〈084〉

人teh食米粉，tòe人leh hoah燒

Lâng teh chia̍h bí-hún, tòe lâng leh hoah sio

「朋友！Chit pái ê代表、里長選舉hām你siáⁿ tī-tāi？」

「Ná ē有？Kan-taⁿ ē記得投我一票to̍h ē-sái--tit！」

「你是m̄是候選人？」

「M̄是！」

「你是m̄是運動員？」

「Mā m̄是！」

「Ah無！你是teh hām人leh熱phut-phut siáⁿ siâu？」

選舉運動人leh piàⁿ勢膨風，講伊jōa有才調，講伊有jōa敢講jōa敢衝，目的是為tio̍h選tiâu boeh iāng a̍h是thang施展伊ê理想。Thiau-á-kha是伊ê kāng-koah，為tio̍h主人走chông，助選大聲pòng，pòng講in主人jōa有勢面，頂面有大人，社會有交陪，選伊做里長（也是民意代表），boeh建設，boeh服務，lóng無問題。

「Ah你a豬、a狗算siáⁿ-mih？Ah也hām人kho̍k-kho̍k-chông，到底你是leh kā siáng tàu-kha手，支持toh chi̍t-ê？」

「無--lah！看人選舉運動，心情to̍h爽，無án-ne sì-kòe hām人bóng chông，一日êng sian-sian人ē發狂。人我án-ne bóng講bóng chông，tòe人hoah i-o，kā候選人tàu分宣傳單，人lóng mā講好，講咱khah輕好央叫。你kám知，咱庄內saⁿ-ê候選人我lóng chhap，chit pêng有薰thang pok，hit pêng有飯包thang食，另外hit-ê koh有紅包thèng好the̍h。Hit種ê sáng勢，有jōa爽？無chhap--tio̍h你to̍h m̄知影。」

「人teh食米粉，tòe人leh hoah燒，」to̍h是chit款人。運動會ài鬧熱，有人比賽，有人hoah聲加油，án-ne運動會ê氣氛m̄-chiah鬧熱ē起--來。民主時代，民權實施tio̍h選舉，ná ē變做運動變kah chiah-nī無正常？是人愛鬧熱，a̍h是人愛權利？為tio̍h面子，為tio̍h輸人m̄輸陣，chiah ē ta̍k-ê piàⁿ kah真無細jī，無客氣，結果是bái是好，ta̍k-ê心內知知。總--是每pái選舉hō͘一種人siāng歡喜，siáⁿ-mih款人？To̍h是「人teh食米粉，tòe人leh hoah燒」chit款人。請問，你是a̍h m̄是？

【註解】