母語ê奶芳，在地ê聲嗽
呂興昌
舊年（1997）四月，tī一个真偶然ê機會，tng-tong我tiàm網路內底tit-leh chhē資料ê時，無意中看著一个教人輕輕鬆鬆學做homepage ê網站，原本對電腦無半撇ê我，一時好奇，有看ná無看--leh，加減ka gió--一下，soah發現kán-ná m̄是真pháiⁿ紡ê款，就tòe伊ê說明bóng lia̍p bóng做，結局，五分鐘，無kā你騙，真正五分鐘niā-niā，我就會曉做homepage啦！
這个「歷史性ê五分鐘」hō͘我親像雷摃--著，m̄是啦，是hō͘雷聲chim--著仝款，kui-ê腦筋chiâu開；斯當時，我參好朋友為著開拓台灣文學研究，每個月tī清華大學月涵堂舉辦ê小型「台灣文學研討會」已經完成伊歷史性ê任務，足需要另外開發無仝ê活動形式，致使一下學著編寫homepage ê phiat步，我就知影beh加速、加強台灣文學研究ê水準，建立專業ê研究網站是目前上kài理想ê方式，所以我就開始起造「台灣文學研究ê kám-á店」，尾--à，感覺「kám-á店」雖然是當時「店面」ê實情，m̄-koh想著未來ê發展方向是beh行學術ê路，號一个á khah合軀ê名無定著khah會久長，自án-ne，「台灣文學研究工作室」（http：//140.114.123.98/~taioan）這个網站，才tī網路來佮台文同道見面。
我整個ê計劃是，這个網站ê正式語言至少應該包括台語（hō-ló台語）、華語、日語、英語這四種語言，án-ne才有法度表現台文研究ê歷史特質。不過，人ê性命、氣力有限，我仝一个時陣beh掠四隻兔仔，有影是阿婆--ā生囝，chiâⁿ拚--leh！所以初步決定先用我家己ê母語──mā是大部分台灣人ê母語──做頭陣，向望後手有趣味ê朋友，oan-nā褲跤pih--起來，做伙liâu落來tàu-saⁿ-kāng，將其他三種語言kēng--起來。
我深深覺悟，台語nā無緊透過正式教育ê傳授佮推廣，免jōa久就會hō͘獨尊獨霸ê華語斬草除根兼滅種！但是，台語教育正規化ê時間表tang時才有法度sa--出來？照現此時ê勢面來看──hông洗腦洗kah對母語失落感覺無要無緊ê人，特別是少年輩，愈來愈濟──實在是hò͘-suh破空真pháiⁿ講。所以咱bē-tàng koh再等，咱愛大步先hāⁿ--出去，親像過去所有惡質制度ê改革，攏是民間行進前，官方tiàm後壁哭父哭母大聲hiu大聲hoah，講擋--leh，bē使變bē使改，nā m̄聽，kā你掠起來thâi，kā你關入去籠á內！總--是，歷史事實證明，in阿國á終其尾mā是無法度違抗民意，過去beh掠beh thâi ê一寡觀念，m̄甘願mā攏tio̍h拾起來做，什麼戒嚴、黨禁、報禁、a-sa-phú-lú烏白禁，才一項一項破功，才變成咱今仔日民主ê場面。所以咱beh推sak台語就愛親像hia-ê先覺仝款，拚勢對草根ê所在做起，無論理論或創作，做hō͘伊闊、做hō͘伊深，做hō͘伊在腹穩當koh齊全（chiâu-chn̂g），做hō͘伊有一工，茫茫渺渺ê台灣人半暝精神--起來，反悔beh chhē爸母話ê時，soah來kā咱感心o-ló兼tak-舌！
自án-ne，我就抱tiâu為母語奉獻ê心，經營這个孤手起造ê網站，無論研究者採用tó一種ê書寫語言，我一定用台語穿針引線做紹介；我beh證明，台語除了是活跳跳ê生活語言以外，mā真有資格成做學術論述ê語言。另外，我知影我這沿五十外歲á ê人，母語已經失落bē少，總--是，有心khioh，猶koh會當khioh足濟轉--來leh，猶m̄免親像第四台ê布袋戲，將華語直譯當做是台語：明明「無定著」「hōan勢」這種真通常ê話句，tiau-kang講做「iā-hí」（也許），真正是敗壞母語罪大惡極！所以我就想藉上kài原汁上kài有台灣味ê俗語來進行母語重建ê khang-khè。
