〈057〉

目chiu kek chhuh-chhuh;屎ha̍k-á看做Ho͘-thé-luh

Ba̍k-chiu kek chhuh-chhuh, sái-ha̍k-á khòaⁿ-chò Ho͘-thé-luh

講tio̍h「目chiu花花，匏á看做菜瓜；目chiu霧霧，pa̍t-á soah看做蓮霧」，iáu有一句hām這kāng意思，叫做「目chiu kek chhuh-chhuh，屎ha̍k-á看做Ho͘-thé-luh」。Boeh解說有khah費氣--tām-po̍h-á。

Siáⁿ-mih是目chiu chhuh-chhuh？有人寫做「覷」，應該m̄ tio̍h，『面面相覷』是你看我，我看你，北京語唸ㄑㄩˋ。Nā boeh用這字，kui-khì用「促」，因為『目光短促』意思khah kāng款，m̄-koh「促」ê漢音是chhiok，mā m̄是chhuh。

Siáⁿ-mih是Ho͘-thé-luh？To̍h是Hotel，旅社--lah。日本式ê旅社，便所hām房間黏做夥，tòa旅社ê旅客，nā是燒酒lim ho͘ bâng-bâng má-se má-se，toh位是房間，toh位是便所，to̍h有影ē看m̄-tio̍h--去，sô入去便所內『睡覺』--lò͘。

「目chiu kek chhuh-chhuh，屎ha̍k-á看做Ho͘-thé-luh」是無用心a̍h是無精神leh做tāi-chì chiah ē發生。Nā用心koh正經ê時chūn，iáu koh ē有這種têng-tâⁿ，m̄是近視to̍h是老歲á目，親像Siau Lah-jih án-ne「目chiu花花，匏á看做菜瓜」，a̍h是像阮師父Baburaya先生án-ne。伊講「我m̄是普通á ê近視niâ，是大近視，路頭路尾nā無kā你招呼tàm頭，to̍h m̄-thang見怪」。你看伊講演，目鏡掛--leh，倒手the̍h稿，正手koh tio̍h sa一支hàm鏡chiah看有，nā是teh phah電腦chiūⁿ網路，字ài用48點，mā是kāng款tio̍h gia̍h一支hàm鏡chiah ē-sái--tit。你看伊為tio̍h boeh保存咱ê台灣文化，thiau-kang建立這間台灣文學研究工作室，看tio̍h用去伊jōa chē時間hām精神，kám講伊真正目chiu chhuh-chhuh，無boeh做人人愛看、人人o-ló ê時行文化？實在是伊目chiu看遠無看近，kan-taⁿ為tio̍h boeh保留咱台灣ê根本，chiah chiah-nī用心，師父Baburaya ê眼光實在看真遠。

【註解】