〈019〉

父母疼pháiⁿ kiáⁿ，皇帝疼奸臣

Pē-bó thiàⁿ pháiⁿ-kiáⁿ, hông-tè thiàⁿ kan-sîn

揀十欉kāng款平koân、平大、平súi ê樹á栽，種tiàm厝後花園內，kāng款ak水、下肥、khau草，kāng款用心照顧十年了後，有ê koân大健欉，有ê普通普通，有ê細欉bē大，lín想園丁siāng照顧toh一欉？Toh一欉樹á siāng ài感謝園丁ê疼惜？

「父母疼pháiⁿ kiáⁿ」，因為伊pháiⁿ，因為伊han-bān，父母chiah ē費心來拖磨，驚伊細漢bē-hiáu想，大漢ē變做m̄成樣，到時父母nā年老，看伊boeh靠siáⁿ人kā伊牽教？天kha下ê父母心to̍h是án-ne煩惱in kiáⁿ bē大。

「父母疼pháiⁿ kiáⁿ」，ah乖kiáⁿ m̄ to̍h無得tio̍h父母ê疼？雖bóng m̄是án-ne-siⁿ-á講，m̄-koh卻是有人án-ne想，講in父母大細心，小弟pháiⁿ kiáⁿ浪蕩m̄教示，kan-taⁿ嫌伊chit-ê乖kiáⁿ不孝--伊，實在無道理。

父母心思考siāng深沈，pháiⁿ kiáⁿ pháiⁿ教to̍h khah用心， chi̍t-sut-á好to̍h ka o-ló，需要錢銀，khah苦mā tio̍h照准赴伊用，目的lóng是boeh挽救kiáⁿ ê心，自然khah費神；ah nā是飼tio̍h好kiáⁿ，歡喜khǹg在心，隨伊發展，出在伊自由，kám講án-ne to̍h是父母疼無入心？錯！錯！錯！M̄ tio̍h！M̄ tio̍h！絕對m̄ tio̍h！

請你想看māi，樹á栽，正常iā肥，正常ak水，順順á大，khoaⁿ-khoaⁿ-á súi，ná tio̍h雞婆過分kā『揠苗助長』，hō͘伊pa̍k kha pa̍k手來克虧，「無教示ê教示」，m̄是真正父母無用心，in是khǹg tī內心leh關心，所以頭前講ê hit十欉樹á，siāng ài感激園丁--ê to̍h是hit欉súi koh高大ê第一名。

「父母疼pháiⁿ kiáⁿ」是有影，m̄-koh kan-taⁿ tio̍h一半，因為父母疼kiáⁿ永遠都無分súi、bái，gâu、ham-bān，cha-po͘ a̍h cha-bó͘。

「皇帝疼奸臣」，he是無道昏君耳khang輕，愛聽好話chiah ē來疼奸臣，he是戲leh poaⁿ，poaⁿ boeh hō͘ lín ta̍k-ê看，看講耳khang輕聽小人話語，結果是án-chóaⁿ，勸ta̍k-ê tio̍h m̄-thang學皇帝chiah gōng呆。「父母疼pháiⁿ kiáⁿ，皇帝疼奸臣」lām leh講，kan-taⁿ是一種比論，重點iáu是tī「父母疼pháiⁿ kiáⁿ」chit-ê議論。

【註解】