〈039〉

Chē新婦，ló͘死ta-ke

Chē sin-pū, ló͘ sí ta-ke

Chit-mái ê 人khah khiáu，為tio̍h提升生活品質，注重gín-á ê教育，tòe tio̍h時代趨勢，koh有節育觀念，lóng ē-hiáu生--nn̄g-ê to̍h好。Nā是無tú好，生tio̍h nn̄g-ê lóng是公--ê a̍h是lóng是母--ê，chiah ē chhân-chhân koh生第saⁿ-ê。無像古早人án-ne，ē生，生到bē生，生生一大陣，chiah來拖磨，chiah來giâ-kê。

這lóng ài感謝科學家醫學ê研究，hō͘咱ē-tàng boeh生to̍h來生，m̄生to̍h來避孕a̍h是pa̍k掉。無像khah早a-má ê時代，kan-taⁿ為tio̍h a爸a母ê趣味，boeh生jōa chē to̍h生jōa chē。親像阮父母to̍h生阮五兄弟，隔壁家財in a爸a-niâ，to̍h kā in生cha̍p-ê兄弟姊妹：Chhó、Chài、Toān、Iām、Thiam、Khah-chuh、Ma-chuh、Tiong-kài、Hiân、Ban，tú-tú-á cha̍p-ê，cha-po͘--ê佔peh-ê，gâu生--ho͘ⁿh？Peh-ê後生chiâu-chiâu娶，to̍h有peh-ê新婦，人o-ló講chiâⁿ好命。

Chiâⁿ好命？He是人o-ló講--ê，其實--leh？「Chē新婦，ló͘死ta-ke」--lah！你ka想看māi，「ē生得kiáⁿ身，都bē生得kiáⁿ心」--a？無講ùi peh-ê家庭娶--入-來ê新婦，kám ē kāng一款心性，kāng一樣ê心情來聽你chit-ê ta-ke ê命令？He是無可能ê tāi-chì--lah！免siàu想，想--tio̍h你ē gêng，想--tio̍h你ē心kông火to̍h，想--tio̍h你ē怨嘆ná ē boeh生hiah chē來拖磨。人講chē kiáⁿ餓死pē，我講「chē新婦，ló͘死ta-ke」，怨慼！怨慼！

【註解】