〈075〉
M̄-bat做ta-ke，kha手肉la̍k-la̍k-chhoah
M̄-bat chò ta-ke, kha chhiú bah la̍k-la̍k-chhoah
張大姊今年50 gōa，其實iáu減Siau Lah-jih一歲。人伊ê同窗--ê早to̍h做má，孫á幾nā ê。一、二年前伊to̍h開始煩惱伊hit nn̄g-ê後生，m̄知影tī時chiah有thang hō͘伊做ta-ke。等--ah等，等kah頂個月，總--是hō͘伊嘴á笑kah裂sai-sai，大後生boeh訂婚--lò͘。
Teh-tiāⁿ hit一工，張老師當然是歡喜kah笑bún-bún。聘金禮，禮餅錢，早to̍h chhoân好勢，chit-mái kan-taⁿ thèng-hāu一個月後to̍h ē-sái-tit做ta-ke。「M̄-bat做ta-ke，kha手肉la̍k-la̍k-chhoah」，chhoah boeh hō͘人叫a娘，雖bóng hit-ê cha-bó͘ gín-á m̄是親生kiáⁿ，taⁿ嫁hō͘阮後生tio̍h-ài叫我a娘，我一定ē kā伊惜命命，惜kah親像是ka-tī親生ê cha-bó͘-kiáⁿ。
Iáu有，m̄-bat娶tio̍h新婦有khah輸；chit-mái chiah知嫁娶ê khang-khòe hiah-nī kāu禮數，kám ē-tàng hō͘你má-hu！這也tio̍h問，hia也tio̍h算，siāⁿ-té tio̍h jōa chē？請人客ê桌額tio̍h按算，m̄ bat禮數ē hông笑，桌額無夠ē落氣，kha手肉無chhoah mā bē-sái--tit。La̍k-la̍k-chhoah無要緊，phi̍h-phi̍h-chhoah to̍h不可以；kha手肉nā phi̍h-phi̍h-chhoah一定做無tāi-chì，這是歡喜tāi，ná tio̍h án-ne-siⁿ？
「M̄-bat做ta-ke，kha手肉la̍k-la̍k-chhoah。」是正常tāi-chì。Kám kan-taⁿ ta-ke ē la̍k-la̍k-chhoah？親家親姆、新郎新娘，kāng款歡喜kah睏bē去。Kan-taⁿ新郎新娘khah pì-sù，歡喜tī心內，m̄敢講出來niâ。
【註解】
| 詞 | 解說 |
| Kha手肉la̍k-la̍k-chhoah | 『興奮不已，手忙腳亂』。 |
| 做má | 做a-má，『當奶奶』。 |
| 笑kah裂sai-sai | 『笑得合不攏嘴』。 |
| Teh定 | Teh-tiāⁿ，訂婚。 |
| 聘金 | Phèng-kim。 |
| Chhoân好勢 | 準備好勢。 |
| Chhoah boeh | 『等不及要…』。 |
| 惜命命 | Sioh-miā-miā，『疼得不得了』。 |
| Hiah-nī kāu禮數 | 『那麼客氣』。 |
| Siāⁿ-té | Siāⁿ底，送禮ê禮盒。 |
| Phi̍h-phi̍h-chhoah | 驚kah teh chhoah，kah la̍k-la̍k-chhoah無kâng。 |
| Pì-sù | 『含蓄』。 |