〈060〉

Kut-la̍t食栗，pān-tōaⁿ吞nōa

Kut-la̍t chia̍h la̍t, pān-tōaⁿ thun nōa

用漢字來寫，kut-la̍t to̍h是「骨力」，chia̍h la̍t應該是「食栗」，m̄是「食力」。認真phah-piàⁿ ê人，tio̍h付出精神付出氣力，所得--tio̍h-ê報酬當然是有栗子這款好物thang食chiah tio̍h。Kut-la̍t ê人koh tio̍h做kah chiâⁿ「食力」，thài ē有人boeh kut-la̍t--leh？Pān-tōaⁿ人驚艱苦m̄願學m̄願做，thàn錢khah少開錢to̍h bē大方，看人食魚食肉，山珍海味，sì-siù-á點心，伊只好看人食，嘴nōa水bóng吞好niâ。

「Kut-la̍t食栗，pān-tōaⁿ吞nōa」，這是siāng好教人kut-la̍t phah-piàⁿ ê好教材。『一分耕耘，一分收穫』，是天公地道ê tāi-chì，少年人nā想將來boeh過tio̍h好生活，趁chit-mái iáu少年，加減學，加減thōa，thàn錢ê工夫學nā chiūⁿ手，boeh過chi̍t-ê彩色ê人生，mā chiah有法度。雖bóng人生ê目的並m̄是kan-taⁿ求享受，人生m̄是thàn錢為目的，總--是人ê基本生活條件mā ài ē得過，nā無kan-taⁿ顧三頓to̍h leh hāu-hāu-jiàu--à，boeh ná有才tiāu hām人講boeh án-chóaⁿ貢獻社會，boeh做siáⁿ-mih有意義ê khang-khòe？

「Kut-la̍t食栗，pān-tōaⁿ吞nōa。」Boeh piàⁿ趁chit-chūn，青春少年時，認真讀冊，kut-la̍t做khang-khòe，千萬m̄-thang pān-tōaⁿ，thèng-hāu怨嘆講「少年bē-hiáu想，食老chiah來m̄ chiâⁿ樣」，siuⁿ慢--lò͘！

【註解】