〈204〉

寒kah m̄知熱siū

Kôaⁿ kah m̄-chai jia̍t siū

三siap（三、四十）年前ê經濟真bái，boeh穿一領súi衫（m̄免限定新衫）tio̍h ài等過年，a̍h是去親chiâⁿ tau thit-thô ê時chūn，每1-pái nā穿tio̍h súi衫to̍h m̄願thǹg起來換，有tang時á sńg kah汗流sám滴，mā m̄甘thǹg掉，chit時大嫂lóng ài笑講「寒kah m̄知影熱siū」。Chit款衫á穿--落-去to̍h pān-tōaⁿ thǹg--起-來ê習慣，到 taⁿ mā iáu改變無jōa chē。

「寒kah m̄知影熱siū」，意思是講天氣轉熱--à，iáu穿厚衫，bē-hiáu分寒熱，m̄-kú nā ē án-ne講？感覺chiâⁿ奇怪，最近請教朋友，伊án-ne講：M̄是「寒kah m̄知影熱siū」，是「寒狗m̄知熱siū」--lah！寒狗是無厝thang tòa ê流浪狗，伊boeh thài ē知影有厝有siū ê溫暖，chit種講法感覺iáu是無siáⁿ適當，m̄知有khah好ê解說--無？

最近天氣無順，早暗有sêng寒天，boeh晝後á氣溫khah koân，boeh thǹg衫m̄ thǹg衫實在pháiⁿ chat，因為A型感冒tng-leh流行，只好hō͘人笑「寒kah m̄知影熱siū。」mā無要緊。 最後boeh來khe-khó chit句俗語，tàu-té是「寒狗m̄知影熱siū」，a̍h-sī「寒kah m̄知影熱siū」，其實是「寒到m̄知影熱受」chiah-tio̍h。寒tio̍h加穿衫，熱tio̍h褪--起來，有人pân-tōaⁿ無piàn-khiàu，bē-hiáu分寒熱，m̄-chiah「寒kah m̄知影熱siū」。

【註解】