〈041〉
一聲m̄知，百聲無tāi
Chi̍t siaⁿ m̄-chai, pah siaⁿ bô-tāi
「能--者多勞」這句話是leh o-ló--人-ê，mā是boeh拜託人tàu-kha手ê好聽話。人--mah，siáⁿ人無愛聽好聽話！聽講這方面ê tāi-chì你khah ē，你khah khiàng，做khah ē好勢，m̄-chiah tio̍h來勞煩你！（當然無問題，一定kā人幫忙到底。）這chân tāi，無你bē-sái--tit，你nā koh推外外，全學校是boeh koh chhōe siáⁿ人？（甜湯一下灌，萬事OK，khang-khòe hoa̍t-lo̍h kah好勢好勢。）
Kó͘-ì人khah bē-hiáu hau-siâu，ē to̍h ē，bē to̍h bē，ē-hiáu講bē-hiáu，這款pe̍h-chha̍t話，講khah bē出嘴。「能--者多勞」，做了一下chē，m̄-nā ka-tī ē起怨慼，mā ē hō͘人目kang赤，hō͘人gê-siâu，boeh án-chóaⁿ？教你一步，也soah bē-hiáu學hit-lō kia̍t-á哥，「一聲m̄知，百聲無tāi」，實在有功效。
其實做人m̄免siuⁿ計較，ē做盡量做，ná tio̍h計較siáⁿ-mih功勞。有功boeh來搶，有利chiah boeh來做，這款人生未免過頭利己。你nā boeh利己，萬一nā tn̄g tio̍h少功koh少利，無tiāⁿ-tio̍h有功無賞，phah破tio̍h賠ê khang-khòe boeh叫你做，這時chūn，the̍h出寶貝，「一聲m̄知，百聲無tāi」，這我bē-hiáu，he我m̄知影，hō͘別人去霧sà-sà，ka-tī êng sian-sian koh輕鬆。M̄-koh Siau Lah-jih mā boeh警告--你，輕鬆ê後壁，你ê人格已經破產，kha-chiah後hō͘ ta̍k-ê ó͘ chi̍t-khang，烏lang-lang，keng-thé你：「Pa̍t-á sái，kia̍t-á哥，pīn-tōaⁿ人，êng sian-sian，食飯放屎ē-hiáu，kho̍k死人。」
「一聲m̄知，百聲無tāi」，m̄是好詼諧。
【註解】
| 詞 | 解說 |
| 無tāi | 無tāi-chì。 |
| 人--mah | 『人嘛』！ |
| 你khah ē | 『你比較會做』。 |
| 你khah khiàng | 你能力khah強。 |
| 推外外 | 『置身度外』。 |
| Chhōe siáⁿ人 | 『找誰』？ |
| Hau-siâu | Pe̍h-chha̍t無影ê tāi-chì，講pe̍h-chha̍t話。 |
| Pe̍h-chha̍t | 『不實在』。 |
| 目khang赤 | Ba̍k-khang-chhiah。 |
| Gê-siâu | 討厭。 |
| Kia̍t-á哥 | 『過分吝嗇的人』。 |
| 過頭利己 | 『太自私自利』。 |
| 撇步 | 好方法，絕招。 |
| Tn̄g tio̍h | 『碰到』。 |
| 這我bē-hiáu，he我m̄知影 | 『這個我不會，那個我不懂』。 |
| 霧sà-sà | 『忙得不可開交』。 |
| Êng sian-sian | 『閒得不得了』。 |
| Kha-chiah後 | 『背後』，『暗中』。 |
| Ó͘ chi̍t-khang | 『挖一個洞』。 |
| 烏lang-lang | 表示挖了真大空。 |
| Pat-á sái | 『吝嗇鬼』。 |
| Pīn-tōaⁿ | 『懶惰』。 |
| Kho̍k死人 | 『吝嗇得不得了』。 |
| 好詼諧 | 好ê話題。 |