〈031〉

Chíⁿ瓜無nn̂g，chíⁿ kiáⁿ無肚腸

Chíⁿ koe bô nn̂g, chíⁿ kiáⁿ bô tō͘-tn̂g

【一】

Hit日阮學校慶祝兒童節，舉辦園遊會，Siau Lah-jih開店賣碗粿，園遊會結束了後：

「老師ài請！老師ài請！」 「是án-chóaⁿ老師ài請？」 「Ah老師今á日有thàn錢--ā，賣真chē碗粿。老師thàn真chē錢，ài請阮--lah！」 「Hò͘！Án-ne--ò͘！Lín做我ê cha-bó͘-kiáⁿ kong？」 「人chiâ boeh！」 「Ah也m̄是阮cha-bó͘-kiáⁿ，是án-chóaⁿ tio̍h請lín--leh？」 「人m̄--leh！Ài請--阮to̍h是ài請--阮！」 「Ná有人chiah-nī番ê gín-á？」 「Ah無老師lóng thàn hiah-chē錢kong！」 （Ài請！Ài請！Ài請！Ài請！…） 「好--ah-lah！Bîn-á-chài老師買糖á請--lín！」 「『謝謝老師！』老師多謝！老師勞力！『老師萬歲！』」 …… 「Chíⁿ瓜無nn̂g，chíⁿ kiáⁿ無肚腸，」chiah可愛ê gín-á。

【二】

「A吉--ah！Cha-hng你ná無來讀冊？」 「阮a爸hām阮a-niâ oan-ke！」 「Ah有相phah--無？」 「有--ō͘！阮a爸用手搧a母，a母giâ棍á kòng a爸，phah kah真厲害，m̄-chiah無來學校。」 …… 「Chíⁿ瓜無nn̂g，chíⁿ kiáⁿ無肚腸，」講kah chiâⁿ實在，m̄-koh hō͘人聽tio̍h chiâⁿ悲哀。

【三】

「老師！王小慧kah黃淑芬tú-chiah leh相chim--ō͘！」 「O͘-pe̍h講，in nn̄g-ê leh講細聲話--lah！」 「Tio̍h--lah！老師問lín chi̍t-ê問題，ká-sú今á日lín tńg去厝--ni̍h，hiông-hiông看tio̍h爸爸kah媽媽mo͘h-leh相chim ……」 「老師chhiu、chhiu、chhiu，bē kiàn-siàu，講leh相chim--lah，bē kiàn-siàu。」 「聽ho͘清楚，mài烏白講話！老師是leh問lín chi̍t-ê問題，ká-sú今á日lín tńg去厝--ni̍h，hiông-hiông看tio̍h爸爸kah媽媽mo͘h leh相chim，lín感覺歡喜a̍h是感覺siū氣，感覺真歡喜--ê gia̍h手。」 （全班40 ê，gia̍h手--ê 40 ê。） 「班長！你講siáⁿ-mih理由。」 「爸爸愛媽媽kong，án-ne阮ē chiok歡喜--ê neh！」 「Tio̍h！爸爸nā愛媽媽，咱ê家庭to̍h幸福。」 …… 性教育ùi chia教起，因為「chíⁿ瓜無nn̂g，chíⁿ kiáⁿ無肚腸」，幼chíⁿ純潔ê時chūn，教正確ê觀念，siāng快吸收。

【註解】