在我想，市面冊店有關台灣俗語ê書（chu）雖然真濟，m̄-koh攏是用華語來leh解說，重點kan-na是beh hō͘人瞭解俗語ê意思，並無建立台語思考甚至書寫ê目的，這對台灣俗語來講，雖然算是有關心，但是這拍算大部分是為華語服務ê關心，並m̄是徛〔khiā〕tī台語本身本體的〔tek〕ê關心，因為án-ne，我就tiàm網站內底設立一个專門討論台灣俗語ê專頁，用我家已自細漢就leh講ê話語來開講，號做「台灣俗語鹹酸甜」；每日選一句俗語熬〔gô〕一chhiám做一篇，向望利用這種方式來回想、記錄佮發揚台語優美ê精華。
Hit當陣，這个想法佮做法有得著一寡同道ê認同佮支持，親像研究室tī我隔壁語言所ê連金發教授就真kā我鼓勵，mā介紹伊ê學生入來網站交陪。M̄-koh，論實際ê ŏ͘-ián幫贊，tī白話字「台語網」（taigu@formosa.org）這个mailing-list討論群熟sāi ê田中央蕭平治老師，卻是我這一生特別愛感謝ê好兄弟。
伊kan-na大我二歲niā-niā，m̄-koh對母語ê認識佮研究théng-hó做我ê先生，tī獨力熬鹹酸甜ê kó͘外月中間，凡是我白話字音無妥當ê所在，伊攏一字一字，無惜時間佮氣力替我訂正，hō͘這个專頁減少真濟ngō͘-tāⁿ。我想這種人材thài會使放hō͘伊「冗」〔êng〕--lih！所以就招伊liâu入來tàu熬，一三五、二四六，公家輪流來做鹹酸甜。路尾，因為我教學佮研究ê壓力實在siuⁿ過頭重，漸漸無時間thang寫，ko͘-put-jī-chiong，面皮就激厚厚，kah伊參詳，講免koh輪--a啦，kui-khì攏hō͘你來hōaⁿ啦。Ah兄弟á m̄是做假--è，伊一聲就答應--落來，hō͘我擔頭一下放，身軀chiâu輕鬆。
續--落來，時間一日一日過，鹹酸甜一工一工濟，一年，年半就án-ne累積出hō͘人想bē到ê成績，有研究生每日收集伊ê作品，有bat貨ê人探聽伊ê底tì，mā有人講教育部有leh設獎肯定台文ê著作，伊應該去試看māi--leh。平治兄就寫批問我ê意見，我講做你去參加，thang hō͘ hia-ê評審鼻一下á芳，欣賞寡台灣話súi-tang-tang ê風景。果不其然，伊撿tī網站發表過ê兩百五十chhiám去參賽，輕輕鬆鬆就sa五萬kho͘ ê獎轉--來！Koh有朋友講，獎雖然有--ā，m̄-koh有法度用電腦讀遮ê物件ê人總是有數，kui-khì來出版，好食tàu相報，án-ne對台文ê推廣加真有利益。平治兄koh問我，我講免細膩，你ê作品，m̄-nā bē失人禮，顛倒人會感心你ê拍拚佮水準。
論真，平治兄表面上雖然是leh討論台灣俗語，但是目睭金ê人攏知影伊是藉著俗語leh發揮伊ê思想佮智慧。頭起先，咱會感受著伊hit種對台灣有血有目屎ê深情，hit種向望台灣早一日建立主體性ê期待，這，做一个台灣囡á，做一个聲聲句句beh搶救母語ê基層老師，是上基本ê出發點，這，平治兄，蕭老師，hō͘咱一个真平實ê模範佮希望。
另外，平治兄ê生活經驗非常豐富，五花十色ê社會動態、mê-mê kak-kak ê人情世事，攏tī伊利劍劍卻不失溫柔ê筆下，展現出值得咱進一步思考ê問題意識，這佮現代其他有心ê文學書寫仝款，攏有歷史見證ê價值。
最後，平治兄ê台語書寫──這是伊這本冊穴脈ê所在──，上大ê特色就是盡量將咱台語特有ê語彙佮用法記錄--落來。除了俗語本身無話講ê súi以外，伊mā真拍拚寫出會當佮俗語水準相當ê話語，所以整个看--起來，這本冊soah無輸是提供hō͘台語bē siáⁿ liàn-tńg ê少年家一个重再認bat母語ê機會，伊ê教育意義非常ê深遠。