〈040〉
雞母chhōa kiáⁿ真輕鬆，雞公chhōa kiáⁿ ē拖帆
Ke-bó chhōa kiáⁿ chin khin-sang, ke-kang chhōa kiáⁿ ē thoa-phâng
Cha-po͘人總--是khah bē-hiáu io細漢gín-á，尤其是hit款紅紅幼幼ê紅嬰á，siáⁿ-mih原因？第一無耐性，bē堪得gín-á吵，bē堪得gín-á háu，gín-á一下啼哭吵鬧，伊to̍h m̄知boeh an-chóaⁿ？第二tòe bē tio̍h cha-bó͘人ê番，人講cha-bó͘人番，番pì-pà，真無講道理，這實在是對cha-bó͘人ê一種侮辱，mā對原住民無禮貌。應該m̄是án-ne解說，boeh án-chóaⁿ講--leh？Siau Lah-jih ê看法是án-ne：cha-bó͘人番m̄是指生番ê番，這對山地原住民是無禮貌--ê，應該ài講做cha-bó͘人翻，翻bē了，一日kah暗kāng款ê khang-khòe做bē了，m̄是翻洗衫，to̍h是翻boeh煮飯，也是因為cha-bó͘人有這款一而再、再而三ê耐性，m̄-chiah有法度 chhiâⁿ家、教kiáⁿ，為kiáⁿ la̍k屎la̍k尿，為kiáⁿ犧牲無惜艱苦病疼，這種性質，這種精神，cha-po͘人無。
Cha-po͘人chhōa kiáⁿ是為tio̍h boeh享受，享受gín-á聽話ê光彩，享受gín-á hō͘人o-ló ê hiau-pai。Gín-á nā是無chiūⁿ教，m̄是氣ló͘ mái-mái chhoah-chhoah，ò͘尾to̍h叫in bó͘來收尾，無to̍h三鋤頭二畚箕，kā gín-á罵罵phah-phah--leh做soah。Cha-po͘人chhōa gín-á，sńg笑--一-下to̍h好，是bē-tàng長時間kā伊lo-so，lo-so久伊ē無耐性，ē起煩惱。人講「雞母chhōa kiáⁿ真輕鬆，雞公chhōa kiáⁿ ē拖帆」，to̍h是講cha-po͘人khah bē-hiáu chhōa gín-á。
Siáⁿ-mih是拖帆？帆船boeh起錠，一定tio̍h thián開船帆，船帆nā hō͘風吹--落-來，拖tio̍h船帆ê船ná ē有未來ê前程？Chi̍t-ê家庭nā是失去了老母，boeh靠a爸chhiâⁿ kiáⁿ to̍h khah不幸。母親ê重要、母親ê偉大tī chit-ê時chūn siāng有感覺，家庭主婦kám是leh講假--ê。
Án-ne講有khah悲情，咱換chi̍t-ê角度來解說，cha-bó͘人chhōa kiáⁿ khah gâu chhōa，因為母愛是伊ê本性，nā換cha-po͘人來chhōa，kiám-chhái ē chhōa kah li-li-lak-lak。阮學校ê陳老師，chit-mái做a公leh chhōa細漢孫，to̍h chhōa kah haiⁿ-haiⁿ叫，講siáⁿ-mih liâm-mi換尿chū-á，liâm-mi泡牛奶，半暝á mà-mà-háu，害伊睏bē飽，做a公有影無簡單，thiám kah si̍t-kó͘頭giōng-boeh làu--去；這to̍h是「雞公chhōa kiáⁿ ē拖帆」ê新解說。
【註解】
| 詞 | 解說 |
| Chhōa | 引導。 |
| 拖帆 | Thoa-phâng，船帆落tī土kha拖，比喻雞á ê翅股頭脫落。 |
| Io | 『養育』。 |
| Bē堪得 | 『承受不了』。 |
| Háu | 『吼叫』，『大聲哭』。 |
| Tòe bē tio̍h | 『跟不上』。 |
| Cha-bó͘人番，番pì-pà | Cha-po͘人罵cha-bó͘人無講道理，有理講bē清ê話。Siau Lah-jih無贊成這種講法。 |
| 翻bē了 | 翻過來，翻過去，翻bē了。 |
| 一而再，再而三 | It jî chài，chài jî saⁿ。 |
| 無chiūⁿ教 | 『不受教』。 |
| 氣ló͘ | Siūⁿ氣koh懊惱。 |
| Mái-mái chhoah-chhoah | Siūⁿ氣無同意，用肢體語言表達ê動作。 |
| 三鋤頭二畚箕 | 『直接乾淨俐落』，mā表示無經過大腦思考。 |
| Sńg笑--一-下 | 消遣一下。 |
| Kā伊lo-so | 『跟他囉嗦』。 |
| Li-li-lak-lak | 『散亂無規則』。 |
| Haiⁿ-haiⁿ叫 | 叫苦連天。 |
| 尿chū-á | 尿布。 |
| Thiám | 『艱苦疲勞』。 |
| Si̍t-kó͘頭 | 『翅膀』。 |
| Giōng-boeh làu--去 | 『簡直快要脫落』。 |