〈017〉

無賒不成店，賒了店不成

Bô sia put sêng tiàm, sia liáu tiàm put sêng

隔壁kám-á店做ê seng-lí是大盤，出入貨色真chē，頂手kiàn nā落貨to̍h是一車koh一車，周老闆chiah割hō͘庄kha店á賣，ta̍k工chhiàⁿ工人送貨，無êng chhih-chhih，seng-lí真gâu做，thàn bē少錢。

「頭家--a！Seng-lí bē-bái--hoⁿh！看lín ta̍k工lóng chiah無êng。」

「A̍h有khah choa̍h，景氣bái，chiâⁿ pháiⁿ做--leh！」

「Kám有影？Lín seng-lí人lóng mā án-ne講，ē haiⁿ chiah有醫。」

「無kā你騙--lah，時機一下bái，庄kha店á kāu賒欠，自然店頭家結siàu to̍h無hiah A-sá-lih，歸尾soah來欠siàu，賒tio̍h阮。」

「無賒不成店，這是做seng-lí ê道理，ná tio̍h掛意。」

「無賒不成店，賒了店不成，nā周轉不靈to̍h hiau-hēng--a。」

「無可能ê tāi-chì，chit-mái ê人lóng mā現金買賣，lín做大盤割貨ê seng-lí，無現金mā有支票，ná有可能用賒--ê。」

「無現金hō͘伊ān，siāng無隔tńg月to̍h ē清siàu，siāng害to̍h是開支票，一開m̄是半年to̍h是三、四個月，頂手一下落貨，siāng koân ān是一個月ê票，你ka想看māi，是m̄是比用賒--ê koh khah慘。」

「自古以來，kám-á店本chiâⁿ to̍h『無賒不成店，賒了店不成。』He是leh講sńg笑，ná tio̍h掛心。」「都án-ne--m̄，bóng講bóng笑，bóng消遣，無mā做tio̍h khah輕鬆。」