〈020〉
Chhìn飯m̄食，cha-bó͘ kán-á ê（新娘m̄食，婆á gia̍h）
Chhìn-pn̄g m̄ chia̍h, cha-bó͘ kán-á ê (Sin-niû m̄ chia̍h, pô-á gia̍h)
「裕鳳，eng暗ê飯hō͘你煮，媽媽boeh來去台中thit-thô， boeh暗á chiah ē tńg--來。Cha-hng chhun--ê hiah ê chhìn飯炒炒--leh，chiah koh量kóa米落去電鍋煮；菜，ē-po͘食chhun--ê thn̄g-thn̄g--leh to̍h有夠--á！」
「母--á！Chhìn飯無人boeh食，ē-po͘ ê菜湯mā m̄免thn̄g，阮無愛食--lah！Kui-khì lóng煮chhiⁿ--ê。」
「Hiah討債，taⁿ，chiah cha-hng ê chhìn飯niâ，ē-po͘ ê菜湯to̍h bē-sái得食？講kah lín chit-mái ê少年人，m̄知影boeh chhun存，實在真phah-sńg。照媽媽ê kau-tài去做，chhìn飯kah隔頓ê菜湯，我chiah來食。「Chhìn飯m̄食，cha-bó͘ kán-á ê。」做人m̄-thang siuⁿ討債。」
少年朋友--á！Lín tau有專門leh khioh chhìn飯ê cha-bó͘ kán-á『老媽子』--無？Nā有，咱做人sī細--ê tio̍h三思，m̄-thang好食--ê ka-tī先食，食chhun--ê chiah是婆á gia̍h。古早人tī-leh講，「chhìn飯m̄食，cha-bó͘ kán-á ê。」「新娘m̄食，婆á gia̍h。」A母是咱ê，為咱操煩koh chhiâⁿ家，chóaⁿ-thang hō͘伊克虧食路尾？好食--ê父母先食，chiah是養（iúⁿ）孝ê sī細。
【註解】
| 詞 | 解說 |
| Chhìn | léng，冷。 |
| 「Chhìn飯m̄食，cha-bó͘ kán-á ê」，「新娘m̄食，婆á gia̍h」 | 『婢女侍候阿娘á，隨嫁婆侍候新嫁娘，母親疼愛子女，所以，阿娘á、新娘、孩子不要不吃的，都得由婢女、婆á、老媽子來承受』。 |
| Cha-bó͘ kán-á | 『婢女』。 |
| Boeh暗á | 黃昏時，『傍晚』。 |
| Cha-hng chhun--ê | 『昨天剩下的』。 |
| Hiah-ê chhìn飯 | 『那些冷飯』。 |
| Thn̄g-thn̄g--leh | 『熱一熱』。 |
| Chhiⁿ | 『新鮮』。 |
| Kui-khì lóng煮chhiⁿ--ê | 『乾脆都煮新鮮的』。 |
| Hiah討債 | Hiah-nī浪費。 |
| Kau-tài | 委任。 |
| Khioh chhìn飯 | 『揀食冷飯』。 |
| Sī細 | 『子女姪孫』，『晚輩』。 |
| Chhiâⁿ家 | 『持家』。 |
| Chóaⁿ-thang | 『怎麼可以』。 |