〈011〉

耳á後無sian，cha-bó͘ cha-po͘ to̍h ē變

Hīⁿ-á āu bô sian, cha-bó͘ cha-po͘ to̍h ē piàn

今年這班三年á生，不止á kó͘-chui、幼chíⁿ，天真活潑koh愛sńg，尤其是cha-po͘ gín-á，下課ê鐘聲nā tân，to̍h相cheⁿ mo͘h球落樓kha ī siàng疼--ê，每1-pái lóng是sńg kah kui身軀重汗；到ē-po͘放學ê時chūn，已經kui身烏sô-sô，mā無想boeh洗洗拭拭--leh，咱kan-taⁿ看to̍h艱苦，人in猶原是笑bi-bi，有thang sńg to̍h好，siāng煩惱--ê to̍h是驚我禁止in thit-thô。

初中gín-á to̍h無siáⁿ kâng。大部分ê學生，m̄管伊cha-po͘ cha-bó͘，ta̍k-ê開始愛súi、愛妝，cha-po͘ gín-á穿chhah boeh激大人氣口，頭毛lōa kah真整齊，cha-bó͘ gín-á koh khah愛打扮，ē-hiáu注意內衫ê樣式，nā m̄是學校有限制，頭毛kiám-chhái ē電kah khiû-khiû-khiû koh染色；ná ē án-ne？是m̄是in leh起hoán-hêng m̄聽話？M̄是，是因為in已經進入青春期，gín-á leh tńg大人--ā。做老師、做父母ê人，nā無sió-khóa體貼chiah-ê少年人ê想法，kioh-sī in leh變pháiⁿ，án-ne to̍h差大碼--lò͘。

奉勸各位做人父母ê家長，lín tau nā有hit-lō ài phah ko̍k-ke ê少年家，a̍h是有hit-lō『吾家有女初長成』ê少女，lín tio̍h注意，「耳á後無sian，cha-bó͘ cha-po͘ to̍h ē變。」這句俗語to̍h是leh kā你提醒，看學生gín-á ê身軀有生sian無生sian，阮老師有khah無方便，請lín tio̍h ka-tī關心。當然chín ê時代khah衛生，boeh看生sian khah無可能，教lín一步，lín tau少年cha-po͘後生、cha-bó͘ kiáⁿ，nā是入去浴室kui半po͘，洗身軀ta̍uh-ta̍uh-á bong，恭喜，這是in大hàn ê開始，lín tio̍h關心細jī。

【註解】

詞 解說
Sian 『身上的污垢』。
To̍h ē變 『就會改變打扮』。
Kó͘-chui 『可愛』。
幼chíⁿ 幼稚。
愛sńg 『好玩』。
Cha-po͘ gín-á 『男孩子』。
Tân 響。
Mo͘h球 『抱球』。
樓kha 『樓下』。
Ī siàng疼--ê 『玩打痛的遊戲』。
Kui 『全』。
Kui身軀tāng汗 『滿頭大汗』。
E-po͘ 下晡，『下午』。
烏sô-sô 『髒兮兮的』。
Kan-taⁿ看--tio̍h to̍h艱苦 『光是看了就不舒服』。
笑bi-bi 笑微微，『笑嘻嘻』。
有thang sńg to̍h好 『有得玩就好』。
Kâng 『相同』。
Ta̍k 『每』。
穿chhah 穿插，『穿tio̍h』。
激大人氣口 『妝扮大人模樣』。
Lōa 『梳頭髮』。
Ē-hiáu 『會』。
Kiám-chhái 可能，大概。
叛逆 Poān-ge̍k。
差大碼--lò͘ 差真chē，siuⁿ離經。
Lín 『你們』。
Tau 『家』。
Hit-lō 『那種』。
Phah ko̍k-ke 『小公雞學啼』。
Chín Chit-mái，現在。
Kui半po͘ 『老半天』。
Ta̍uh-ta̍uh-á bong 慢慢á洗，『東摸西摸的』。

results matching ""

    No results matching ""