〈028〉

好好鱟，thâi kah屎流

Hó hó hāu, thâi kah sái-lâu

前幾工舊厝邊康--先生ùi Ông-keng買tńg來一隻鱟，問我敢食？Ai-ioh！He thài ē敢--leh！看伊ngia̍uh-ngia̍uh nǹg，生做hiah-nī無kāng款，是罕得看--tio̍h ê生物，boeh叫我食伊ê肉，phah死mā m̄敢。

詳細看，鱟生做圓圓ê盤á形，是伊ê殼，一支尾liu ná柴á枝長長翹翹，kā péng過來看腹tó͘，生五對ê kha爪，hām毛蟹kha kāng款，腹tó͘ mā有薄膜kúi-nā têng，mā hām毛蟹ê膜kāng款。聽康--先生講，thâi鱟無簡單，鱟殼內底ê肉膏膏，無細jī nā去ho͘ chuh–chhut-lâi，to̍h無chhái leh thâi--ā；尤其是處理腹內ê時，nā是去hō͘屎kō--tio̍h，kui隻鱟to̍h臭mi-mo͘，無人敢食，聽講鱟ê屎chiâⁿ臭。（M̄知有影--無？）

「好好鱟，thâi kah屎流」，原來to̍h是án-ne--ò͘！

Ta̍k-ê是好厝邊，to̍h kā康--先-生講chi̍t ê sńg笑：

「康--先-生！舊年你紹介hit chân親chiâⁿ，lóng是你kāu話，加講chi̍t-kóa無lō͘用話，chiah ē講kah開花--去，這to̍h是「好好鱟，thâi kah屎流」--lah！」

「To̍h是án-ne--m̄，ham-bān講話實在有khah輸，其實我mā無pháiⁿ意，siáng知in ē kâ誤會，無chhái一段好姻緣，mā無chhái一包紅包，soah thàn無tio̍h。」

「好好鱟，thâi kah屎流」，mā有人講做「好好鱉，thâi kah屎流」，kiám-chhái thâi鱉hām thâi鱟kāng款pháiⁿ thâi ê款。

【註解】