〈082〉

Kó͘-ì kah一條腸á thàng kha-chhng

Kó͘-ì kah chi̍t-tiâu tn̂g-á thàng kha-chhng

「蕭老師！Kā你探聽一項tāi-chì？」

「Siáⁿ tāi-chì？知影--ê（當然是ē-tàng講出嘴--ê）tiāⁿ-tio̍h報你知！」

「最近你是m̄是有買一台Halo牌ê鋼琴？」

「有--ā，有--ā！Gín-á吵boeh學，勉強標一陣會á，chhân-chhân ka買--一-台，感覺真燒lo̍h。」

「Halo牌ê鋼琴品質好也m̄好？」

「Bē-bái--lah！」

「Kám有影？人m̄是講Amaho--ê khah好？」

「Khah好無khah好，無用--過to̍h m̄知影。人講一分錢一分貨，Halo牌--ê價siàu雖bóng有khah sio̍k，m̄-koh根據chit個gōa月ê使用經驗，感覺ē買--得。」

「Kám無siáⁿ-mih缺點？」

（想講ta̍k-ê lóng是同事，kan-taⁿ一直講bē-bái bē-bái，soah hō͘伊kioh-sī咱leh替seng-lí人講話？……）

「Nā boeh講缺點，應該是有--lah！Kiám-chhái是新新ê關係，鍵盤ê觸感有khah硬--tām-po̍h-á！Koh彈--幾-個-月-á，應該ē khah輕chiah tio̍h。」

「Hô͘！Án-ne--ò͘！感謝--ho͘ⁿh！」

（幾工後，賣琴ê陳老闆來到chit…）

「 ！蕭老師你人mā m̄-thang án-ne-seⁿ，無kā阮tàu講好話to̍h leh慘--á，koh kā阮宣傳pháiⁿ話，siáⁿ-mih鍵盤ê觸感有khah硬--tām-po̍h-á！蕭老師！Án-ne bē-sái--tit-lah！拜託，拜託！」

（陳老闆ê面á pìⁿ-pìⁿ）

「頭家！蕭老師歡喜kā你買琴，你歡喜無歡喜無要緊，阮同事來探聽琴ê好bái，詳細分析hō͘伊做參考，好--ê講規大堆，無kah意--ê一點點á，是阮同事人tiau直，「Kó͘-ì kah一條腸á thàng kha-chhng。」連名帶姓講講hō͘你知，伊nā ē-hiáu講話，應該ài講「有聽人leh講…」to̍h好，ná thang連蕭老師ê名mā講--出-來，án-ne to̍h m̄是真gâu安排。Koh再講，你ka想看māi，蕭老師紹介án-ne ê話kám有過分？」

「……。」

「蕭老師無hiah-nī gōng，ka-tī買琴ka-tī嫌hō͘人聽，koh講，蕭老師kám有義務kā lín tàu廣告，也無thàn lín ê khan-kâu-á料，你ná ē-sái-tit面á pìⁿ-pìⁿ無歡喜，你講有理a̍h無理。」

這是發生tī 20年前ê tāi-chì，是ka-tī siuⁿ老實，a̍h是別人siuⁿ kó͘-ì，實在分bē真。

做人誠實真要緊，善心kó͘-ì，誠懇對待--人，心內無詐無欺，m̄-koh m̄-thang siuⁿ tiau直。Nā是「Kó͘-ì kah一條腸á thàng kha-chhng」，有tang時á ē害死人，mā ē害tio̍h ka-tī。你nā sù常「Kó͘-ì kah一條腸á thàng kha-chhng」，講tio̍h話好bái bē-hiáu除，ē講--得bē講--得，lóng總講hō͘ ka-tī歡喜，以後看siáⁿ-mih人á敢hām你開講講趣味。

【註解】