 『安靜』，『沈默』。 |
| Ná | 親像。 |
| É-káu | 『啞巴』。 |
| Tiām-chih-chih ná é-káu | 『沈默得像啞巴』。 |
| Hit | 『那種』。 |
| Toh位 | 『哪裡』。 |
| Ná ē | 『怎麼會』。 |
| Chiah-nī | 『這麼』。 |
| Chhiû | 『抽絲剝繭的』。 |
| Tāi-chì | 『事情』。 |
| Ah都 | Ah to，語頭詞。 |
| Ò͘尾 | 路尾，『最後』。 |
| Pái | 『次』。 |
| 後pái | 『下次』。 |
| 阮 | 『我』。 |
| Aih--ioh | 形聲詞。 |
| Gōng kiáⁿ--ê | 『傻孩子啊』！ |
| Ná tio̍h | 『哪需要』。 |
| Hiah hân-san | 『那麼吝嗇』。 |
| Chiah tàng-sng | 『那麼吝嗇』。 |
| Kám | 『難道』。 |
| Kám講 | 『難道說』。 |
| Hē本錢 | 『下本錢』。 |
| Hē | 『放』。 |
| Hoah | 『喊』。 |
| Sio̍k | 『便宜』。 |
| A̍h是 | 『或是』。 |
| Bat | 『懂得』。 |
| Peh ho͘金 | 『睜得雪亮』。 |
| Lò͘ | 語尾感嘆詞。 |