〈063〉

免錢薰，大嘴吞

Bián-chîⁿ hun, tōa-chhùi thun

有chi̍t-pái，人送一大láng pa̍t-á來hō͘阮phah球ê朋友食，講一人ē-sái-tit分二粒，khǹg tī樹á kha，boeh食ka-tī ni。

一時間，láng á邊烏khâm-khâm，相爭揀，chit粒siuⁿ tēng，hit粒siuⁿ細，chit粒有tèng點，hit粒撞chi̍t-khang，頭前ê人一直chhiau，後壁ê人gōng-gōng-á等；chiah過三分鐘，to̍h等kah擋bē-tiâu，一支嘴chho̍p-chho̍p唸：「Chiah pháiⁿ款，免錢--ê也tio̍h揀東揀西，siáu貪！」

講也奇怪，換到後壁ê伊（iáu有我），kāng款一直chhiau，一直揀，尾--á iáu m̄是lóng總the̍h了了，也無chhun kah半粒。因為chit láng pa̍t-á生做chiâⁿ chiâu chiâⁿ súi，等ka-tī mā hām人爭leh揀了後，hiông-hiông猛醒tī心肝底tiuh--一-下，「免錢薰，大嘴吞」kám m̄是犯tio̍h siáu貪ê本性？Ná ē án-ne？這是咱人siāng大ê弱點，貪小利niā-niā？

「免錢薰，大嘴吞」表現--ê是人ê siáu貪本性，kám講真正ta̍k-ê為tio̍h一粒pa̍t-á ê價值10-kho͘、5-kho͘ leh計較，chiah ē tòa hia leh現世、kiàn-siàu、烏白chhiau，ná ē無想tio̍h日常生活，百kho͘千票the̍h leh開，奉獻樂捐1,000、2,000無計較。人ê心內想án-chóaⁿ？實在hō͘人想bē-hiáu。雖bóng小事chi̍t-chân，人性ê研究hō͘人tio̍h驚不安。人ê貪，kiám-chhái ùi chit-chân sió-khóa tāi-chì開始，以後tio̍h隨時提醒ka-tī，chit款siáu貪ê tāi-chì m̄-thang koh犯。

【註解】