〈006〉
Boeh做sàn-chhiah人cha-bó͘-kiáⁿ，m̄做好gia̍h人新婦
Boeh chò sàn-chhiah- lâng cha-bó͘-kiáⁿ, m̄ chò hó-gia̍h-lâng sim-pū
做人新婦tio̍h知道理，òaⁿ-òaⁿ去睏早早起， 煩惱細叔娶bó͘無眠床，煩惱小姑boeh嫁無嫁妝……。 做人新婦實在無簡單。
做人cha-bó͘-kiáⁿ--leh？Thàn錢thàn sai-khia，食飯食俺爹，ta̍k工boeh thit-thô看電視，看kah三更半暝chiah去睏，早早起m̄免輪tio̍h伊，因為厝內khang-khòe有1-ê『老媽子』leh整理。
平平是cha-bó͘人，你boeh做toh 1-ê？Ah nā是sàn-chhiah人cha-bó͘-kiáⁿ hām好gia̍h人新婦相比，你boeh揀toh一位khah有人生意義。 Sàn-chhiah人cha-bó͘-kiáⁿ，雖bóng食穿khah無，m̄-koh chiâⁿ自由khah bē lo-so，無人壓迫，生活khah心適；好gia̍h人新婦，身穿súi-tang-tang，phoa̍h-liān chhiú-chí萬百項，m̄-koh應酬chē，koh tio̍h有孝ta-koaⁿ、ta-ke，khang-khòe特別chē，日子無你想--ê hiah心適、hiah好過。「Boeh sàn-chhiah人cha-bó͘-kiáⁿ，m̄做好gia̍h人新婦。」早to̍h有人論--過，自由ê可貴tī chia看ē--出-來。
人生過程，出世，做gín-á讀冊，大hàn結婚生kiáⁿ，人生咱，咱生人，天地生成，kám講一生堅心m̄嫁，boeh做老姑婆？Nā án-ne，你kám有另外ê人生觀來解說運命？時代leh變，ta̍k-ê khah開化，m̄管是cha-bó͘-kiáⁿ a̍h新婦，lóng是kāng款tio̍h疼，m̄管是親父母a̍h ta-ke-koaⁿ，lóng tio̍h照起工有孝khah有影。Nā有這款觀念，koán-thāi伊hó-gia̍h sàn，lóng ē得tio̍h快樂生活。
【註解】
| 詞 | 解說 | |
| Sàn-chhiah人 | Sàn-chhiah人、Sàn-hiong人、Sòng-hiong人，『窮人』。 | |
| 好gia̍h | 『有錢』。 | |
| 新婦 | Sin-pū，『媳婦』。 | |
| Òaⁿ-òaⁿ | 『遲遲慢慢』。 | |
| 細叔 | 『小叔』。 | |
| Sai-khia | 『私房錢』。 | |
| 俺爹 | Án-tia，ka-tī ê老父。 | |
| 揀 | Kéng。 | |
| M̄-koh | 『但是』，『不過』。 | |
| Chiâⁿ | 『非常』，『很』。 | |
| 身穿súi-tang-tang | 『穿著很美』。 | |
| Phoa̍h-liān chhiú-chí | 『項鍊，戒指』。 | |
| 萬百項 | Chiâⁿ chē。 | |
| Ta-koaⁿ | 『公公』。 | |
| Ta-ke | 『婆婆』。 | |
| Tī chia | 『在這裡』。 | |
| 大hàn | 『長大』。 | |
| 老姑婆 | 『老處女』。 | |
| Koán-thāi伊 | 『管他的』。 | |
| Hó-gia̍h sàn | 好額sàn，『富人窮人』。 |