〈094〉

500年前，姻緣天註定

Gō͘-pah-nî chêng, in-iân thiⁿ chù-tiāⁿ

古早時代，有chi̍t-ê少年人，20 gōa iáu未娶。有一工êng-êng無聊，sì-kòe bóng sô，sô--á sô，sô來到山內tn̄g tio̍h chi̍t-ê老a公--a，tī一間廟前ê土kha-tau leh牽紅紗線，牽來牽去，hō͘ chit-ê少年--ê看kah霧sà-sà，m̄知影án-ne是leh chhòng siáⁿ？

「A伯--à！你teh牽紅線--hio͘h，牽kah chiah無êng是boeh nî？」

「Ah你m̄知--ò͘！Che m̄是leh牽thit-thô--ê-neh，這叫做姻緣線。Taⁿ咱都chiah有緣，我to̍h講hō͘你知。A伯--à m̄是別人，to̍h是註定人間男女姻緣ê月下老人--lah！Lín chia boeh嫁娶ê男女真chē，m̄-chiah hō͘ a伯--à無êng-chhih-chhih！」

「A伯--à！Siáⁿ-mih叫做姻緣線？Án-ne牽來牽去是siáⁿ-mih意思？」

「人間男女ê緣分早to̍h註好好，「五百年前，姻緣天註定」，你kám m̄-bat聽人講？這牽好ê紅紗線，to̍h是已經註定boeh做ang-bó͘--ê，lóng是500年前to̍h牽好勢--ê。我tăⁿ牽ê新線，tio̍h ài 500年後chiah ē有效。」

「A伯--à！Kám ē-sái-tit kā我看，看我ē娶tio̍h siáⁿ-mih款bó͘？」

「當然mā ē-sái--tit，你叫趙棟ho͘ⁿh！我來kā你chhōe看māi--leh！Ah有--ā！Tī chia。」

「A伯--à！Ah伊súi a̍h bái？」

「Súi是真súi--lah！M̄-koh面欠chi̍t-pêng！」

「A伯--à！Ah伊tòa tī toeh？」

「Tòa tī lín隔壁庄王員外in厝內！」

（月下老人講soah to̍h隨時消失去！）

Taⁿ！Chit-ê少年人趙棟，一時soah失主意，gōng神gōng神行tńg--去，ná行ná想，súi是真súi--lah！M̄-koh面欠chi̍t-pêng！既然是面欠chi̍t-pêng，he ná ē-sái講súi，chit款bó͘我無ài娶。

Ah he我chiah無leh信伊hit套--leh！心肝lia̍h thán橫，叫人kā hit-ê cha-bó͘ gín-á thâi thâi--死，m̄ to̍h bē koh娶伊面無chi̍t-pêng--ê-lò͘。主意lia̍h定，隨時去chhiàⁿ chi̍t-ê殺手一定ài kā hit-ê cha-bó͘ gín-á thâi--死！伊ka-tī mā行李款款--leh，mi-á-liu，溜去別位khiā起，m̄敢koh tòa tiàm庄內。

趙棟chhiàⁿ--來hit-ê殺手，實在是chi̍t-ê莽夫，kan-taⁿ探聽tio̍h王員外in tau，to̍h chhóng-chhóng-pōng-pōng chông入去小姐tòa ê房間，m̄管三七二十一to̍h kā hit-ê可憐ê cha-bó͘ gín-á liô--落-去，趕緊逃命去--lò͘。

可憐ê千金小姐，大哀一聲，驚動王員外一家大細，chiah知tāi-chì大條。王員外想講我做人都也bē-bái，鋪橋造路，做去真chē好事，也m̄-bat hām人結冤仇，taⁿ單生chit-ê cha-bó͘-kiáⁿ，soah來引起人ê刺殺，真ka-chài，天公有目chiu，公媽有保庇，thâi無死，看破，tio̍h疏開來別位tòa khah實在，chia m̄是好所在，bē tòa--得！

王員外一家人疏開到chi̍t-ê小庄kha，開一間kám-á店，日子都也過了平順平順，有一工來chi̍t-ê做工á人，問員外看有boeh chhiàⁿ人工--無？王員外看chit位人客不止á kó͘-ì koh可憐，chū-án-ne收留伊tòa--落-來做看māi。總--是kó͘-ì人koh肯做，人一定o-ló，kám-á店jú做jú大間，王員外mā放心放hō͘伊hoa̍t-lo̍h。做5、6冬，店頭已經擴張到三間，員外歡喜在心內，chit-ê人ē交tiāng--ti̍t。

有一日，thèng-hāu到關門hioh-khùn時，王員外kā薪勞叫óa來身邊講：「想boeh收你做kiáⁿ婿，m̄知你意思siáⁿ款？Taⁿ我都單生chit-ê cha-bó͘-kiáⁿ niā-niā，希望你m̄-thang棄嫌，阮nn̄g-ê老--ê以後to̍h boeh看lín--lò͘！」

「頭家kah無嫌我ham-bān sàn-chhiah人，恭敬不如從命。以後我ē koh khah phah-piàⁿ，來報答丈人爸ê牽成hām疼惜。」自án-ne王--家看chi̍t-ê好日，點燈結綵，li-li lā-lā to̍h kā二人送入洞房，完成了王員外ê一件心事。

話講洞房花燭夜hit一暝，新郎掀開新娘ê面巾boeh看新娘生做圓a̍h扁，無看iáu kioh-sī千金小姐tiāⁿ-tio̍h súi tang-tang，siáng知看了soah驚chi̍t-tiô，thài ē án-ne？新娘mā感覺心酸soah leh目屎流，「是我ê不幸，是天公伯--à hām我sńg笑，soah hō͘我ê面欠chi̍t-pêng……」。

「好--à！Taⁿ mài koh講--落-去！你ê身世我ē-tàng了解。人講「五百年前，姻緣天註定」，咱ē結做ang-bó͘是天註定，免koh怨嘆去hō͘ a爸a母聽。A爸是lín老父，a母是lín a-niâ，in栽培--我，我tio̍h ài疼惜你，咱做美滿ê夫妻，hō͘ in nn̄g-ê老--ê歡歡喜喜食百二。」

「五百年前，姻緣天註定」故事到chia soah，mā有人kā音講ho͘歪chhoa̍h，講做「500斤鹽，鑄一口鼎」，mā是真好笑！

【註解】